1988 ല്‍ ആണ് സിനിമാതാരം സായി കുമാറിന്റെയും പ്രസന്ന കുമാരിയുടെയും വിവാഹം കഴിഞ്ഞത്. 2008 ല്‍ ഇരുവരും വേര്‍പിരിഞ്ഞു. വയസ്സ് കുറച്ച് പറഞ്ഞ് പ്രസന്ന തന്നെ പറ്റിച്ചു എന്നായിരുന്നു സായികുമാറിന്റെ ആരോപണം. ബിദ്ധു പണിക്കര്‍ തന്റെ ജീവിതം നശിപ്പിച്ചു എന്ന് പറഞ്ഞ് പ്രസന്നയും രംഗത്ത് എത്തിയിരുന്നു. കോടതിയില്‍ വച്ചും തര്‍ക്കമുണ്ടായി. അച്ഛനും അമ്മയും വേര്‍പിരിഞ്ഞ ശേഷം വൈഷ്ണവി അമ്മയ്‌ക്കൊപ്പമായിരുന്നു. പ്രസന്ന കുമാരിയുമായി അകന്നതിന് ശേഷമാണ് സായി കുമാര്‍ ബിന്ദു പണിക്കറിനെ വിവാഹം ചെയ്തത്. ഇപ്പോള്‍ ബിന്ദു പണിക്കറിനും അവരുടെ മകള്‍ക്കുമൊപ്പമാണ് സായികുമാര്‍ ജീവിയ്ക്കുന്നത്.

പ്രസന്ന കുമാരിയ്ക്കും സായികുമാറിനും ജനിച്ച മകള്‍ വൈഷ്ണവി ഇപ്പോള്‍ മലയാള സീരിയലില്‍ സജീവമാണ്. അച്ഛന്റെയും അച്ചാച്ഛന്റെയും അഭിനയ പാരമ്പര്യം പിന്‍തുടര്‍ന്ന് സീരിയലിലെത്തിയ വൈഷ്ണവിയുടെ പല മാനറിസങ്ങളും സായികുമാറിന്റേത് പോലെ തന്നെയാണെന്ന് കമന്റുകള്‍ വന്നിരുന്നു. അഭിനയത്തിലേക്ക് തിരിഞ്ഞ ശേഷമാണ് വൈഷ്ണവി സോഷ്യല്‍ മീഡിയയില്‍ സജീവമായത്. ലൊക്കേഷന്‍ അനുഭവങ്ങളും അച്ഛനെ കുറിച്ചും അമ്മയെ കുറിച്ചും ഉള്ള ഓര്‍മകളും വൈഷ്ണവി നിരന്തരം ഇന്‍സ്റ്റഗ്രാമില്‍ പങ്കുവയ്ക്കാറുണ്ട്. അക്കൂട്ടത്തിലാണ് സായികുമാറിന്റെയും മുന്‍ഭാര്യയുടെയും ഫോട്ടോ വൈഷ്ണവി വീണ്ടും പങ്കുവച്ചത്. സായി അച്ഛനും പ്രസന്നാമ്മയും എന്ന് പറഞ്ഞുകൊണ്ടാണ് വൈഷ്ണവി ഫോട്ടോ പങ്കുവച്ചത്. ഫോട്ടോയ്ക്ക് താഴെ വന്ന കമന്റുകളില്‍ ഒന്ന്, 'വീണ്ടും ഒന്നിച്ചോ' എന്നായിരുന്നു. അതിന് മറുപടിയായി വൈഷ്ണവി എത്തി. 'എന്റെ മനസ്സില്‍ അവര്‍ ഇപ്പോഴും ഒന്നിച്ച് തന്നെയാണ്' എന്നായിരുന്നു താരപുത്രിയുടെ മറുപടി.