മലയാളികൾക്ക് ഏറെ ഇഷ്ടമുള്ള അമ്മ താരമാണ് നടി മീന ഗണേഷ്. വാസന്തിയും ലക്ഷ്മിയും പിന്നെ ഞാനും, നന്ദനം, മിഴി രണ്ടിലും, മീശ മാധവൻ തുടങ്ങി നിരവധി സൂപ്പർ ഹിറ്റ് സിനിമകളിലൂടെ മീന ഗണേഷ് ആരാധകരുടെ ഉള്ളിൽ വലിയൊരു സ്ഥാനം പിടിക്കുകയായിരുന്നു. എന്നാൽ ഒരു കാലത്ത് സിനിമയിൽ സജീവമായിരുന്ന മീന ഗണേഷിനെ ഇപ്പോൾ സിനിമകളിൽ കാണാറില്ല.ഒരു കാലത്ത് മീന ഗണേഷ് കലാഭവൻ മണിയുടെ സിനിമകളിലെ നിറ സാന്നിധ്യമായിരുന്നു. കേവലം അഭിനേത്രിയായിട്ടല്ല, സ്വന്തം അമ്മയായിട്ടായിരുന്നു കലാഭവൻ മണി മീനയെ കണ്ടത്. മീനയ്ക്ക് മണിയോടും ഒരു മകനോടെന്ന പോലുള്ള വാത്സല്യമുണ്ടായിരുന്നു. നടൻ കലാഭവൻ മണി ഇപ്പോൾ ജീവിച്ചിരുന്നെങ്കിൽ അവർക്കുവേണ്ട എല്ലാ സഹായങ്ങളും ലഭിക്കുമായിരുന്നു എന്ന് സിനിമ പ്രവർത്തകനായ വിജയ് ശങ്കർ ഒരിക്കൽ പറഞ്ഞിരുന്നു. മീന ഗണേഷ് കൂടുതൽ പ്രേക്ഷക ശ്രദ്ധ പിടിച്ചു പറ്റിയത് വാസന്തിയും, ലക്ഷ്മിയും, പിന്നെ ഞാനും എന്ന ചിത്രത്തിലെ അഭിനയത്തിലൂടെയാണ്. നൂറിലധികം ചിത്രങ്ങളിൽ അഭിനയിച്ചിട്ടുള്ള താരമാണ് മീന ഗണേഷ്. രണ്ട് വർഷത്തിലധികമായി മീന അഭിനയ രംഗത്ത് നിന്ന് ഇടവേളയെടുത്തിട്ട്.

കാലിന് വയ്യാതെ വന്നതോടെയാണ് അഭിനയരംഗത്ത് നിന്ന് താൽക്കാലികമായി മീന ഗണേഷ് ഇടവേളയെടുത്തത്. ആരോഗ്യ പ്രശ്നങ്ങൾ അലട്ടിയിരുന്നു എങ്കിലും പരസഹായത്തോടെ താരം അഭിനയിക്കുവാൻ ഷൂട്ടിങ്ങ് ലൊക്കേഷനുകളിൽ എത്തിയിരുന്നു. അതിനിടെയാണ് അസുഖം വല്ലാതെ തളർത്തുന്നത്. ഭർത്താവ് മരിക്കുന്നതിന് മുൻപ് മീനയ്ക്ക് ബിപി കൂടി തല കറക്കം അനുഭവപ്പെട്ട് തുടങ്ങിയതോടെയാണ് മീന അവശയായി മാറിയത്. പിന്നാലെ ഭർത്താവിൻ്റെ മരണത്തോടെ നടി തീർത്തും ഒറ്റപ്പെടുകയായിരുന്നു. ഇപ്പോൾ നടിയ്ക്ക് നടക്കുവാൻ പോലും കഴിയാത്ത അവസ്ഥയിലാണ്. ആരോഗ്യ പ്രശ്നങ്ങളെത്തുടർന്ന് കുറച്ചു നാൾ പാലക്കാട് ആശുപത്രിയിൽ ചികിത്സയിൽ കഴിയുകയായിരുന്നു. അന്ന് രണ്ട് ആഴ്ചയിലധികം ആശുപത്രിയിൽ കഴിയേണ്ടിയും വന്നു. പിന്നീട് മീനയെ കുറിച്ച് വിവരമൊന്നും ഉണ്ടായിരുന്നില്ല. ‘അമ്മ’ താര സംഘടനയുടെയും, ഫിലിം സൊസൈറ്റിയുടെയും പെൻഷൻ ലഭിക്കുന്നത് മാത്രമാണ് അന്നുണ്ടായിരുന്ന ഏക ആശ്വാസമെന്നും മീന ഗണേഷ് പറഞ്ഞിരുന്നു.

മീന ഗണേഷിന് ഒരു മകനും, മകളുമാണ് ഉള്ളത്. ഭർത്താവ് മരിച്ചിട്ട് പന്ത്രണ്ട് വർഷം പിന്നിടുകയാണ്. നാടകത്തിൽ ഒപ്പം അഭിനയിച്ച് പരിചയപ്പെട്ട ആളെ തന്നെയാണ് മീന വിവാഹം കഴിച്ചത്. ഇരുവരും ആദ്യം സുഹൃത്തുക്കളാവുകയും, പിന്നീട് ആ സൗഹൃദം വിവാഹത്തിലേയ്ക്ക് എത്തുകയുമായിരുന്നു. ഒടുവിൽ ഭർത്താവിൻ്റെ വീട്ടിൽ താമസിച്ച് വരികയായിരുന്നു മീന. ഇടക്കൊരിക്കൽ തൻ്റെ മകൻ തന്നെ നോക്കുന്നില്ല എന്ന് ആരോപിച്ച് മീന മാധ്യമങ്ങളുടെ മുന്നിൽ എത്തിയിരുന്നു. മകൻ ചിരട്ട എടുത്തു തെണ്ടാൻ പോകാൻ പറഞ്ഞു എന്നാണ് അന്ന് അവർ ഒരു മാധ്യമത്തോട് പറഞ്ഞത്. മകനിൽ നിന്നു ഗാർഹിക പീഡനം ഏൽക്കേണ്ടി വന്നെന്ന് ആരോപിച്ചു നടി രംഗത്തെത്തിയതും സിനിമാപ്രേമികളിൽ നൊമ്പരമുണർത്തിയിരുന്നു. പിന്നീട് ഈ പ്രശ്നം പോലീസ് മക്കളെ വിളിച്ചുവരുത്തി ചർച്ചയിലൂടെയാണ് പരിഹരിച്ചത്. നാടക രംഗത്ത് നിന്നുമാണ് സിനിമയിലേയ്ക്ക് താരം അരങ്ങേറ്റം കുറിക്കുന്നത്. സിനിമയിലെ അഭിനയ മികവിൻ്റെ അടിസ്ഥാനത്തിൽ മികച്ച സ്വഭാവ നടിയ്ക്കുള്ള അംഗീകാരവും മീനയെ തേടിയെത്തിയിരുന്നു.