ഗെയിമിങ് ആപ്പിന് പ്രചാരണം നല്കിയതുമായി ബന്ധപ്പെട്ട് ബോളിവുഡ് താരങ്ങള്ക്ക് ഇ.ഡിയുടെ നോട്ടിസ്
ഗെയിമിങ് ആപ്പുമായി ബന്ധപ്പെട്ട് ബോളിവുഡ് നടിമാരായ ഹുമ ഖുറേഷി, ഹിന ഖാന്, നടന് കപില് ശര്മ എന്നിവര്ക്ക് നോട്ടിസ് നല്കി എന്ഫോഴ്സ്മെന്റ് ഡയറക്ടറേറ്റ് (ഇ.ഡി). ആപ്പിന് പ്രചാരണം നല്കിയതുമായി ബന്ധപ്പെട്ടാണ് ഇവരോട് ഇ.ഡിയ്ക്കു മുന്പില് ഹാജരാകാന് ആവശ്യപ്പെട്ടത്. രണ്ബീര് കബീറിനോടും ഹാജരാകാന് ആവശ്യപ്പെട്ടിരുന്നു.
അതേസമയം ഇ.ഡിക്ക് മുന്പില് ഹാജരാകാന് രണ്ടാഴ്ചത്തെ സമയം ആവശ്യപ്പെട്ടിരിക്കുകയാണ് രണ്ബീര്. വെള്ളിയാഴ്ച അന്വേഷണ ഉദ്യോഗസ്ഥര്ക്കുമുന്നില് ഹാജരാകണമെന്നായിരുന്നു രണ്ബീറിനോട് ആവശ്യപ്പെട്ടിരുന്നത്. മഹാദേവ് ആപ്പിന് പ്രചാരം നല്കുകയും ഇതിന് ആപ് പ്രമോട്ടര്മാരില് നിന്ന് പണം സ്വീകരിക്കുകയും ചെയ്തു എന്നതാണ് രണ്ബീറിനെ ഇ.ഡിയുടെ സംശയമുനയിലാക്കിയത്. ഫെബ്രുവരിയില് യുഎഇയില് നടന്ന മഹാദേവ് ആപ് പ്രമോട്ടറായ സൗരഭ് ചന്ദ്രകാറിന്റെ വിവാഹത്തിലും കമ്പനിയുടെ വിജയാഘോഷത്തിലും ബോളിവുഡ് താരങ്ങള് പങ്കെടുത്തതും ഇ.ഡി അന്വേഷിക്കുന്നുണ്ട്.
കാര്ഡ് ഗെയിമുകള്, ക്രിക്കറ്റ്, ബാഡ്മിന്റന്, ടെന്നിസ്, ഫുട്ബോള് തുടങ്ങിയ തത്സമയ ഗെയിമുകളില് അനധികൃത വാതുവയ്പ് നടത്തുന്നതിനുള്ള പ്ലാറ്റ്ഫോമാണ് മഹാദേവ് ഓണ്ലൈന് ബുക്കിങ് ആപ്ലിക്കേഷന്. ഭിലായ് സ്വദേശികളായ സൗരഭ് ചന്ദ്രകറും രവി ഉപ്പലുമാണ് ആപ്പിന്റെ പ്രധാന പ്രമോട്ടര്മാര്. ഇവരുടെ പ്രവര്ത്തനങ്ങള് ദുബായ് കേന്ദ്രീകരിച്ചാണ്. ഈ ആപ്പില്നിന്ന് ഇരുവരും ചേര്ന്ന് 5,000 കോടി രൂപയോളം സമ്പാദിച്ചതായാണ് ഇ.ഡിക്ക് ലഭിച്ച വിവരം.
കേസില് ടൈഗര് ഷ്റോഫ്, സണ്ണി ലിയോണി തുടങ്ങി മുന്നിര ബോളിവുഡ് താരങ്ങളും ഇ.ഡി നിരീക്ഷണത്തിലാണെന്നു റിപ്പോര്ട്ടുണ്ടായിരുന്നു. കേസില് ഇതുവരെ നാലു പേര് അറസ്റ്റിലായിരുന്നു. മുഖ്യപ്രതികളായ സൗരവ് ചന്ദ്രകാര്, രവി ഉപ്പല് എന്നിവരെ പിടികൂടാന് കഴിഞ്ഞിട്ടില്ല. ഇവരെ പിടികൂടാനായി റെഡ് കോര്ണര് നോട്ടിസ് പുറപ്പെടുവിക്കാനുള്ള നീക്കങ്ങളും ഇഡി ആരംഭിച്ചിട്ടുണ്ട്.
ഈ വര്ഷം ഫെബ്രുവരിയില് യുഎഇയില് നടന്ന മഹാദേവ് ബുക്ക് ആപ് പ്രമോട്ടറായ സൗരഭ് ചന്ദ്രകാറിന്റെ വിവാഹ വിഡിയോയില് ബോളിവുഡിലെ വമ്പന്മാരുടെ സാന്നിധ്യം കാണാം. വിവാഹ ചടങ്ങുകള്ക്കായി 200 കോടി രൂപ ചെലവഴിച്ചെന്നാണ് ഇഡിയുടെ കണ്ടെത്തല്. നാഗ്പുരില് നിന്ന് യുഎഇയിലേക്ക് കുടുംബാംഗങ്ങളെ എത്തിക്കാന് സ്വകാര്യ വിമാനങ്ങള് വാടകയ്ക്കെടുത്തിരുന്നു. ഇഡി ശേഖരിച്ച ഡിജിറ്റല് തെളിവുകള് പ്രകാരം വിവാഹ ചടങ്ങുകള്ക്കായി ഇവന്റ് മാനേജ്മെന്റ് കമ്പനിക്ക് 112 കോടി രൂപ ഹവാല വഴി കൈമാറി. എന്നാല്, ഹോട്ടല് ബുക്കിങ്ങിനുള്ള 42 കോടി രൂപ പണമായാണ് നല്കിയത്.
മഹാദേവ് ഓണ്ലൈന് വാതുവയ്പ് ആപ്പിനെതിരായ അന്വേഷണവുമായി ബന്ധപ്പെട്ട് വെള്ളിയാഴ്ച കൊല്ക്കത്ത, ഭോപ്പാല്, മുംബൈ തുടങ്ങി രാജ്യത്തിന്റെ വിവിധ ഭാഗങ്ങളിലായി 39 സ്ഥലങ്ങളില് നടത്തിയ പരിശോധനയില് 417 കോടി രൂപയുടെ സ്വത്തുക്കള് ഇ.ഡി കണ്ടുകെട്ടുകയോ മരവിപ്പിക്കുകയോ ചെയ്തിരുന്നു. കേസുമായി ബന്ധപ്പെട്ട് ഇതുവരെ നാലുപേരാണ് അറസ്റ്റിലായത്. എഎസ്ഐ ചന്ദ്രഭൂഷണ് വര്മ, ഹവാല ഇടപാടുകാരായ റായ്പുര് സ്വദേശികളായ സതീഷ് ചന്ദ്രകര്, അനില് ദമ്മാനി, സുനില് ദമ്മാനി എന്നിവരെയാണ് പിടികൂടിയത്.
https://www.facebook.com/Malayalivartha
