'നയന്‍താര: ബിയോണ്ട് ദി ഫെയറിടെയില്‍' എന്ന ഡോക്യുമെന്ററിയുടെ പകര്‍പ്പവകാശ ക്ലെയിമുകള്‍ തള്ളിക്കളയാനുള്ള നെറ്റ്ഫ്‌ലിക്‌സിന്റെ അപേക്ഷ മദ്രാസ് ഹൈക്കോടതി തള്ളി. നടി നയന്‍താരയുടെ വിവാഹം വിവരിക്കുന്ന ഡോക്യുമെന്ററി നവംബര്‍ 18 ന് നെറ്റ്ഫ്‌ലിക്സിന്റെ OTT പ്ലാറ്റ്ഫോമില്‍ റിലീസ് ചെയ്തിരുന്നു. ഇതിന് പിന്നാലെയാണ് ധനുഷ് പകര്‍പ്പവകാശ നിയമലംഘനം ചൂണ്ടിക്കാട്ടി രംഗത്തെത്തിയത്.

'നാനും റൗഡി ധാന്‍' എന്ന സിനിമ നിര്‍മ്മിച്ച ധനുഷിന്റെ വണ്ടര്‍ബാര്‍ പ്രൊഡക്ഷന്‍സ് തങ്ങളുടെ സിനിമയിലെ തിരശ്ശീലയ്ക്ക് പിന്നിലെ ദൃശ്യങ്ങള്‍ അനുമതിയില്ലാതെ ഡോക്യുമെന്ററിയില്‍ ഉപയോഗിച്ചുവെന്ന് കാട്ടി കേസ് ഫയല്‍ ചെയ്തു. ദൃശ്യങ്ങള്‍ തെറ്റായി ഉപയോഗിച്ചെന്ന് ചൂണ്ടിക്കാട്ടി 10 കോടി രൂപ നഷ്ടപരിഹാരം നല്‍കണമെന്ന് അവര്‍ ആവശ്യപ്പെട്ടു.

നെറ്റ്ഫ്‌ലിക്സിന്റെ ഹര്‍ജി ജഡ്ജി അബ്ദുള്‍ കുത്തൂസ് തള്ളി. വണ്ടര്‍ബാര്‍ പ്രൊഡക്ഷന്‍സ് ഫയല്‍ ചെയ്ത പ്രധാന പകര്‍പ്പവകാശ കേസ് ഇപ്പോള്‍ ഫെബ്രുവരി 5 ന് പരിഗണിക്കുമെന്ന് ലൈവ് ലോ റിപ്പോര്‍ട്ട് ചെയ്തു.
വണ്ടര്‍ബാറിന്റെ രജിസ്ട്രേഡ് ഓഫീസ് ചെന്നൈയിലല്ല, കാഞ്ചീപുരം ജില്ലയിലായതിനാല്‍ ഈ കേസില്‍ മദ്രാസ് ഹൈക്കോടതിക്ക് അധികാരമില്ലെന്ന് പറഞ്ഞു വണ്ടര്‍ബാറിന്റെ ഹര്‍ജി തള്ളണമെന്ന് നെറ്റ്ഫ്‌ലിക്സിന്റെ ലോസ് ഗാറ്റോസിന് വേണ്ടി ഹാജരായ മുതിര്‍ന്ന അഭിഭാഷകന്‍ ആര്‍ പാര്‍ത്ഥസാരഥി കോടതിയോട് ആവശ്യപ്പെട്ടിരുന്നു.

വണ്ടര്‍ബാര്‍ ഫിലിംസുമായി നയന്‍താര 2015ല്‍ പുറത്തിറങ്ങിയ ചിത്രത്തിന് കരാര്‍ ഒപ്പിട്ട സമയത്ത്, അവര്‍ക്കും വണ്ടര്‍ബാറിനും ചെന്നൈയില്‍ രജിസ്ട്രേഡ് ഓഫീസുകള്‍ ഉണ്ടായിരുന്നുവെന്ന് വണ്ടര്‍ബാര്‍ ഫിലിംസിന് വേണ്ടി ഹാജരായ അഡ്വക്കേറ്റ് ജനറല്‍ പി എസ് രാമന്‍ കോടതിയെ അറിയിച്ചു.

ചിത്രത്തിന്റെ ഒരു ഭാഗവും ചെന്നൈയില്‍ ചിത്രീകരിച്ചു, ചെന്നൈ ഉള്‍പ്പെടെ ഇന്ത്യയിലുടനീളം കാണുന്നതിനായി നെറ്റ്ഫ്‌ലിക്‌സ് ഡോക്യുമെന്ററി പുറത്തിറക്കി. അതിനാല്‍, മദ്രാസ് ഹൈക്കോടതിയില്‍ കേസ് ഫയല്‍ ചെയ്യാന്‍ വണ്ടര്‍ബാറിന് എല്ലാ അവകാശമുണ്ടെന്നും അദ്ദേഹം പറഞ്ഞു.