അല്ലുവിന്റെ ആഡംബര തിയറ്ററില്‍ ലിജോ ജോസ് പെല്ലിശ്ശേരിയുടെ ചിത്രവും
തെലുങ്ക് താരം അല്ലു അര്‍ജുന്‍ ഹൈദരാബാദില്‍ അത്യാധുനിക സൗകര്യങ്ങളോടെ നിര്‍മ്മിച്ച 'അല്ലു സിനിമാസ്' എന്ന തിയറ്റര്‍ സമുച്ചയം കഴിഞ്ഞ ദിവസമാണ് ഉദ്ഘാടനം ചെയ്തത്. ഇന്ത്യയിലെ തന്നെ ഏറ്റവും വലിയ ഡോള്‍ബി സിനിമാ സ്‌ക്രീന്‍ ഉള്‍പ്പെടെയുള്ള വിസ്മയങ്ങളാണ് ഈ തിയറ്ററില്‍ ഒരുക്കിയിരിക്കുന്നത്. എന്നാല്‍, സിനിമയെക്കാള്‍ ഉപരിയായി ഇപ്പോള്‍ സോഷ്യല്‍ മീഡിയയില്‍ ചര്‍ച്ചയാകുന്നത് തിയറ്ററിന്റെ ചുവരുകളില്‍ പതിപ്പിച്ചിട്ടുള്ള സംവിധായകരുടെ ചിത്രങ്ങളാണ്.
തിയറ്റര്‍ ഹാളിലെ ചുവരില്‍ ലോകപ്രശസ്തരായ ഹോളിവുഡ് സംവിധായകര്‍ക്കൊപ്പം ഇന്ത്യന്‍ സിനിമയിലെ പ്രമുഖരുടെ ചിത്രങ്ങളും ഇടംപിടിച്ചിട്ടുണ്ട്. ഇതില്‍ മലയാള സിനിമയെ പ്രതിനിധീകരിച്ച് ലിജോ ജോസ് പെല്ലിശ്ശേരിയുടെ ചിത്രം മാത്രമാണ് ഉള്‍പ്പെടുത്തിയിരിക്കുന്നത് എന്നത് ശ്രദ്ധേയമാണ്. ഓരോ സിനിമയിലും വേറിട്ട ദൃശ്യാനുഭവങ്ങള്‍ സമ്മാനിക്കുന്ന എല്‍.ജെ.പിയുടെ സാന്നിധ്യം മലയാളി സിനിമാ പ്രേമികള്‍ക്കിടയില്‍ വലിയ ആവേശമാണ് ഉണ്ടാക്കിയിരിക്കുന്നത്. മണിരത്‌നം, രാജ്കുമാര്‍ ഹിരാനി, വെട്രിമാരന്‍, പ്രശാന്ത് നീല്‍, ഋഷബ് ഷെട്ടി തുടങ്ങിയവരുടെ ചിത്രങ്ങളും ഈ നിരയിലുണ്ട്. അല്ലു സിനിമാസിലെ ചുവരുകള്‍ ഇന്ത്യന്‍ സിനിമയുടെ ഒരു 'മാപ്പ്' പോലെയാണ് തോന്നിപ്പിക്കുന്നത് എന്നാണ് ആരാധകര്‍ അഭിപ്രായപ്പെടുന്നത്. മണിരത്‌നവും വെട്രിമാരനും ഹിരാനിയും പ്രശാന്ത് നീലുമൊക്കെ ഒരേ നിരയില്‍ നില്‍ക്കുമ്പോള്‍, അത് ഇന്ത്യന്‍ സിനിമയുടെ വൈവിധ്യത്തെയാണ് അടയാളപ്പെടുത്തുന്നത്. പ്രത്യേകിച്ച് മലയാളത്തില്‍ നിന്ന് ലിജോ ജോസ് പെല്ലിശ്ശേരിയെ മാത്രം തിരഞ്ഞെടുത്തത് അല്ലു അര്‍ജുന്റെയും ടീമിന്റെയും സിനിമാ കാഴ്ചപ്പാട് വ്യക്തമാക്കുന്നുണ്ട്. കേവലം ബോക്‌സ് ഓഫിസ് വിജയങ്ങള്‍ക്കപ്പുറം സിനിമ എന്ന കലാരൂപത്തില്‍ പരീക്ഷണങ്ങള്‍ നടത്തുന്ന 'മേക്കിങ് സ്‌റ്റൈലിനോടുള്ള' താല്പര്യമാകാം എല്‍ജെപിയെ അവിടെ എത്തിച്ചത്. എന്നാല്‍ സംവിധായകരുടെ ചിത്രങ്ങള്‍ തിരഞ്ഞെടുക്കുന്നതില്‍ അല്ലു അര്‍ജുന്റെ ടീം കാണിച്ച വിവേചനത്തിനെതിരെ സോഷ്യല്‍ മീഡിയയില്‍ വിമര്‍ശനങ്ങളും ഉയരുന്നുണ്ട്.
തമിഴിലെ ബ്രഹ്മാണ്ഡ സംവിധായകന്‍ ഷങ്കറിനെ ഒഴിവാക്കി അറ്റ്‌ലീയെ ഉള്‍പ്പെടുത്തിയത് പലരെയും ചൊടിപ്പിച്ചിട്ടുണ്ട്. കന്നഡ സിനിമയില്‍ വിപ്ലവം സൃഷ്ടിച്ച ഉപേന്ദ്രയെ ഒഴിവാക്കി ഋഷബ് ഷെട്ടിക്ക് ഇടം നല്‍കിയതും തെലുങ്ക് സിനിമയുടെ ഗതി മാറ്റിയ റാം ഗോപാല്‍ വര്‍മയെ തഴഞ്ഞതും വലിയ ചര്‍ച്ചകള്‍ക്ക് വഴിവെച്ചു. പ്രമുഖ സംവിധായകര്‍ക്ക് ആദരമര്‍പ്പിക്കുക എന്ന ലക്ഷ്യത്തോടെയാണ് ഈ നീക്കമെങ്കിലും ലിസ്റ്റ് അപൂര്‍ണമാണെന്നാണ് ആരാധകരുടെ പക്ഷം. പിതാവ് അല്ലു അരവിന്ദിനൊപ്പമാണ് അല്ലു അര്‍ജുന്‍ ഉദ്ഘാടന ചടങ്ങില്‍ പങ്കെടുത്തത്. ഗീതാ ആര്‍ട്‌സ് എന്ന പ്രൊഡക്ഷന്‍ ഹൗസിന് പിന്നാലെ ഏഷ്യയിലെ തന്നെ കരുത്തുറ്റ സിനിമാ സംരംഭമായി 'അല്ലു സിനിമാസിനെ' മാറ്റാനാണ് ഇവരുടെ ലക്ഷ്യം. 'അല്ലു' എന്ന ബ്രാന്‍ഡിനെ ആഗോളതലത്തില്‍ എത്തിക്കുന്നതിന്റെ ഭാഗമാണ് ഇത്തരം സംരംഭങ്ങളെന്ന് ഉദ്ഘാടന വേളയില്‍ അല്ലു അര്‍ജുന്‍ വ്യക്തമാക്കി. ഉദ്ഘാടന ദിവസം 'വാരണസി', 'രാമായണ' എന്നീ വരാനിരിക്കുന്ന ചിത്രങ്ങളുടെ ടീസറുകളും വലിയ സ്‌ക്രീനില്‍ പ്രദര്‍ശിപ്പിച്ചിരുന്നു.
https://www.facebook.com/Malayalivartha
