സംസ്ഥാനത്തെ ഹയർ സെക്കൻഡറി സ്കൂളുകളിലെ പ്ലസ് വൺ പ്രവേശനത്തിനുള്ള മുഖ്യഘട്ടത്തിലെ ട്രയൽ അലോട്ട്മെന്റ് പ്രസിദ്ധീകരിച്ചു. പൊതുവിദ്യാഭ്യാസ വകുപ്പിന്റെ ഏകജാലക പ്രവേശന പോർട്ടലായ 'HSCAP' വഴി തിങ്കളാഴ്ച രാവിലെ 10 മണി മുതൽ ഫലം ലഭ്യമായിരിക്കും

മെറിറ്റ് ക്വാട്ടയ്ക്ക് പുറമെ മോഡൽ റസിഡൻഷ്യൽ സ്കൂളുകളിലേക്കുള്ള ട്രയൽ അലോട്ട്മെന്റും ഇതിനൊപ്പം പ്രസിദ്ധീകരിച്ചു.

വിദ്യാർത്ഥികൾക്ക് തങ്ങളുടെ അപേക്ഷയുടെ നിലവിലെ അവസ്ഥ പരിശോധിക്കാനും തെറ്റുകൾ തിരുത്താനുമുള്ള അവസാന അവസരമാണിത്.
ലഭിച്ച വിവരങ്ങളിൽ എന്തെങ്കിലും തരത്തിലുള്ള തിരുത്തലുകളോ മാറ്റങ്ങളോ വരുത്താനുണ്ടെങ്കിൽ ജൂൺ 10-ന് വൈകുന്നേരം 5 മണി വരെ സമയം അനുവദിച്ചിരിക്കുകയാണ്. ട്രയൽ അലോട്ട്മെന്റ് പരിശോധിക്കുമ്പോൾ അപേക്ഷകർ തങ്ങളുടെ ഫലം കൃത്യമായി വിലയിരുത്തേണ്ടതാണ്.

അപേക്ഷയിൽ തെറ്റായ വിവരങ്ങൾ ഉൾപ്പെട്ടിട്ടുണ്ടെങ്കിൽ അത് ഉടനടി തിരുത്തേണ്ടതാണ്. തെറ്റായ വിവരങ്ങൾ നൽകി അലോട്ട്മെന്റ് നേടിയതായി ശ്രദ്ധയിൽപ്പെട്ടാൽ പ്രസ്തുത അലോട്ട്മെന്റ് റദ്ദാക്കുമെന്ന് അധികൃതർ കർശന നിർദ്ദേശം നൽകി.
‌‌
സ്വയം വിവരങ്ങൾ പരിശോധിക്കാനായി ബുദ്ധിമുട്ടുള്ള വിദ്യാർത്ഥികൾക്ക് തൊട്ടടുത്തുള്ള സർക്കാർ/എയ്ഡഡ് ഹയർ സെക്കൻഡറി സ്കൂളുകളിലെ ഹെൽപ്പ് ഡെസ്കുകളുടെ സാങ്കേതിക സഹായം തേടാവുന്നതാണ്. വിദ്യാർത്ഥികൾ hscap.kerala.gov.in എന്ന ഔദ്യോഗിക വെബ്സൈറ്റ് സന്ദർശിക്കുക.

വെബ്സൈറ്റിലെ 'Candidate Login' ലിങ്ക് വഴി യൂസർ നെയിമും പാസ്‌വേഡും നൽകി ലോഗിൻ ചെയ്യുക. ലോഗിൻ ചെയ്ത ശേഷം 'Trial Results' എന്ന ലിങ്കിൽ ക്ലിക്ക് ചെയ്ത് അലോട്ട്മെന്റ് നില പരിശോധിക്കാവുന്നതാണ്.

മോഡൽ റസിഡൻഷ്യൽ സ്കൂളുകളിലേക്ക് അപേക്ഷിച്ചവർ 'Candidate Login-MRS' വഴി വേണം ഫലം പരിശോധിക്കാൻ. അപേക്ഷയിൽ മാറ്റങ്ങൾ വരുത്താൻ ആഗ്രഹിക്കുന്നവർക്ക് ലോഗിൻ ചെയ്ത ശേഷം 'Edit Application' ലിങ്ക് വഴി ജൂൺ 10-നകം തിരുത്തലുകൾ വരുത്തുകയോ ഓപ്ഷനുകളുടെ മുൻഗണനാ ക്രമം മാറ്റുകയോ ചെയ്യാവുന്നതാണ്.

ഈ തിരുത്തലുകൾക്ക് ശേഷമുള്ള ആദ്യ ഔദ്യോഗിക അലോട്ട്മെന്റ് ജൂൺ 15-ന് പ്രസിദ്ധീകരിക്കും. മുഖ്യഘട്ട അലോട്ട്മെന്റുകൾ ജൂലൈ 1-ഓടെ പൂർത്തിയാക്കി ജൂലൈ രണ്ടാം വാരത്തോടെ ക്ലാസുകൾ ആരംഭിക്കാനാണ് ലക്ഷ്യം.