30 വര്ഷത്തെ നിയമപോരാട്ടം: നടി സുകന്യ നല്കിയ മാനനഷ്ട കേസില് അനുകൂല വിധി
30 വര്ഷത്തെ നിയമപോരാട്ടത്തിനൊടുവില് നടി സുകന്യ നല്കിയ മാനനഷ്ട കേസില് പത്ത് ലക്ഷം രൂപ നഷ്ടപരിഹാരം നല്കാന് സണ് ടിവി നെറ്റ്വര്ക്കിനോട് ഉത്തരവിട്ട് മദ്രാസ് ഹൈക്കോടതി. 30 വര്ഷം മുമ്പ് സംപ്രേഷണം ചെയ്ത അഭിമുഖവുമായി ബന്ധപ്പെട്ട കേസിലാണ് നിര്ദേശം. 1996ല് സണ് ടിവി സംപ്രേഷണം ചെയ്ത വീരപ്പന്റെ അഭിമുഖത്തില് സുകന്യയ്ക്കെതിരെ അധിക്ഷേപകരമായ പരാമര്ശം നടത്തിയിരുന്നു.
നക്കീരന് ഗോപാല് വീരപ്പനുമായി നടത്തിയ അഭിമുഖത്തിലാണ് നടിയെക്കുറിച്ച് മോശമായ പരാമര്ശം നടത്തിയത്. ഒരു രാഷ്ട്രീയ നേതാവിന്റെ ബന്ധുവിനെ സുകന്യയുമായി ബന്ധപ്പെടുത്തിയായിരുന്നു പരാമര്ശം. ഇത് എഡിറ്റ് ചെയ്ത് ഒഴിവാക്കാതെയാണ് സണ് ടിവി അഭിമുഖം സംപ്രേഷണം ചെയ്തത്. പിന്നാലെ അഭിമുഖത്തിലെ പരാമര്ശം തനിക്ക് മാനഹാനി വരുത്തിയെന്ന് ആരോപിച്ച് നടി സിവില് കോടതിയെ സമീപിച്ചു. 10,00,500 രൂപ നഷ്ടപരിഹാരം ആവശ്യപ്പെട്ടായിരുന്നു ഹര്ജി. സണ് ടിവി, ഗോപാല്, വീരപ്പന് എന്നിവരായിരുന്നു എതിര്കക്ഷികള്.
അഭിമുഖത്തിലെ അഭിപ്രായങ്ങള് വീരപ്പന്റേത് മാത്രമാണെന്നും തങ്ങള്ക്ക് അതില് ഉത്തരവാദിത്തമില്ലെന്നും പ്രക്ഷേപണത്തിന് മുമ്പ് വിശദീകരിച്ചിരുന്നതായി സണ് ടിവി കോടതിയില് അവകാശപ്പെട്ടു. പരാമര്ശം ശ്രദ്ധയില്പ്പെട്ടയുടന് ഖേദം പ്രകടിപ്പിച്ചെന്നും അഭിമുഖം പുനഃസംപ്രേഷണം ചെയ്തിട്ടില്ലെന്നും സണ് ടിവി വാദിച്ചു. സുകന്യയെ അപമാനിക്കാന് ഉദ്ദേശിച്ചിരുന്നില്ലെന്ന് ഗോപാലും കോടതിയെ അറിയിച്ചു. എന്നാല്, ഇരുവരുടെയും വാദങ്ങള് കോടതി തള്ളി.
കരാര് പ്രകാരം സണ് ടിവിക്കായിരുന്നു എഡിറ്റ് ചെയ്യാനുള്ള അവകാശം. സണ് ടിവിക്ക് അപകീര്ത്തികരമായ ഉള്ളടക്കത്തെക്കുറിച്ച് അറിവുണ്ടായിരുന്നുവെന്നും കമ്പനിയുടെ ചെയ്തി ദുരുദ്ദേശപരമാണെന്നും കോടതി നിരീക്ഷിച്ചു. കരാര്പ്രകാരം അഭിമുഖം എഡിറ്റ് ചെയ്യാനുള്ള അവകാശം സണ് ടിവിക്ക് ഉണ്ടായിരുന്നുവെന്നും കോടതി ചൂണ്ടിക്കാട്ടി. ഉത്തരവിനെതിരെ സണ് ടിവി ഹൈക്കോടതിയെ സമീപിച്ചു. കീഴ്കോടതിയുടെ ഉത്തരവ് ശരിവച്ചാണ് ഹൈക്കോടതി ഇപ്പോള് പത്ത് ലക്ഷം രൂപ നഷ്ടപരിഹാരം നല്കാന് നിര്ദേശിച്ചത്.
https://www.facebook.com/Malayalivartha
