പരസ്പര സമ്മതത്തോടെയുള്ള അവിവാഹിതരായ രണ്ടുപേര്ക്കിടയിലെ ശാരീരിക ബന്ധം; മോശം ധാര്മിക സ്വഭാവത്തിന്റെ പ്രതിഫലനമായി കണക്കാക്കാനാവില്ലെന്ന് സുപ്രീംകോടതി
അവിവാഹിതരായ പ്രായപൂര്ത്തിയായവര് തമ്മില് ഉഭയസമ്മതത്തോടെയുള്ള ലൈംഗികബന്ധം മോശം ധാര്മിക സ്വഭാവത്തിന്റെ പ്രതിഫലനമായി കണക്കാക്കാനാവില്ലെന്ന് സുപ്രീംകോടതി. ജസ്റ്റിസുമാരായ മന്മോഹന്, മനോജ് മിശ്ര എന്നിവരടങ്ങിയ ബെഞ്ചാണ് ഗജുല തിരുപ്പതി എന്ന വ്യക്തി നല്കിയ അപ്പീലില് വിധി പ്രസ്താവിച്ചത്. ഇദ്ദേഹത്തിന്റെ പൊലീസ് കോണ്സ്റ്റബിള് നിയമനം റദ്ദാക്കിയതിനെതിരെ നല്കിയ ഹര്ജി പരിഗണിക്കുകയായിരുന്നു കോടതി.
പ്രണയബന്ധം തകര്ന്നതുമായി ബന്ധപ്പെട്ടുണ്ടായ ക്രിമിനല് കേസില് കുറ്റാരോപിതനായ ഇയാളുടെ നിയമനം റദ്ദാക്കുകയായിരുന്നു. വിവാഹവാഗ്ദാനം നല്കി പീഡിപ്പിച്ചുവെന്ന കേസിനെ തുടര്ന്നാണ് യുവാവിന് ജോലിയില് പ്രവേശിക്കാന് കഴിയാതിരുന്നത്. പൊലീസ് കോണ്സ്റ്റബിളായി തിരഞ്ഞെടുക്കപ്പെട്ട ഉദ്യോഗാര്ത്ഥിക്ക് നിയമനം നല്കാന് സുപ്രീം കോടതി തെലങ്കാന സംസ്ഥാന പൊലീസ് റിക്രൂട്ട്മെന്റ് ബോര്ഡിനോട് നിര്ദേശിച്ചു, പരസ്പര സമ്മതത്തോടെയുള്ള അവിവാഹിതരായ രണ്ടുപേര്ക്കിടയിലെ ശാരീരിക ബന്ധം നിയമവിരുദ്ധമാക്കുന്ന നിയമം നിലവിലില്ലെന്നും ബെഞ്ച് വ്യക്തമാക്കി.
2014ല് രജിസ്റ്റര് ചെയ്ത കേസിലാണ് കോടതിയുടെ നിരീക്ഷണം. എന്നാല് കേസ് പിന്നീട് 2015ല് ഇരുപക്ഷവും തമ്മിലുള്ള ഒത്തുതീര്പ്പിനെ തുടര്ന്ന് അദാലത്തില് തീര്പ്പാക്കിയിരുന്നു. ഹര്ജിക്കാരനും പരാതിക്കാരിയും അയല്വാസികളാണ്. നാല് വര്ഷത്തോളം ഇരുവരും തമ്മില് പ്രണയത്തിലായിരുന്നു. എന്നാല് വിവാഹം കഴിക്കാന് സാധിച്ചിരുന്നില്ല. വിവാഹം കഴിക്കാനായില്ലെങ്കില് അത് വഞ്ചനയായി കണക്കാക്കാനാകില്ലെന്ന് കോടതി പറഞ്ഞു.
https://www.facebook.com/Malayalivartha
