ജഗതിച്ചേട്ടന്‍ ഇവിടെയുണ്ട്; പാടാന്‍ കഴിയില്ല എങ്കിലും...
നാല് വര്‍ഷം മുമ്പൊരു അപകടം കവര്‍ന്നെടുത്ത ഒരു മഹാനടന്റെ കലാ വൈഭവം വീണ്ടും പുറത്തെടുക്കാനുള്ള ശ്രമത്തിലാണ് വീട്ടുകാര്‍.
പഴയതുപോലെ ഓണമാഘോഷിക്കാന്‍ തയാറെടുക്കുകയാണ് ഞങ്ങള്‍. പപ്പ സിനിമയില്‍ സജീവമായിരുന്നപ്പോള്‍ ഉത്സവമായിരുന്നു ഓണനാളുകള്‍. അപകടത്തിന് ശേഷം ആഘോഷമില്ലാതായി. ഇപ്പോള്‍ പപ്പയുടെ ആരോഗ്യസ്ഥിതിയില്‍ വളരെ പുരോഗതിയുണ്ട്. ഓര്‍മ ഏറെക്കുറെ തിരികെ കിട്ടി. കാര്യങ്ങള്‍ മനസ്സിലാക്കുന്നുണ്ട്. ചെറിയ ചെറിയ വാക്കുകള്‍ സംസാരിക്കുന്നു, പാട്ടുകേട്ട് ഒപ്പം പാടാന്‍ ശ്രമിക്കുന്നു.
പപ്പയുടെ ചെറുവിരലനക്കത്തില്‍ പോലും സന്തോഷിക്കുന്ന ഞങ്ങള്‍ക്ക് ആഘോഷിക്കാന്‍ കാരണങ്ങളേറെ. ഒന്നും സംഭവിച്ചിട്ടില്ല, എല്ലാം പഴയതുപോലെ എന്ന് പപ്പക്ക് തോന്നണം. പപ്പ അതാഗ്രഹിക്കുന്നുമുണ്ട്... ഷൂട്ടിങ് സെറ്റുകളില്‍ നിന്ന് സെറ്റുകളിലേക്ക് പാഞ്ഞിരുന്ന ജഗതിയുടെ ഉത്രാടപ്പാച്ചില്‍ എന്നും വീട്ടിലേക്കായിരുന്നു. എന്ത് തിരക്കിലും എവിടെയായിരുന്നാലും ഓണത്തലേന്ന് വീട്ടിലത്തെും. ജഗതി എത്തിക്കഴിഞ്ഞാല്‍ ഭാര്യ ശോഭ അടുക്കളയില്‍ നിന്ന് ഔട്ട്. സദ്യയൊരുക്കുന്ന റോളില്‍ പിന്നെ തകര്‍ത്തഭിനയിക്കുന്നത് ജഗതിയാണ്. ഇലയിട്ട് പപ്പ വിളമ്പിത്തരുന്ന നാടന്‍ സദ്യക്ക് അമ്മയുണ്ടാക്കുന്നതിനേക്കാള്‍ സ്വാദെന്ന് മക്കള്‍ പറയുന്നു.
കുടുംബത്തിനായി മാത്രമുള്ളതാണ് ഓണനാളുകള്‍. പപ്പു, മാള, ജഗതി എന്ന സിനിമയുടെ ഷൂട്ടിങ് നടക്കുമ്പോള്‍ പപ്പുവും മാളയും ഓണമുണ്ണാന്‍ തറവാട്ടിലത്തെിയ ഓര്‍മയുണ്ട് മകന്‍ രാജ്കുമാറിന്. ജഗതി മുഴുവന്‍ സമയവും കൂടെയുണ്ടെന്ന സന്തോഷവും പഴയതുപോലെ അല്ലല്ലോയെന്ന സങ്കടവും ചേര്‍ന്ന സമ്മിശ്ര വികാരമാണ് അവര്‍ക്കിപ്പോഴും.
ഡോക്ടര്‍മാരുടെ നിര്‍ദേശപ്രകാരം ഇടക്കിടെ ഇന്‍ഡോര്‍ ഷൂട്ടിങ് ലൊക്കേഷനുകളില്‍ കൊണ്ടുപോകും. രണ്ടുമണിക്കൂര്‍ വരെ അവിടെ ചെലവഴിക്കും. അടുത്തിടെ ഒരു ചാനലിന്റെ കോമഡി റിയാലിറ്റി ഷോയുടെ അഞ്ഞൂറാം എപ്പിസോഡ് ആഘോഷം ജഗതിയെ മുഖ്യാതിഥിയാക്കി പേയാടുള്ള വീട്ടില്‍ ആണ് ചിത്രീകരിച്ചത്. ചിത്രീകരണ സന്നാഹങ്ങള്‍ എത്തിയപ്പോള്‍ മുതല്‍ സന്തോഷവാനായ ജഗതി വളരെ സജീവമായി ആഘോഷത്തില്‍ പങ്കെടുത്തു. സാധ്യമാകുമ്പോളൊക്കെ കലാകാരന്മാരെ വിളിപ്പിച്ച് വീട്ടില്‍ മിമിക്രിയോ ഗാനമേളയോ മറ്റ് കലാരൂപങ്ങളോ ജഗതിക്കുവേണ്ടി അവതരിപ്പിക്കാറുമുണ്ട്. എപ്പോഴും പാട്ട് കേള്‍ക്കാന്‍ ഇഷ്ടപ്പെട്ടിരുന്ന ജഗതിക്ക് സംഗീത ചികിത്സയും ഏറെ ഗുണം ചെയ്യുന്നുണ്ട്. ഉണ്ണുമ്പോഴും കുളിക്കുമ്പോഴും ഉറങ്ങുമ്പോഴും വരെ പാട്ട് കേള്‍ക്കാന്‍ ഇഷ്ടപ്പെട്ടിരുന്ന ആളാണ് ജഗതി.
https://www.facebook.com/Malayalivartha
