നിയമസഭാ തെരഞ്ഞെടുപ്പു വേളയില്‍ പത്തനാപുരത്തെ ഇടതുമുന്നണി സ്ഥാനാര്‍ത്ഥിയായിരുന്ന ഗണേഷ് കുമാറിനുവേണ്ടി മോഹന്‍ലാല്‍ പ്രചരണത്തിനെത്തിയത് വലിയ വിവാദമായിരുന്നു. സിനിമാ താരങ്ങളുടെ ത്രികോണ മത്സരത്തിനു വേദിയായ പത്തനാപുരത്ത് ഒരു താരത്തിനുവേണ്ടി മാത്രം മോഹന്‍ലാല്‍ പ്രചരണത്തിനെത്തിയ നടപടിയായിരുന്നു വിവാദമായത്.

ഇതുസംബന്ധിച്ച വിവാദങ്ങള്‍ക്ക് മറുപടിയുമായി രംഗത്തെത്തിയിരിക്കുകയാണ് മോഹന്‍ലാല്‍. രാഷ്ട്രീയമല്ല, സ്വന്തം ഇഷ്ടമാണ് ഗണേഷിന്റെ പ്രചാരണത്തിനെത്തിച്ചതെന്നാണ് മോഹന്‍ലാല്‍ പറയുന്നത്. തന്നെ ക്ഷണിച്ചതുകൊണ്ടാണ് പോയത്, ജഗദീഷ് പ്രചരണത്തിനായി ക്ഷണിച്ചിരുന്നില്ലെന്നും മോഹന്‍ലാല്‍ വ്യക്തമാക്കി.

മനോരമ ന്യൂസിലെ നേരെ ചൊവ്വെ പരിപാടിയില്‍ ഇതുസംബന്ധിച്ച ചോദ്യങ്ങള്‍ക്കു മറുപടി പറയുകയായിരുന്നു മോഹന്‍ലാല്‍.
'അദ്ദേഹം എന്നെ വിളിച്ചു വിളച്ചതുകൊണ്ടാണ് ഞാന്‍ പോയത്. ജഗദീഷ് എന്നെ വിളിച്ചിട്ടില്ല.അല്ലെങ്കിലും ഒരു സ്ഥലത്ത് പോയാല്‍ മറ്റേ സ്ഥലത്ത് പോകണമെന്നൊക്കെ റൂളൊന്നുമില്ല. ഇത് എന്റെ ഇഷ്ടമാണ്.' മോഹന്‍ലാല്‍ പറയുന്നു.

താനൊരു രാഷ്ട്രീയ കക്ഷിയുടെയും ആളല്ലെന്നും ഒരു അനിയന്‍ എന്ന നിലയിലാണ് ഗണേഷിനുവേണ്ടി പ്രചരണത്തിനിറങ്ങിയതെന്നും മോഹന്‍ലാല്‍ വ്യക്തമാക്കി. 'ഞാനൊരു കക്ഷിരാഷ്ട്രീയത്തിലും ഉള്ള ആളല്ല. എന്റെ ഒരു അനിയന്‍ എന്നുള്ള നിലയിലാണ് പോയത്. ജഗദീഷെന്റെ അനിയനല്ല, എന്റെ ചേട്ടന്റെ കൂടെ പഠിച്ചയാളാണ്.' മോഹന്‍ലാല്‍ വ്യക്തമാക്കി.