ബോളീവുഡില്‍ തന്റേതായ സ്ഥാനം ഉണ്ടാക്കിയിരിക്കുന്ന താരമാണ് സണ്ണി ലിയോണ്‍. സണ്ണിലിയോണിന്റെ ജീവിത കഥയെ ആസ്പദമാക്കി തയാറാക്കപ്പെട്ട മോസ്റ്റ്‌ലി സണ്ണിയെന്ന ഡോക്യുമെന്ററിക്കെതിരേ താരം തന്നെ രംഗത്ത്. തന്റെ ജീവിതത്തോട് നീതി പുലര്‍ത്താത്ത ഡോക്യുമെന്ററി ഇന്ത്യയില്‍ പ്രദര്‍ശിപ്പിക്കുന്നതില്‍ നിന്ന് ഒഴിവാക്കണമെന്നാണ് സണ്ണി ലിയോണ്‍ ആവശ്യപ്പെടുന്നത്.

മറ്റൊരാളുടെ കണ്ണിലൂടെ തന്നെ ചിത്രീകരിക്കുമ്പോഴുള്ള പ്രശ്‌നങ്ങളാണ് ഡോക്യുമെന്ററിക്കുള്ളത്. മറ്റാരും തന്റെ കഥ പറഞ്ഞാല്‍ ശരിയാകില്ലെന്നും താരം പറയുന്നു. ഡോക്യുമെന്ററി എല്ലാ പ്രായക്കാര്‍ക്കും കാണാനാകുന്ന തരത്തിലല്ല തയാറാക്കപ്പെട്ടിട്ടുള്ളതെന്നും സണ്ണി ലിയോണ്‍ പറയുന്നു. ചിത്രത്തിലെ ചില രംഗങ്ങള്‍ നീക്കണമെന്ന് സണ്ണി ലിയോണ്‍ ആവശ്യപ്പെട്ടിട്ടുള്ളതായി സംവിധായകന്‍ ദീപക് മേത്ത പറയുന്നു.

കരണ്‍ജിത് കൗര്‍ വോറാ എന്ന പഞ്ചാബി പെണ്‍കുട്ടി. യാഥാസ്ഥിതിക സിക്ക് കുടുംബം വിട്ട് ലോസ് ആഞ്‌ലസിലെത്തി പോണ്‍ താരമായ സണ്ണി ലിയോണ്‍ ആയതിനെ കുറിച്ചും ബോളിവുഡ് രംഗപ്രവേശത്തെ കുറിച്ചും ഡോക്യുമെന്ററിയില്‍ വിശദമായി പറയുന്നുണ്ട്. സണ്ണി ലിയോണിന്റെ ജീവിതത്തിലെ ഓരോ ഘട്ടങ്ങളെ കുറിച്ചും ഡോക്യുമെന്ററി ചര്‍ച്ച ചെയ്യുന്നുണ്ട്.ഈ വര്‍ഷം ഡിസംബറില്‍ മോസ്റ്റ്‌ലി സണ്ണിയുടെ വേള്‍ഡ് വൈഡ് റീലീസ് നടത്താനാണ് തീരുമാനം. അതിനു മുന്‍പ് ഒക്ടോബറില്‍ മുബൈ ഫിലീം ഫെസ്റ്റിവലിലും പ്രദര്‍ശിപ്പിക്കും.

ടൊറന്റോ ഇന്റര്‍നാഷണല്‍ ഫിലീം ഫെസ്റ്റിവലില്‍ 'മോസ്റ്റ്‌ലി സണ്ണി' പ്രദര്‍ശിപ്പിച്ചിരുന്നു. കുടുംബത്തോടും സുഹൃത്തുക്കളോടുമൊപ്പമിരുന്നാണ് ഡോക്യുമെന്ററി കാണുകയെന്നു സണ്ണി പറഞ്ഞിരുന്നു.