ശ്രീനിവാസന്‍ ജൈവ പച്ചക്കറി കൃഷിയുമായി ചുമ്മാതിറങ്ങിയതല്ല, പണ്ട് മുതലേ കൃഷി ശ്രീനിവാസന്റെ രക്തത്തിലുണ്ട്. വീട്ടില്‍ നല്ല പച്ചക്കറി കൃഷിയുണ്ടായിരുന്നു. അമ്മയും അച്ഛനും നല്ല പാചകക്കാരായിരുന്നു. അന്ന് നാട്ടിലുള്ള കല്യാണങ്ങള്‍ക്കൊക്കെ സദ്യ ഉണ്ടാക്കിയിരുന്നത് ശ്രീനിവാസന്റെ അച്ഛനായിരുന്നു.

എന്നും വീട്ടിലാളെത്തും അച്ഛനെ കൊണ്ട് പച്ചക്കറി വാങ്ങാനുള്ള ലിസ്റ്റ് എഴുതിക്കാനായി. ചിലപ്പോള്‍ ആത്യാവശ്യത്തിനായി ചില പച്ചക്കറികള്‍ വീട്ടില്‍ നിന്ന് അച്ഛന്‍ പാചകത്തിന് കൊണ്ടുപോയിരുന്നു. അതിന് കാശൊന്നും വാങ്ങിയിരുന്നില്ല. വര്‍ഷങ്ങള്‍ക്ക് ശേഷം ശ്രീനിവാസന്‍ മദ്രാസില്‍ പോയി.

സിനിമ അഭിനയം പഠിക്കാനായിരുന്നില്ല, നാടകത്തോടായിരുന്നു താരത്തിന് അന്ന് കമ്പം. മദ്രാസില്‍ നിന്ന് അഭിനയം പഠിച്ച് നാട്ടില്‍ വന്ന് നാടകം അഭിനയിക്കണം. അതായിരുന്നു ലക്ഷ്യം. ശങ്കരന്‍കുട്ടി, മുരളി, പിന്നെ ഒരു കന്നടക്കാരനായ ശാന്തപ്പ എന്നിവരോടൊപ്പമാണ് ശ്രീനി താമസിച്ചിരുന്നത്. അന്ന് ഭക്ഷണം ഉണ്ടാക്കുന്നതിന്റെ ചുമതല ശ്രീനിവാസനായിരുന്നു.

രാവിലെ ഒമ്പത് മണിക്ക് വീട്ടില്‍ നിന്നിറങ്ങണം. അതിനാല്‍ വെളുപ്പിന് നാല് മണിക്ക് എണീറ്റ് ശ്രീനിവാസന്‍ പാചകം തുടങ്ങും. ഇന്നത്തെ പോലെ അന്ന് മഞ്ഞളും മുളക് പൊടിയുമൊന്നുമില്ല. എല്ലാം പൊടിച്ചായിരുന്നു പാചകം. മദ്രാസില്‍ വെച്ച് വാടിയ പച്ചക്കറികള്‍ വാങ്ങിയാണ് പാചകം ചെയ്തിരുന്നത്. അപ്പോഴൊക്കെ അച്ഛന്റെ പാചകവും വീട്ടിലെ പച്ചക്കറികളും ഓര്‍മവരും.

ശാന്തപ്പ പിന്നീട് സിനിമയിലേക്കൊന്നും വന്നില്ല. ഇപ്പോള്‍ കര്‍ണാടകത്തില്‍ അയാള്‍ക്ക് മൂന്ന് നഴ്‌സിംഗ് കോളജുണ്ട്. ശ്രീനിവാസന്‍ ഇടയ്ക്കിടെ ശാന്തപ്പയെ കാണും. അവസാനം ശാന്തപ്പയെ കണ്ടപ്പോള്‍ ശ്രീനിവാസനോട് ഒരു കാര്യം പറഞ്ഞു; അന്നത്തെ നിന്റെ കറികളുടെ രുചി ഒന്ന് വല്ലാത്തത് തന്നെയായിരുന്നു. അതിന്റെ രുചിയോര്‍ത്ത് വീട്ടില്‍ ഞാനൊരു മലയാളി കുക്കിനെ ഏര്‍പ്പെടുത്തി. അപ്പോഴാണ് ശ്രീനിവാസന്‍ അച്ഛന്റെയും അമ്മയുടെയും കൈപുണ്യം തനിക്കും ലഭിച്ചിട്ടുണ്ടെന്ന് മനസിലാക്കിയത്.