കോഴിക്കോട് അരക്കിണറിലെ മാമുക്കോയയുടെ വസതിയിലേക്കുള്ള വഴിയുടെ ഒരു ഭാഗം കൈയേറി അദ്ദേഹം കോണ്‍ക്രീറ്റ് ചെയ്തത് കോര്‍പ്പറേഷന്‍ അധികൃതര്‍ പൊളിച്ചുമാറ്റിയത് ഏറെ വിവാദമായിരുന്നു. തന്നെ കൈയേറ്റക്കാരനായി ചിത്രീകരിക്കാന്‍ കോര്‍പ്പറേഷനും റവന്യൂ അധികൃതരും ഉല്‍സാഹിക്കുകയാണെന്ന് പറഞ്ഞ്, മാദ്ധ്യമങ്ങളെ വിളിച്ചുവരുത്തി അദ്ദേഹം പറഞ്ഞു. എന്നാല്‍ മാമുക്കോയയുടേത് കൈയേറ്റം തന്നെയാണെന്ന് വ്യക്തമാക്കി മേയര്‍ തോട്ടത്തില്‍ രവീന്ദ്രന്‍ രംഗത്തത്തെിയതോടെ മാമുക്കോയ പ്രതിരോധത്തിലായി.

മാമുക്കോയയുടെ വീട്ടിലേക്കുള്ള വഴി നിര്‍മ്മിച്ചത് കോര്‍പറേഷന്റെ സ്ഥലം കൈയേറിയാണെന്ന നിലപാടില്‍ ഉറച്ചുനില്‍ക്കയാണ് കോര്‍പ്പറേഷന്‍ അധികൃതര്‍. മുന്നറിയിപ്പ് നല്‍കിയ ശേഷമാണ് കോണ്‍ക്രീറ്റ് ചെയ്ത വഴി പൊളിച്ചുമാറ്റിയതെന്ന് മേയര്‍ തോട്ടത്തില്‍ രവീന്ദ്രന്‍ അറിയിച്ചു. കൈയേറ്റം ഒഴിപ്പിക്കുന്ന കാര്യം എല്ലാവരെയും നേരത്തേ അറിയിച്ചിരുന്നുവെന്നും എന്നാല്‍, ഓരോരുത്തര്‍ക്കും പ്രത്യേകമായി നോട്ടീസ് നല്‍കിയിട്ടില്ലെന്നും കോര്‍പറേഷന്‍ സ്ഥിരം സമിതിയും വ്യക്തമാക്കി. 

ബേപ്പൂരിലെ കൈയേറ്റങ്ങള്‍ ഒഴിപ്പിച്ചത് നടപടിക്രമങ്ങള്‍ പാലിച്ചാണ്. ഇതിന് നാട്ടുകാരുടെ പിന്തുണയുമുണ്ട്. മാമുക്കോയയെ ലക്ഷ്യം വച്ചുകൊണ്ടല്ല ഒഴിപ്പിക്കല്‍ ആരംഭിച്ചത്. സ്ഥലത്തെ റോഡ്, നടപ്പാത കൈയേറ്റം സംബന്ധിച്ച് നിരവധി പരാതികള്‍ ലഭിച്ചു. അനധികൃത കച്ചവടം ഒഴിപ്പിക്കണമെന്നാവശ്യപ്പെട്ട് വ്യാപാരികളുടെ പരാതിയുമുണ്ട്. കൈയേറ്റങ്ങള്‍ ഒഴിപ്പിക്കുന്ന നടപടി തുടരുമെന്നും മേയര്‍ അറിയിച്ചു.

മാമുക്കോയയുടെ വീട് നില്‍ക്കുന്ന പ്രദേശത്തെ റെസിഡന്റ്‌സ് അസോസിയേഷനില്‍ ലഭിച്ച പരാതിയുടെ അടിസ്ഥാനത്തിലാണ് അദ്ദേഹം ഉണ്ടാക്കിയ കൈയേറ്റം പൊളിച്ചുമാറ്റിയതെന്ന് കോര്‍പറേഷന്‍ ആരോഗ്യ സ്ഥിരം സമിതി ചെയര്‍മാന്‍ കെ. ബാബുരാജ് പറഞ്ഞു. ആവശ്യമായ സമയം നല്‍കിയിട്ടും വേണ്ട നടപടി സ്വീകരിക്കാത്തതിനാലാണ് കൈയേറ്റം കോര്‍പറേഷന്‍ നേരിട്ട് ഒഴിപ്പിച്ചതെന്നും അദ്ദേഹം പറഞ്ഞു. മാമുക്കോയയുടെ വീട്ടിലേക്കുള്ള കോണ്‍ക്രീറ്റ് വഴി പൊളിച്ചുമാറ്റിയ കോര്‍പറേഷന്‍ അധികൃതരുടെ നടപടി വിവാദമായിരുന്നു.

അതേസമയം മാമുക്കോയ റോഡിലേക്ക് അല്‍പ്പം കയറ്റി കോണ്‍ക്രീറ്റ് ഇട്ട നടപടി കൈയേറ്റമാണെന്ന് പറയുന്ന മേയറും ഭരണസമിതിയും എടക്കാട് തണ്ണീര്‍തത്തടം നികത്തി ഫഌറ്റ് നിര്‍മ്മിക്കുന്നതിനെതിരെ ഒരു നടപടിയും എടുത്തിട്ടില്ല. ഫഌറ്റ് നിര്‍മ്മാണത്തില്‍ അപാകതയില്ലെന്നും പ്രദേശവാസികളുടെ പ്രതിഷേധം സ്വാഭാവികമാണെന്നുമായിരുന്നു മേയര്‍ അടക്കമുള്ള അധികൃതരുടെ പ്രതികരണം. കോഴിക്കോട്ടെ ചെറുകിട കൈയേറ്റങ്ങള്‍ ഒഴുപ്പിക്കുന്ന കോര്‍പ്പറേഷന്‍ വന്‍കിടക്കാര്‍ക്കുനേരെ കണ്ണടക്കയാണെന്നും ആക്ഷേപമുണ്ട്.

ആദ്യകാലത്ത് ഇടതുപക്ഷ സഹയാത്രികനായി അറിയപ്പെട്ടിരുന്ന മാമുക്കോയ കഴിഞ്ഞ തദ്ദേശ തെരഞ്ഞെടുപ്പുകാലത്തൊക്കെ ഇടതുപക്ഷ എതിര്‍ക്കുന നിലപാടണ് പരസ്യമായി സ്വീകരിച്ചത്. അതിന്റെ അനുരണനങ്ങളും ഈ പ്രശ്‌നത്തില്‍ ഉണ്ടെന്നും പറയുന്നു.