സിനിമയില്‍ അഭിനയിക്കണമെന്ന താല്‍പര്യവുമായി നടക്കുമ്പോഴാണ് രാജമാണിക്യത്തില്‍ സുരാജിന് ഒരു സീന്‍ കിട്ടുന്നത്. വളരെ സന്തോഷത്തോടെയും ആത്മാര്‍ത്ഥയോടെയുമാണ് ആ സീനില്‍ അഭിനയിച്ചത്. എന്നാല്‍ ചിത്രം റിലീസ് ചെയ്തപ്പോള്‍ താന്‍ അഭിനയിച്ച സീനില്ല. താന്‍ ചങ്ക്‌പൊട്ടി കരഞ്ഞ്‌പോയ നിമിഷമെന്നാണ് സുരാജ് ഇതിനെകുറിച്ച് പറഞ്ഞത്.
നായികയയുടെ സഹോദരിയെ ക്ഷേത്രത്തിന് മുന്നില്‍ വച്ച് ശല്യപ്പെടുത്തുന്ന ഒരു പൂവില്‍പ്പനക്കാരന്റെ വേഷമായിരുന്നു അതില്‍ സുരാജിന്. എന്നാല്‍ ചിത്രത്തിന്റെ ദൈര്‍ഘ്യം ആ സീനിനെ സിനിമയില്‍ നിന്നും ഒഴിവാക്കുകയായിരുന്നു. വളരെയേറെ സങ്കടം അനുഭവിച്ച ഒരു അവസ്ഥയെന്നാണ് ആ സാഹചര്യത്തെപ്പറ്റി സുരാജ് പിന്നീട് സൂചിപ്പിച്ചത്. എന്നാല്‍ തന്റെ സംഭാഷണംകൊണ്ട് രാജമാണിക്യം ഹിറ്റായി. നായകനായ മമ്മുട്ടി സുരാജിന്റെ സംഭാഷണശൈലിയാണ് ഉപയോഗിച്ചത്. 
മലയാള സിനിമാ ചരിത്രത്തിലെ വമ്പന്‍ഹിറ്റുകളിലൊന്നായിരുന്നു രാജമാണിക്യം. നായക കഥാപാത്രത്തിന്റെ സംഭാഷണ ശൈലികൂടി വിജയത്തിനു കാരണമായ ഒരു ചിത്രം. തലസ്ഥാന ജില്ലയിലെ തെക്കന്‍ മേഖലകളില്‍ ഉപയോഗിക്കുന്ന നീട്ടിവലിച്ച തമിഴ് കലര്‍ന്ന മലയാളം നായകനായ മമ്മൂട്ടി സംസാരിച്ചപ്പോള്‍ പ്രേക്ഷകര്‍ അതു രണ്ടുകൈയും നീട്ടി സ്വീകരിക്കുകയായിരുന്നു. 
മമ്മൂട്ടി സംസാരിക്കുന്ന തെക്കന്‍ ഭാഷയുടെ ഓരോ വാക്കും യഥാര്‍ത്ഥത്തില്‍ മറ്റൊരു താരത്തിന്റെ കൂടി ഉയര്‍ച്ചയുടെ ആരംഭമായിരുന്നു. സുരാജ് വെഞ്ഞാറമൂട് മലയാളിയെ മതിവരുവോളം ചിരിപ്പിക്കുകയും പിന്നീട് ദേശീയതലത്തില്‍ മികച്ചനടനായി വിസ്മയിപ്പിക്കുകയും ചെയ്തു. ആ ചിത്രത്തില്‍ ഒരു സീനില്‍പ്പോലും സുരാജ് ഇല്ലെങ്കിലും നായകനായ മമ്മൂട്ടിക്കൊപ്പം പേരും പ്രശസ്തിയും ചിത്രം സുരാജിനും സമ്മാനിച്ചു. മമ്മൂട്ടി സംസാരിക്കുന്ന തെക്കന്‍ തിരുവനന്തപുരം ഭാഷാശൈലി ചിത്രത്തിന് വേണ്ടി രൂപപ്പെടുത്തിയത് സുരാജായിരുന്നുവെന്നുള്ളതാണ് അതിനു കാരണം. പക്ഷേ രാജമാണിക്യം നായകന്റെ സംഭാഷണത്തിലൂടെ തിയേറ്ററില്‍ കത്തിക്കയറി സുരാജിന്റെ വേദനയ്ക്കുള്ള മറുമരുന്നായി മാറുകയായിരുന്നു.