ലഹരിമരുന്ന് ഉപയോഗത്തിന്റെ ദൂഷ്യഫലങ്ങളെക്കുറിച്ച് വെളിപ്പെടുത്തലുമായി വീണ്ടും ബോളിവുഡ് താരം സഞ്ജയ് ദത്ത്. അടുത്തിടെ ദില്ലിയില്‍ നടന്ന ഒരു ചടങ്ങിലാണ് സഞ്ജയ് ദത്ത് ഇക്കാര്യങ്ങള്‍ പറഞ്ഞത്. 'ചെറുപ്പക്കാലത്ത് പെണ്‍കുട്ടികളോട് സംസാരിക്കാന്‍ പേടിയായിരുന്നു. ഈ പേടി മാറാന്‍ വേണ്ടിയാണ് ആദ്യമായി മയക്കുമരുന്ന് ഉപയോഗിച്ചത്.

സുഹൃത്തുക്കളിലൊരാളാണ് മയക്കുമരുന്ന് ഉപയോഗിച്ചാല്‍ ധൈര്യം ലഭിക്കുമെന്ന് പറഞ്ഞത്.' തമാശയ്ക്ക് അത് ഉപയോഗിച്ച് നോക്കുകയും അതിന്റെ ധൈര്യത്തില്‍ പെണ്‍കുട്ടികളോട് മിണ്ടാനും സാധിച്ചെന്ന് സഞ്ജയ് ദത്ത് പറയുന്നു. പക്ഷേ തമാശയ്ക്ക് തുടങ്ങിയ ആ ശീലം തന്നെ ലഹരിക്ക് അടിമയാക്കി മാറ്റിയെന്നും അദേഹം പറഞ്ഞു. ലഹരിമരുന്നുകള്‍ ഉപയോഗിക്കുന്നവര്‍ക്ക് ഒരു സന്ദേശവും അദേഹം നല്‍കുന്നു. 'ജീവിതത്തിനോടല്ലാതെ മറ്റൊരു വസ്തുവിനോടും അടിമയാകരുത്. അത് മാത്രമാണ് എനിക്ക് എല്ലാവരോടും പറയാനുള്ളത്.'

കൊക്കൈയ്ന്‍ ഉപയോഗിച്ചപ്പോഴുണ്ടായ ഒരു അനുഭവത്തെക്കുറിച്ചും സഞ്ജയ് ദത്ത് ചടങ്ങില്‍ പറഞ്ഞു. 'ഒരുദിവസം കൊക്കൈയ്ന്‍ ഉപയോഗിച്ച ശേഷം മദ്യവും കുടിച്ചു. അതോടെ എന്റെ ബോധം പോയി. പിന്നീട് എഴുന്നേറ്റപ്പോള്‍ ഭയങ്കര ക്ഷീണവും വിശപ്പും. ജോലിക്കാരനെ വിളിച്ച് ഭക്ഷണത്തിന് ആവശ്യപ്പെട്ടു. അപ്പോഴാണ് അയാള്‍ പറയുന്നത്, ഞാന്‍ ഭക്ഷണം കഴിച്ചിട്ട് രണ്ടുദിവസമായെന്ന്. കണ്ണാടിയില്‍ നോക്കിയപ്പോള്‍ ക്ഷീണിച്ച് അവശനായി നിലയിലായിരുന്നു ഞാന്‍. തുടര്‍ന്ന് വീട്ടുകാര്‍ എന്നെ ആശുപത്രിയില്‍ എത്തിച്ചു. അവിടെ നിന്നും യുഎസിലെ മയക്കുമരു ന്ന് പുനരധിവാസ കേന്ദ്രത്തില്‍ കൊണ്ടുപോയി. അതിന് ശേഷം ഇന്നേ വരെ ഞാന്‍ ലഹരി ഉപയോഗിച്ചിട്ടില്ല.'