ഒരു സിനിമാനടിക്ക് സൗന്ദര്യം ഇത്രയും ആവശ്യമില്ല... പ്രശസ്ത സംവിധായകന്‍ പറഞ്ഞു വിട്ട നടിക്ക് പിന്നെ സംഭവിച്ചത്
ചാര്‍മ്മിള ഭരതന്റെ അടുത്തെത്തിയത് തികച്ചും യാഥൃശ്ചികമാണ്. കേളി എന്ന സിനിമയുടെ അണിയറ പ്രവര്‍ത്തനങ്ങള്‍ നടക്കുന്ന സമയത്ത ചാര്‍മിള എന്ന നടിയെക്കുറിച്ച് കെ.പി.എ.സി. ലളിത ഭരതനോടു പറയുന്നത്. ചെന്നൈയില്‍ പത്താം ക്ലാസില്‍ പഠിക്കുന്ന തനി തമിഴ് പെണ്‍കുട്ടി. ബാങ്ക് ഉദ്യോഗസ്ഥനായ മനോഹരന്റെയും ഹൈസയുടെയും മകള്‍.
അങ്ങനെ ചാര്‍മിള ഭരതന്റെ മുന്നിലെത്തി. ഭരതന്‍ ലളിതയോടു പറഞ്ഞു; ഒരു സിനിമാനടിക്ക് ഇത്രയും സൗന്ദര്യം ആവശ്യമില്ല. സൗന്ദര്യം കൂടിയതിന്റെ പേരില്‍ ഭരതന്‍ ആദ്യം പറഞ്ഞു വിട്ട നടിയാണ് ചാര്‍മിള. പിന്നീട് മനസ്സ് മാറി ഭരതന്‍ തന്നെ തിരിച്ചു വിളിച്ചു. കേളിയില്‍ ജയറാമിന്റെ നായികയാക്കി. പിന്നെ, കാബൂളിവാല. സ്വപ്നതുല്യമായ തുടക്കത്തിനു ശേഷം ആഗ്രഹിക്കാത്ത വഴികളിലൂടെയാണ് വിധി ചാര്‍മ്മിളയെ നയിച്ചത്. വിവാദങ്ങള്‍, ആത്മഹത്യാശ്രമം, വിവാഹം, വിവാഹമോചനം...
ഒരിടവേളയ്ക്ക് ശേഷം തിരിച്ചെത്തിയ ചാര്‍മ്മിള തന്റെ ജീവിതാനുഭവങ്ങള്‍ പങ്കു വയ്ക്കുകയാണ് പ്രമുഖ ഓണ്‍ലൈനിലൂടെ...
സിബി മലയില്‍, ഭരതന്‍, സിദ്ദിഖ് ലാല്‍ തുടങ്ങിയ സംവിധായകരുടെ സിനിമയിലായിരുന്നു ഞാന്‍ തുടങ്ങിയത്. ഇന്നും ആള്‍ക്കാര്‍ ഓര്‍ത്തിരിക്കുന്ന സിനിമകള്‍. അതൊക്കെ മാത്രമാണ്. ആകെ മുപ്പത്തിയെട്ട് മലയാള സിനിമകളില്‍ അഭിനയിച്ചു. മലയാളികള്‍ ഓര്‍ക്കുന്ന ചില നല്ല സിനിമകള്‍ കഴിഞ്ഞാല്‍ പിന്നീടങ്ങോട്ട് ഞാന്‍ ഇടിപ്പടങ്ങള്‍ക്കു പിറകേ പോയി. പല തരത്തിലുള്ള സിനിമകളില്‍ അഭിനയിക്കേണ്ടി വന്നു. പിന്നെ, ചില സുഹൃത്തുക്കളോടുള്ള താല്‍പര്യവും. എന്തായാലും വഴി തെറ്റിപ്പോയി എന്നതാണു യാഥാര്‍ഥ്യം.
തിരുത്താനുള്ള സമയം കിട്ടിയില്ല. അപ്പോഴേക്കും എല്ലാം കൈവിട്ടു പോയിരുന്നു. വളരെ ചെറുപ്പത്തില്‍ ഒന്നും അറിയാന്‍ വയ്യാത്ത പ്രായത്തിലാണ് ഞാന്‍ സെലിബ്രിറ്റിയാകുന്നത്. അതായിരുന്നിരിക്കണം എന്റെ പ്രശ്‌നവും. ഭ്രമങ്ങള്‍ക്കു പിറകേയായിരുന്നു ഞാന്‍. പണത്തിന്റെ വില എനിക്ക് അറിയാന്‍ കഴിഞ്ഞില്ല. ലോകത്തെ ഏറ്റവും വില കൂടിയ ചെരുപ്പു വാങ്ങുക, ലിപ്സ്റ്റിക് വാങ്ങുക, ഡ്രസ് വാങ്ങുക ഇതൊക്കെയായിരുന്നു എന്റെ ജീവിതം. ചെയ്തതു മുഴുവന്‍ തെറ്റായിരുന്നു. തോറ്റു പോയി; ഒരു പാടു പ്രാവശ്യം. ആരെങ്കിലും തിരുത്താന്‍ വന്നാല്‍ അവരെ നമ്മള്‍ ശത്രുക്കളായി കാണും. അതായിരുന്നല്ലോ പ്രായം. അനുഭവങ്ങളും കുറവ്. ഞാന്‍ കാരണം ഏറ്റവും കൂടുതല്‍ വേദനിച്ച ഒരാള്‍ എന്റെ അച്ഛനാണ്. മറ്റെല്ലാ ദുരന്തങ്ങളും എനിക്ക് മറക്കാന്‍ കഴിയും. അച്ഛന്റെ മരണം എനിക്ക് ഇന്നും താങ്ങാനാകാത്ത ദുഃഖമാണ്.
ദൈവം വിധിച്ചതാകും അല്ലാതെന്തു പറയാന്‍. ഞാന്‍ കൂടെക്കൂടെ പറയാറുണ്ട് ഒരു സിനിമ പോലെയാണ് എന്റെ ജീവിതവും എന്ന്. ഇടവേള വരെ ആഡംബരത്തോടെ കടന്നു പോയി. കൃത്യം പറഞ്ഞാല്‍ അച്ഛന്റെ മരണംവരെ. ഇടവേളയ്ക്കു ശേഷം ജീവിക്കാനുള്ള തത്രപ്പാടാണ്. ആ സീനുകളിലൂടെയാണ് ഞാനിപ്പോള്‍ ഓടിക്കൊണ്ടിരിക്കുന്നത്. ഇപ്പോഴത്തെ പെണ്‍കുട്ടികള്‍ കരുതുന്നത് വിവാഹം കഴിഞ്ഞ് സെറ്റില്‍ ചെയ്യാം എന്നാണ്. അതല്ല, ശരി. സെറ്റില്‍ ആയതിനു ശേഷമേ വിവാഹം കഴിക്കാവൂ. പ്രേമിച്ചു വിവാഹം കഴിക്കാം എന്നാണു പലരും പറയുന്നത്. അതല്ല, ശരി. വിവാഹത്തിനു ശേഷം വിവാഹം കഴിച്ച ആളെ പ്രേമിക്കൂ. എന്നാലേ നല്ല കുടുംബ ജീവിതം കിട്ടൂ.
മലയാള നടനുമായി ഉണ്ടായിരുന്ന പ്രണയം എന്നെ സംബന്ധിച്ചിടത്തോളം കഴിഞ്ഞു പോയ രംഗങ്ങളാണ്. അതിന് ഞാന്‍ ഇപ്പോള്‍ എന്നെ മാത്രം കുറ്റപ്പെടുത്തുന്നു. അദ്ദേഹം ഭാര്യയോടും മക്കളോടും ഒപ്പം ജീവിക്കുന്നു. ഞാന്‍ കാരണം അദ്ദേഹത്തിനോ ഭാര്യയ്‌ക്കോ കുട്ടികള്‍ക്കോ ഒരു ഉപദ്രവവും ഉണ്ടാകരുതെന്ന് നിര്‍ബന്ധമുണ്ട്. അദ്ദേഹത്തിന്റെ മറവി അദ്ദേഹത്തെ രക്ഷിക്കട്ടെ.
https://www.facebook.com/Malayalivartha
