സിനിമാ നഷ്ടം ഏഴുകോടി; മോഹന്ലാലും മമ്മുട്ടിയും ഉള്പ്പെടെയുള്ള താരങ്ങള് നിര്മ്മാതാക്കള്ക്കെതിരെ രംഗത്തെത്തിയെന്ന് സൂചന
മകന് ചത്താലും സാരമില്ല മരുമകളുടെ താലിയറ്റാല് മതിയെന്ന അമ്മായിയമ്മയുടെ ചിന്താഗതി കാരണം കേരളത്തിലെ സിനിമാക്കാര് നാലു ദിവസം കൊണ്ട് നഷ്ടപ്പെടുത്തിയത് ഏഴു കോടി രൂപ. അതിനിടെ മോഹന്ലാലും മമ്മുട്ടിയും ഉള്പ്പെടെയുള്ള താരങ്ങള് നിര്മ്മാതാക്കള്ക്കെതിരെ രംഗത്തെത്തിയെന്നും സൂചനയുണ്ട്.
നിര്മ്മാതാക്കളും വിതരണക്കാരും തമ്മിലുള്ള തര്ക്കത്തിലാണ് ക്രിസ്തുമസിന് ഇറങ്ങേണ്ടിയിരുന്ന നാലു സിനിമകള് പെട്ടിയിലായത്. മുന്തിരിവള്ളികള് പൂത്തപ്പോള്, എബ്ര, ഫുക്രി, ജോമോന്റെ സുവിശേഷങ്ങള് എന്നിങ്ങനെ നാലു ചിത്രങ്ങളാണ് ക്രിസ്തുമസിന് ഇറങ്ങാതിരുന്നത്.
കഴിഞ്ഞ ദിവസം തീയേറ്ററിലെത്തിയ ദങ്കല് പോലുള്ള ഇതര ഭാഷ ചിത്രങ്ങള് കോടികളാണ് കേരളത്തില് നിന്നും കൊണ്ടുപോയത്. പുലിമുരുകന് 150 കോടി ക്ലബിലെത്തിയ സമയത്താണ് കേരളത്തിലെ സിനിമാക്കാര് പരസ്പരം പോരടിച്ച് ലാഭം ഇല്ലാതാക്കിയത്. കേരളത്തിന്റെ വിവിധ ഭാഗങ്ങളിലുള്ള തീയേറ്റര് ഉടമകള് പുതിയ ചിത്രങ്ങള്ക്കു വേണ്ടി ലക്ഷങ്ങള് മുന്കൂറായി നല്കിയിരുന്നു. സിനിമ ഇറങ്ങാതായതോടെ അവരും പ്രതിസന്ധിയിലായി.
സര്ക്കാര് വിഷയത്തില് വേണ്ട വിധം ഇടപെട്ടില്ല. സാംസ്കാരിക മന്ത്രിയുടെ നേതൃത്വത്തില് ഒരു തവണ യോഗം വിളിച്ചെങ്കിലും അത് വിജയിക്കാത്തതിനെ തുര്ന്ന സര്ക്കാര് പിന്മാറി.
സിനിമാക്കാരുടെ സാമ്പത്തിക വിഷയങ്ങളിലൊന്നും തങ്ങള് ഇടപെടേണ്ടതില്ലെന്നാണ് സര്ക്കാര് വാദം. അവരവര് ഉണ്ടാക്കുന്ന പ്രശ്നങ്ങള് അവരവര് തന്നെ തീര്ക്കട്ടെ എന്നാണ് സര്ക്കാര് നിലപാട്.
അതേ സമയം താരങ്ങളും ടെക്നീഷ്യന്മാരും നിര്മ്മാതാക്കള്ക്കും വിതരണക്കാരും എതിരായി തീര്ന്നിരിക്കുകയാണ്.മലയാള സിനിമയെ കൊന്നു തിന്നുന്ന ഇത്തരക്കാരെ മുന്നോട്ടു വളര്ത്തരുതെന്നാണ് താരങ്ങള് പറയുന്നത്. മോഹന്ലാല് ഉള്പ്പെടെയുള്ള താരങ്ങള് നിര്മ്മാതാക്കള്ക്കെതിരെ രംഗത്തെത്തിയതായി സൂചനയുണ്ട്. മമ്മുട്ടിക്കും നിര്മ്മാതാക്കളോട് എതിര്പ്പുണ്ട്. മമ്മൂട്ടിയുടെ സിനിമ ഇല്ലെങ്കിലും ദുല്ഖര് സല്മാന്റെ ചിത്രമുണ്ട്.
നിര്മ്മാതാക്കള്ക്കും വിതരണകാര്ക്കുമിടയില് ഗ്രൂപ്പുണ്ടാക്കാനാണ് താരങ്ങളുടെയും ടെക്നീഷ്യന്മാരുടെയും ശ്രമം. സിനിമകള് റിലീസാകാത്ത പശ്ചാത്തലത്തില് നിര്മ്മാതാക്കളില് ഒരു നല്ല ശതമാനം സംഘടനകള്ക്കെതിരെ രംഗത്തുവരാനാണ് സാധ്യത.
ക്രിസ്തുമസ് പോലുള്ള ഒരു വിശേഷ അവസരത്തില് സിനിമ റിലീസ് അവതാളത്തിലാക്കിയവരെ വെറുതെ വിടരുതെന്നാണ് സിനിമാക്കാരില് ഭൂരിപക്ഷവും പറയുന്നത്.
https://www.facebook.com/Malayalivartha
