മിമിക്രിയിലെ സൂപ്പര്‍താരമായിരുന്ന അബിയാണ് ദിലീപിനെയും നാദിര്‍ഷയെയും തുടക്കത്തില്‍ കൈപിടിച്ച് ഉയര്‍ത്തിക്കൊണ്ട് വന്നത്. മിമിക്രിയില്‍ തിളങ്ങി നിന്നിരുന്ന കാലത്താണ് അബി മഹാരാജാസ് കോളജില്‍ അഡ്മിഷന്‍ എടുക്കുന്നത്. ആ സമയത്ത് ദിലീപ് പലതവണ അബിയെ കണ്ടിട്ടുണ്ടെങ്കിലും പരിചയപ്പെടാന്‍ ഭയമായിരുന്നു. പിന്നീട് പരിചയപ്പെട്ടു, ചില താരങ്ങളെ അനുകരിച്ച് കാണിച്ചു. അങ്ങനെയാണ് അബിയുടെ ട്രൂപ്പില്‍ ദിലീപും പിന്നെ നാദിര്‍ഷയും എത്തുന്നത്. ട്രൂപ്പിന്റെ ഉടമയായിരുന്നെങ്കിലും മുതലാളിയെ പോലെയല്ല കുടുംബാംഗങ്ങളെ പോലെയാണ് അബി എല്ലാവരെയും കണ്ടിരുന്നത്. പിന്നീട് നിരവധി സ്റ്റേജ് പരിപാടികളില്‍ ഇവര്‍ പങ്കെടുത്തു. 

ചെമ്മനാട് എന്ന സ്ഥലത്ത് രണ്ട് രാഷ്ട്രീയപ്പാര്‍ട്ടികള്‍ പരിപാടി സംഘടിപ്പിച്ചു. അതിലൊരു കൂട്ടര്‍ അബിയുടെ ട്രൂപ്പിന്റെ മിമിക്രിയാണ് സംഘടിപ്പിച്ചത്. പരിപാടി കഴിഞ്ഞ് അബി പുറത്ത് നില്‍ക്കുമ്പോള്‍ കീരിക്കാടന്‍ ജോസിനെ പോലെയൊരാള്‍ വന്ന് ബീഡി ചോദിച്ചു. ഞാന്‍ പുകവലിക്കാറില്ലെന്ന് പറഞ്ഞു. ഉടനെ തീപ്പെട്ടി ചോദിച്ചു. ബീഡി വലിക്കാത്ത ഞാനെന്തിന് തീപെട്ടി കൊണ്ട് നടക്കണമെന്ന് അബി. ഇതോടെ ബീഡിയുമില്ല. തീപ്പെട്ടീമില്ലല്ലേ എന്ന് പറഞ്ഞത് അയാള്‍ ടീ ഷര്‍ട്ടിന്റെ കോളറിന് പിടിച്ചു. അമേരിക്കന്‍ ഷോയ്ക്ക് പോയപ്പോള്‍ ആരോ വാങ്ങിക്കൊടുത്ത ആയിരം രൂപയുടെ ടി ഷര്‍ട്ടായിരുന്നു. അത് കീറിയതോടെ അബിക്ക് പിടിച്ച് നില്‍ക്കാനായില്ല. ഇതിനിടെ ഷിയാസ് അടക്കമുള്ള ട്രൂപ്പ് അംഗങ്ങളും ദിലീപും നാദിര്‍ഷയുമെത്തി. പിന്നെ കൂട്ടത്തല്ലായിരുന്നു. അഞ്ച് മിനിറ്റിന് ശേഷം പൊലീസെത്തി. എല്ലാവരും സ്റ്റേഷനിലെത്താന്‍ നിര്‍ദ്ദേശിച്ചു. പരിപാടി നടത്തിയ പാര്‍ട്ടിയുടെ എതിര്‍പാര്‍ട്ടിക്കാര്‍ പ്ലാന്‍ ചെയ്ത സംഘട്ടനമായിരുന്നു ഇത്. 

അബി അന്ന് പുതിയ വണ്ടി വാങ്ങിച്ച സമയമാണ്. ദിലീപാണ് സാധാരണ ആ വണ്ടിയുടെ മുന്‍ സീറ്റില്‍ ഇരിക്കുന്നത്. വണ്ടിയില്‍ കയറിയ ശേഷം ദിലീപ് തന്റെ ജുബ തപ്പാനായി കുനിഞ്ഞു. ആ സമയം വലിയൊരു കല്ല് വന്ന് ഫ്രണ്ട് ഗ്ലാസില്‍ പതിച്ചു. പിന്നെ പൊലീസ് സ്റ്റേഷനിലെത്തിയെങ്കിലും കേസെടുക്കാതെ വിട്ടയച്ചു. മിമിക്രിക്ക് പോകുന്ന യാത്രകളില്‍ നാദിര്‍ഷ സുഹൃത്തുക്കളെ കളിയാക്കി പാരഡി പാടുമായിരുന്നു. അത് കേട്ട അബിക്ക് ഇഷ്ടമായി. അങ്ങനെയാണ് നാദിര്‍ഷയോട് പാരഡി എഴുതാനും അത് കാസറ്റാക്കാമെന്നും അബി പറഞ്ഞത്. അങ്ങനെയാണ് നാദിര്‍ഷ പാരഡി എഴുതിത്തുടങ്ങിയത്. അത് ഹിറ്റായി. പിന്നീടാണ് ഓണത്തിന് കാസറ്റ് ഇറക്കുന്ന കാര്യം ആലോചിച്ചത്. അബി പെട്ടെന്ന് ടൈറ്റില്‍ പറഞ്ഞു; ഓണത്തിനിടയ്ക്ക് പുട്ടുകച്ചവടം. 

മാവേലിയായി ജനാര്‍ദ്ദനന്റെ ശബ്ദം അനുകരിക്കാനായിരുന്നു തീരുമാനം. അബി അന്ന് നല്ല പോലെ ജനാര്‍ദ്ദനനെ അനുകരിക്കുമായിരുന്നു. ജനാര്‍ദ്ദനന് പകരം ഇന്നസെന്റിന്റെ ശബ്ദം മാവേലിക്ക് കൊടുക്കാമെന്നും ദിലീപിനെ കൊണ്ട് ചെയ്യിക്കാമെന്നും അബി നിര്‍ദ്ദേശിക്കുകയായിരുന്നു. ദിലീപന്ന് ഇന്നസെന്റിനെ അനുകരിച്ച് തുടങ്ങിയിട്ടേ ഉള്ളൂ. അബി പറഞ്ഞത് കേട്ടയുടനെ ദിലീപ് ഇന്നസെന്റിന്റെ ശബ്ദത്തില്‍ എന്റെേേേേമ്മ... എന്ന് പറഞ്ഞു. മാവേലിയുടെ ശരീരവുമായി സാമ്യമുള്ളത് ഇന്നസെന്റായിരുന്നു. അതുകൊണ്ടാണ് ഇന്നസെന്റിന്റെ ശബ്ദവും ദിലീപിനെയും അബി തെരഞ്ഞെടുത്തത്. കാസറ്റ് വലിയ വിജയമായിരുന്നു.

ദിലീപ് സിനിമയില്‍ അസിസ്റ്റന്റ് ഡയറക്ടറായി ജോലി ചെയ്യുമ്പോള്‍ ഏറ്റവും കൂടുതല്‍ അടുത്തിടപഴകിയിരുന്നത് ഇന്നസെന്റുമായിട്ടാണ്. അതുകൊണ്ട് സിനിമയ്ക്ക് പുറത്തുള്ള ഇന്നസെന്റിന്റെ മാനറിസങ്ങളും ഡയലോഗുകളും ദിലീപിന് നല്ലപോലെ അറിയാമായിരുന്നു. അതും ഗുണകരമായി. പിന്നീട് നാദിര്‍ഷയും ദിലീപും ചേര്‍ന്ന് ദേ മാവേലി കൊമ്പത്ത് എന്ന കാസറ്റ് ഇറക്കി.