മലയാളി പ്രേക്ഷകരുടെ മനസ്സില്‍ ഓര്‍ക്കുമ്പോള്‍ എപ്പോഴും ചിരിപടര്‍ത്തുന്ന നടനാണ് ഹരിശ്രീ അശോകന്‍. മുന്‍പ് കോമഡി കഥാപാത്രത്തില്‍ മാത്രമായി ഒതുങ്ങി നിന്ന നടന്‍ ഇന്ന് വ്യത്യസ്തമായ കഥാപാത്രങ്ങളിലൂടെ പ്രേക്ഷകര്‍ക്ക് മുന്നില്‍ എത്തുന്നുണ്ട്. ഇപ്പോഴിതാ പണ്ട് കാലത്തെ സിനിമകളില്‍ താടി വടിക്കാതെ അഭിനയിച്ചതിനെക്കുറിച്ച് പറയുകയാണ് ഹരിശ്രീ അശോകന്‍. മൂവി വേള്‍ഡിന് നല്‍കിയ അഭിമുഖത്തിലാണ് താരത്തിന്റെ പ്രതികരണം.

'താടി എടുക്കാതെ സിനിമകളില്‍ അഭിനയിക്കുന്നതിന് കാരണം ഉണ്ട്. ഓരോ പടം കഴിഞ്ഞു അടുത്തത് ഉണ്ടായിരുന്നു അന്ന്. അപ്പോള്‍ കണ്ടിന്യൂറ്റി പ്രശ്‌നം വരാതിരിക്കാന്‍ ആണ്. നിരന്ന് പടങ്ങള്‍ അല്ലെ, അപ്പോള്‍ വടിക്കാന്‍ നേരം ഇല്ല. അതുമാത്രമല്ല ഓരോ കാരണങ്ങള്‍ ഉണ്ട്, ശബരിമല നോമ്പ്, അല്ലെങ്കില്‍ അലര്‍ജി എന്നൊക്കെ പറഞ്ഞിട്ടാണ് അഭിനയിക്കുന്നത്. പടം നന്നായത് കൊണ്ട് അന്ന് അതൊന്നും ആളുകള്‍ ശ്രദ്ധിച്ചില്ല. ഇപ്പോള്‍ വ്യത്യസ്ത വേഷങ്ങള്‍ ചെയ്യാനുള്ള സമയം ഉണ്ട്. അങ്ങനെ ചെയ്താല്‍ മതിയെന്ന തോന്നലും ഉണ്ട്. മുന്നോട്ട് ഇങ്ങനെ പോയാല്‍ മതി. അതിനുമാത്രമുള്ള സിനിമകളെ ഇപ്പോള്‍ കമ്മിറ്റ് ചെയ്യുന്നുള്ളൂ.

സെലെക്ടിവ് എന്നല്ല, എന്നോട് സിനിമയിലുള്ള ഒരു സുഹൃത്ത് അദേഹത്തിന്റെ സിനിമയില്‍ അഭിനയിക്കാന്‍ വരണം എന്ന് പറഞ്ഞാല്‍, ഞാന്‍ വേറെ ഒരു ഗെറ്റപ്പില്‍ ആയിരിക്കും. പടത്തിന്റെ പേര് പറയുന്നില്ല, കുറെ നാളായി അഭിനയിച്ചിട്ട് ഈ അടുത്താണ് കഴിഞ്ഞത്. ആ സമയത്ത് താടി വെച്ച് കൊണ്ട് തന്നെ പല സിനിമകള്‍ക്കും വേണ്ടി അഡ്ജസ്റ്റ് ചെയ്തു.

കുറെ നാള്‍ അത് കൊണ്ട് നടന്നു, വടിക്കാന്‍ പറ്റിയില്ല എനിക്ക്. ആ സിനിമയില്‍ അഭിനയിച്ചത് തടി വെച്ചിട്ടാണ്, അതിന് ശേഷം വന്ന സിനിമകളില്‍ താടി കുറച്ച് ഉള്ളിലേക്ക് വെച്ചും ചെറുതായി ട്രിം ചെയ്തതൊക്കെ അഭിനയിക്കേണ്ടി വന്നു. താടി ഉള്ള പടം തീരുന്നില്ല. പെട്ടു പോയി എന്ന് പറയാന്‍ കഴിയില്ല, കാരണം നമ്മുടെ ജീവിതമാണ്. ഇനിയിപ്പോള്‍ അങ്ങനെ ഇല്ല. ഒരെണ്ണം കഴിഞ്ഞിട്ട് മറ്റൊന്ന് എന്ന രീതിയിലാണ്,' ഹരിശ്രീ അശോകന്‍ പറഞ്ഞു.