തമിഴിലെ പ്രമുഖ പിന്നണി ഗായികയും, സംഗീത സംവിധായകന് ഇളയരാജയുടെ മകള് ഭാവതരിണി അന്തരിച്ചു...
പ്രമുഖ സംഗീത സംവിധായകന് ഇളയരാജയുടെ മകള് ഭാവതരിണി അന്തരിച്ചു. 47 വയസ്സായിരുന്നു. തമിഴിലെ പ്രമുഖ പിന്നണി ഗായിക കൂടിയായിരുന്നു ഭാവതരിണി. ഭാവതരിണിയുടെ മരണം ഉദര അർബുദം മൂലമാണെന്നാണ് ടൈംസ് ഓഫ് ഇന്ത്യ റിപ്പോര്ട്ട് ചെയ്യുന്നത്. ശ്രീലങ്കയിൽ വെച്ചായിരുന്നു അന്ത്യം. ഏറെ നാളായി അർബുദബാധിത ആയിരുന്നു ഭാവതരിണി. മൃതദേഹം നാളെ വൈകിട്ട് ചെന്നൈയിലേക്ക് കൊണ്ടുവരും.ആയുര്വേദ ചികിത്സയ്ക്കായാണ് ഭാവതരിണി ശ്രീലങ്കയില് എത്തിയത്. മലയാളത്തില് അടക്കം പാടിയിട്ടുണ്ട് ഭാവതരിണി. മമ്മൂട്ടി ചിത്രമായ കളിയൂഞ്ഞാലില് കല്യാണപല്ലക്കില് വേളിപ്പയ്യന് എന്ന ഗാനമാലപിച്ചത് ഭാവതാരിണിയാണ്.
ഇളയരാജയായിരുന്നു ചിത്രത്തിന് സംഗീതം നല്കിയത്. മികച്ച ഗായികയ്ക്കുള്ള ദേശീയ പുരസ്കാരം 2000ല് നേടിയിരുന്നു അവര്. ഭാവതാരിണിയുടെ ആരോഗ്യപ്രശ്നങ്ങൾ പിത്താശയത്തിലെ കല്ലുമായി ബന്ധപ്പെട്ടതാണെന്ന് ആദ്യം കുടുംബം കരുതിയത്. തുടക്കത്തിലെ ലക്ഷണങ്ങളെ തിരിച്ചറിയാതെ പോയതാണ് രോഗ നിര്ണയം വൈകിയത്. വയറിലെ കോശങ്ങള് നിയന്ത്രണമില്ലാതെ വളരാന് തുടങ്ങുന്നതാണ് ഉദര അർബുദം അഥവാ വയറിലെ ക്യാന്സര് എന്ന് പറയുന്നത്. പലപ്പോഴും ഈ അര്ബുദ്ദം വൈകിയ വേളയിലാണ് തിരിച്ചറിയപ്പെടുക.
വയറിന്റെ മുകൾ ഭാഗത്തെ നിരന്തരമായ വേദനയാണ് ആദ്യ സൂചന. അതുപോലെ ഭക്ഷണം കഴിച്ചതിന് ശേഷം നെഞ്ചെല്ലിന് താഴെ വയറിന്റെ മുകൾ ഭാഗം നിറഞ്ഞതായി അനുഭവപ്പെടുക, എപ്പോഴുമുള്ള അസിഡിറ്റി, ഛർദ്ദി, എപ്പോഴുമുള്ള ദഹനക്കേട്, നെഞ്ചെരിച്ചിൽ, ഭക്ഷണം വിഴുങ്ങാൻ ബുദ്ധിമുട്ട്, വിശപ്പില്ലായ്മ, ഭാരം കുറയുക, ക്ഷീണം, വയറിലെ നീർവീക്കം, കറുത്ത നിറമുള്ള മലം, മലത്തിലൂടെ രക്തം പോവുക, മലബന്ധം തുടങ്ങിയവയൊക്കെ ചിലപ്പോള് വയറിലെ അര്ബുദത്തിന്റെ ലക്ഷണങ്ങള് ആകാം. മാറിയ ജീവിതശൈലിയും ഭക്ഷണരീതിയും ഈ ക്യാന്സറിനെ സ്വാധീനിക്കുന്ന ഘടകമാണ്.
അതിനാല് ഗാസ്ട്രിക് ക്യാന്സറിനുള്ള സാധ്യതകള് കുറയ്ക്കാന് ആരോഗ്യകരമായ ഭക്ഷണശീലങ്ങള് പിന്തുടരണം. സംസ്കരിച്ച ഭക്ഷണങ്ങള്, ജങ്ക് ഫുഡ് തുടങ്ങിയവയുടെ ഉപഭോഗം പരിമിതപ്പെടുത്തുക. പകരം പച്ചക്കറികള്, സിട്രസ് പഴങ്ങള്, വെളുത്തുള്ളി തുടങ്ങിയവ കഴിക്കുക. കൂടാതെ, വിറ്റാമിന് സിയും ആന്റിഓക്സിഡന്റുകളും അടങ്ങിയ ഭക്ഷണങ്ങളും ഡയറ്റില് ഉള്പ്പെടുത്തുക.
https://www.facebook.com/Malayalivartha
