ഗൾഫ് രാജ്യങ്ങളിൽ നിന്നു നാട്ടിലേക്കു മൃതദേഹം കൊണ്ടുപോകാനുള്ള നിരക്ക് ഇരട്ടിയാക്കിയ നടപടി എയർ ഇന്ത്യ പിൻവലിച്ചു. പ്രവാസലോകത്ത്​ ഉയർന്ന ശക്തമായ പ്രതിഷേധത്തെ തുടർന്നായിരുന്നു കമ്പനിയുടെ തീരുമാനത്തിൽ മാറ്റമുണ്ടായത്. അതേസമയം മുൻപുണ്ടായിരുന്ന 50% നിരക്കിളവും കുറഞ്ഞ വേതനമുള്ളവരുടെ മൃതദേഹങ്ങൾ സൗജന്യമായി നാട്ടിലെത്തിക്കാനുള്ള സൗകര്യവും പുനഃസ്ഥാപിക്കാനും എയർ ഇന്ത്യ അധികൃതർ തീരുമാനിച്ചു.

നിശ്ചിത നിരക്കിൽ നൽകിയിരുന്ന 50 ശതമാനം ഇളവ്​ പിൻവലിച്ചതോടെയായിരുന്നു നിരക്ക്​ ഇരട്ടിയായി വർധിച്ചിരുന്നത്​. ഇതോടെ, ദുബൈയിൽനിന്ന്​ കൊച്ചിയിലേക്ക്​ മൃതദേഹം കൊണ്ടുപോകുന്നതിനുള്ള നിരക്ക്​ 30 (ഏകദേശം 570 രൂപ) ദിർഹമായി ഉയർന്നിരുന്നു. മൃതദേഹത്തി​ന്റെ തൂക്കത്തിന്​ അനുസരിച്ച്​ നിരക്ക്​ നിശ്ചയിക്കുന്ന രീതിക്കെതിരെ പ്രവാസലോകത്ത്​ കാലങ്ങളായി പ്രതിഷേധം തുടരുകയാണ്​. ഇൗ രീതി ഒഴിവാക്കുമെന്ന്​ നേരത്തേ അധികൃതർ വ്യക്തമാക്കിയിരുന്നെങ്കിലും നടപടിയുണ്ടായില്ല. ഇതിനിടെയാണ്​ ഒരു അറിയിപ്പ്​ പോലുമില്ലാതെ നിരക്ക്​ ഇരട്ടിയാക്കിയത്​.

എയർ ഇന്ത്യയുടെ പ്രവാസിദ്രോഹ നടപടികൾക്കെതിരെ സംഘടനകൾ ഒരുമിച്ചുള്ള സമരത്തിന്​ തയാറെടുക്കുന്നതിനിടെയാണ്​ നിരക്ക്​ ഇരട്ടിയാക്കിയ തീരുമാനം പിൻവലിച്ചത്​. പ്രശ്​നത്തിന്​ പരിഹാരം കാണുമെന്ന്​ ശനിയാഴ്​ച ഇന്ത്യൻ വിദേശകാര്യ സഹമന്ത്രി ദുബൈയിൽ പറഞ്ഞിരുന്നു.