അബുദാബിയില്‍ എല്ലാ കെട്ടിടങ്ങള്‍ക്കും വാടക വര്‍ദ്ധിക്കുന്നു; ബാച്ച്‌ലര്‍ താമസക്കാര്‍ അവതാളത്തില്‍
കഠിനമായ വാടക വര്‍ദ്ധനവ് അബുദാബിയിലെ ബാച്ച്‌ലര്‍ താമസക്കാരെ ബാധിച്ചിരിക്കുന്നു. താമസസ്ഥലവും തൊഴിലിടങ്ങളും കടകളും ഉള്‍പ്പെടെ എല്ലാ കെട്ടിടങ്ങള്‍ക്കും അബുദാബിയില്‍ വാടക വര്‍ദ്ധിച്ചതായാണ് റിപ്പോര്‍ട്ട്. ശരാശരി 15 മുതല്‍ 60 ശതമാനംവരെ വാടക വര്‍ധനയാണ് അബുദാബിയിലുണ്ടായിരിക്കുന്നത്. പുതുവര്‍ഷത്തില്‍ വാടക ഉയര്‍ന്നതിനെ തുടര്‍ന്ന് ഏറ്റവും അധികം ബുദ്ധിമുട്ടനുഭവിക്കുന്നതു ബാച്ച്‌ലര്‍ താമസക്കാരാണ്.
കുടുംബങ്ങള്‍ താമസിക്കുന്ന കെട്ടിടത്തില്‍ ബാച്ച്‌ലര്‍ താമസം അനുവദിക്കില്ലെന്നതു നൂറുകണക്കിനുപേരുടെ താമസം മാറ്റുന്നതിനിടയാക്കി. അമിതവാടക നല്‍കേണ്ടിവരുന്നു എന്നതിനൊപ്പം സാമ്പത്തിക ശേഷിക്കനുസരിച്ചു വാടകക്കെട്ടിടം തരപ്പെടുത്താനാവാത്ത വിഷമത്തിലാണ് ഒട്ടേറെ കുടുംബങ്ങളും ബാച്ച്‌ലര്‍ താമസക്കാരും. അബുദാബി എമിറേറ്റില്‍ വാര്‍ഷിക വാടക വര്‍ധന അഞ്ചുശതമാനം മാത്രമെന്ന നിബന്ധന റദ്ദാക്കിയതിനു ശേഷമാണു കെട്ടിട ഉടമകള്‍ തോന്നിയതുപോലെ വാടക വര്‍ധിപ്പിച്ചത്.
വാടക വര്‍ധിപ്പിക്കുന്നതിന് ഒരു നിയന്ത്രണവും ഇല്ലെന്നായതോടെ ഏറ്റവുമധികം ദുരിതം അനുഭവിക്കുന്നതു നഗരത്തിലെ മലയാളികള്‍ ഉള്‍പ്പെടെയുള്ള വ്യാപാരികളാണ്. കടകളുടെ വാടക കുത്തനെയാണ് ഓരോ വര്‍ഷവും ഉയരുന്നത്. നഗരാതിര്‍ത്തിയില്‍ വാണിജ്യ ഇടപാടുകള്‍ നടത്തുന്നവരുടെ തൊഴിലിടങ്ങളും കടകളും അസഹ്യമായി ഉയര്‍ന്ന വാടക എങ്ങനെ താങ്ങും എന്ന വേവലാതിയിലാണ്. 2006ല്‍ ആണ് വാടക വര്‍ധന വര്‍ഷത്തില്‍ അഞ്ചുശതമാനം എന്ന നിയമം അബുദാബിയില്‍ പ്രാബല്യത്തിലായത്.
എന്നാല്‍ 2013 നവംബറിലാണ് ഈ നിയമം ഇവിടെ റദ്ദാക്കിയത്. ഇതോടെ 2014 മുതല്‍ വാടക അപ്രതീക്ഷിതമായി പല കെട്ടിടങ്ങളിലും ഉയരുകയായിരുന്നു. വാടക വര്‍ധന താങ്ങാനാവാതെ പലരും നഗരത്തില്‍നിന്ന് അന്‍പതും നൂറും കിലോമീറ്റര്‍വരെ അകലേക്കു താമസം മാറ്റി. ദൂരെ താമസിച്ചു നഗരത്തില്‍ ജോലിക്കു വരുന്ന ബുദ്ധിമുട്ടിലാണിപ്പോള്‍ പലരും. എന്നാല്‍ നഗരത്തിലെ വ്യാപാര സ്ഥാപനങ്ങളും വാടക വര്‍ധനയുടെ പേരില്‍ പൂട്ടിക്കെട്ടി പോകാനാവാത്ത വിഷമത്തിലാണു നൂറുകണക്കിനു കച്ചവടക്കാര്‍.
അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക
https://www.facebook.com/Malayalivartha
