ഇറാഖ് മേഖലയില്‍ നിന്നുള്ള ആക്രമണ ഭീഷണി നേരിടാന്‍ അതിര്‍ത്തിയില്‍ 600 മൈല്‍ ദൂരത്തില്‍ വന്‍ മതില്‍ സൗദി ഒരുക്കുന്നു
ഇറാഖ് മേഖലയില്‍ നിന്നുള്ള ആക്രമണ ഭീഷണി നേരിടാന്‍ അതിര്‍ത്തിയില്‍ സൗദി അത്യാധുനിക സുരക്ഷാസന്നാഹങ്ങള്‍ സൗദി അറേബ്യ ഒരുക്കുന്നു. നോര്‍ത്തേണ്‍ ബോര്‍ഡര്‍ സെക്യൂരിറ്റി പ്രോജക്ട് എന്ന പേരില്‍ 600 മൈല്‍ നീളത്തില്‍ കോട്ട സമാനമായ മതില്‍ നിര്‍മാണമാണ് പുരോഗമിക്കുന്നത്. കിഴക്ക് കുവൈത്ത് ഇറാഖ് അതിര്‍ത്തി സംഗമിക്കുന്ന ഹഫര്‍ അല്‍ ബാതിനില്‍ തുടങ്ങി ജോര്‍ഡന്‍ഇറാഖ് അതിര്‍ത്തി പ്രദേശമായ തുറൈഫ് വരെയാണ് ഈ \'വന്‍ മതില്‍\'. കഴിഞ്ഞ ആഴ്ച അറാറിന് സമീപം സുവൈഫ് ബോര്‍ഡര്‍ പോസ്റ്റിലുണ്ടായ ചാവേര്‍ ആക്രമണം ഈ പദ്ധതിയുടെ പ്രാധാന്യം അധികൃതരെ ആവര്‍ത്തിച്ചു ബോധ്യപ്പെടുത്തി. അസ്വസ്ഥ ബാധിതമായ ഇറാഖില്‍ നിന്നുള്ള ആക്രമണങ്ങളില്‍ നിന്ന് രാജ്യത്തെ സംരക്ഷിക്കുകയെന്നതാണ് ഈ പദ്ധതിയുടെ ലക്ഷ്യം.
ഇറാഖിലെ സാഹചര്യം തീരെ വഷളായ 2006 ലാണ് ഇത്തരമൊരു പദ്ധതിയെക്കുറിച്ച് സൗദി അറേബ്യ ആലോചന തുടങ്ങിയത്. കഴിഞ്ഞ സെപ്റ്റംബറിലാണ് നിര്‍മാണം തുടങ്ങിയത്. അഞ്ച് അടുക്കുകളുള്ള സുരക്ഷാവേലിയാണ് ഇതില്‍ പ്രധാനം. നിരീക്ഷണ ഗോപുരങ്ങള്‍, നൈറ്റ് വിഷന്‍ കാമറകള്‍, റഡാറുകള്‍ എന്നിവ സ്ഥാപിക്കും. എയര്‍ബസ് സ്‌പെക്‌സര്‍ 2000 എന്ന ആധുനിക റഡാറുകള്‍ സ്ഥാപിച്ച 40 വാച്ച് ടവറുകളാകും ഈ അതിര്‍ത്തിയില്‍ ഉടനീളം ഉണ്ടാകുക. ഏഴു കമാന്‍ഡ് ആന്‍ഡ് കണ്‍ട്രോള്‍ സെന്ററുകളും സജ്ജീകരിക്കും. 38 പ്രത്യേക കമ്യൂണിക്കേഷന്‍ ടവറുകളും 32 മിലിറ്ററി റെസ്‌പോണ്‍സ് സ്‌റ്റേഷനുകളും അടക്കം സര്‍വ സജ്ജമായൊരു അന്താരാഷ്ട്ര അതിര്‍ത്തിയായി ഈ മേഖല മാറും.
സുരക്ഷാവേലിയുടെ ഇറാഖ് ഭാഗത്ത് വിസ്തൃതമായ മണല്‍വരമ്പ് തീര്‍ക്കും. നുഴഞ്ഞുകയറ്റക്കാരുടെ നീക്കം സാവധാനത്തിലാക്കുന്നതിന് വേണ്ടിയാണിത്. അതിന് പിന്നില്‍ കരുത്തുറ്റ ഉരുക്കുവേലി. പിറകില്‍ മൂര്‍ച്ചയേറിയ റേസര്‍ വയറുകള്‍ സ്ഥാപിച്ച 100 മീറ്റര്‍ നീ്‌ളത്തില്‍ ഇരട്ടവേലി. 100 മീറ്റര്‍ ഇടവിട്ടുള്ള കോണ്‍ക്രീറ്റ് കെട്ടുകളിലാകും ഇതു ഉറപ്പിച്ചിട്ടുണ്ടാകുക. ഭൂമിക്കടിയിലൂടെയുള്ള നീക്കങ്ങള്‍ തിരിച്ചറിയാനുളള്ള അണ്ടര്‍ ഗ്രൗണ്ട് മൂവ്‌മെന്റ് സെന്‍സറുകള്‍ ഇതിന് പിന്നില്‍. അവിടെയാണ് പ്രധാന അതിര്‍ത്തി കാവല്‍ പുരകള്‍ സ്ഥാപിക്കുക. ഹെലിപാഡുകള്‍ ഉള്‍പ്പെടെയുള്ള റെസ്‌പോണ്‍സ് സ്‌റ്റേഷനുകള്‍ സജ്ജീകരിച്ചവയാണ് 40 കാവല്‍ പുരകളും. 40 ബോര്‍ഡര്‍ പോസ്റ്റുകളിലും ഏതു സാഹചര്യവും കൈകാര്യം ചെയ്യാന്‍ സാധിക്കുന്ന 240 റെസ്‌പോണ്‍സ് വാഹനങ്ങള്‍ ഒരുക്കി നിര്‍ത്തും.
സദാ സമയം അതിര്‍ത്തിയില്‍ സഞ്ചരിക്കുന്ന നിരീക്ഷണ സംവിധാനങ്ങള്‍ ഘടിപ്പിച്ച വാഹനങ്ങള്‍ ഓരോ ബോര്‍ഡര്‍ പോസ്റ്റിനുമിടയില്‍ സഞ്ചരിക്കും. അത്തരം 10 യൂനിറ്റ് വാഹനങ്ങള്‍ ഉണ്ടാകും. റഡാറുകള്‍, വീഡിയോ കാമറ, തെര്‍മല്‍, നൈറ്റ് വിഷന്‍ കാമറകള്‍ എന്നിവ ഈ വാഹനങ്ങളില്‍ സജ്ജീകരിക്കും. പദ്ധതി പൂര്‍ത്തിയായാല്‍ 18 കിലോമീറ്റര്‍ ദൂരം വരെയുള്ള കാല്‍നടയാത്രക്കാരനെ വരെ നിരീക്ഷിക്കാന്‍ സാധിക്കും. 27 കിലോമീറ്ററിലെ ലൈറ്റ് എയര്‍ക്രാഫ്റ്റും 36 കിലോമീറ്ററിലെ ലോ ലെവല്‍ ഹെലികോപ്റ്ററും നിരീക്ഷണ പരിധിയില്‍ വരും.
https://www.facebook.com/Malayalivartha
