കുവൈറ്റ്‌ കേന്ദ്രമായി പ്രവര്‍ത്തിക്കുന്ന ഹഫാക്ക്‌ ഇന്റര്‍നാഷണല്‍ എന്ന കമ്പനിയുടെ ഇ-മെയില്‍ ഹാക്ക്‌ ചെയ്‌ത്‌ 6,27,000 ദിര്‍ഹം തട്ടിയെടുത്തു. ഏതാണ്ട്‌ ഒരു കോടിയോളം രൂപവരും. റാസല്‍ഖൈമ ഫ്രീ സോണിലെ ഒരു കമ്പനി മുഖേനയാണ്‌ ഈ വന്‍ തട്ടിപ്പ്‌ നടന്നത്‌. പത്ത്‌ വര്‍ഷത്തോളമായി ഇവര്‍ക്ക്‌ ചൈനയിലെ ഒരു സപ്ലൈ കമ്പനിയുമായി അടുത്ത ബന്ധമുണ്ട്‌. ഇ-മെയില്‍ ഹാക്ക്‌ ചെയ്‌ത സംഘം തുടര്‍ന്നുള്ള എല്ലാ സാമ്പത്തിക ഇടപാടുകളും റാസല്‍ഖൈമയിലെ തങ്ങളുടെ കമ്പനിമുഖേന നടത്തണമെന്ന്‌ കുവൈറ്റ്‌ കമ്പനിക്ക്‌ മെയില്‍ അയച്ചു. ഇത്‌ ചൈനയില്‍ നിന്നുള്ള സന്ദേശമാണെന്ന്‌ തെറ്റിദ്ധരിച്ചതോടെ ലക്ഷങ്ങളുടെ സൈബര്‍ തട്ടിപ്പിന്‌ കളമൊരുങ്ങി. ചൈനയുടെ കമ്പനിക്ക്‌ ദീര്‍ഘനാളായി പണം ലഭിക്കാതെ വന്നപ്പോള്‍ ഇരു കമ്പനികളുടേയും ഉടമകള്‍ ഫോണില്‍ ബന്ധപ്പെട്ടപ്പോഴാണ്‌ തട്ടിപ്പു വിവരം അറിയുന്നത്‌. അങ്ങനെയാണ്‌ റാസല്‍ഖൈമയിലെ സൈബര്‍ സെല്ലില്‍ പരാതി നല്‍കിയത്‌. എന്നാല്‍ പാകിസ്‌താന്‍ കാരനായ കമ്പനി ഉടമ പറയുന്നത്‌ തന്നെയും വേറൊരു സംഘം പറ്റിച്ചു എന്നാണ്‌. റാസല്‍ഖൈമ കമ്പനി ഉടമ തന്റെ അക്കൗണ്ടില്‍ വന്ന മുഴുവന്‍ തുകയും തിരികെ നല്‍കിക്കൊണ്ട്‌ പ്രശ്‌നമവസാനിപ്പിച്ചു.