മാദ്ധ്യമങ്ങള്‍ ഓരോ ഗദിവസവും ഓരോ വാര്‍ത്തകള്‍ കൊടുക്കുമെന്നും അതിന് താന്‍ എങ്ങനെ ഉത്തരവാദിയാകുമെന്നും സഹോദരി മറിയ ഉമ്മന്റെ സ്ഥാനാര്‍ത്ഥിത്വത്തില്‍ അതൃപ്തിയുണ്ടെന്ന് താന്‍ പറഞ്ഞിട്ടില്ലെന്നും പുതുപ്പള്ളി എംഎല്‍എ ചാണ്ടി ഉമ്മന്‍. 'ഒരാളോടും ഇക്കാര്യം ഞാന്‍ സംസാരിച്ചിട്ടില്ല. മാദ്ധ്യമങ്ങള്‍ എല്ലാ ദിവസവും രാവിലെ ഓരോരുത്തരുടെ പേരിടും. ഇനി എന്റെ അനന്തരവന്റെ പേരുകൂടിയേ ഉള്ളൂ' ചാണ്ടി ഉമ്മന്‍ പറഞ്ഞു.

അതേസമയം, പുതുപ്പള്ളി മണ്ഡലത്തില്‍ ഇത്തവണ പ്രചാരണത്തിനായി ഫ്‌ലക്‌സും പോസ്റ്ററും ഉപയോഗിക്കില്ലെന്ന് ചാണ്ടി ഉമ്മന്‍ പറഞ്ഞു. ജനങ്ങളില്‍ നിന്ന് നല്ല പ്രതികരണങ്ങളാണുള്ളത്. പ്രവര്‍ത്തകരും ആവേശത്തിലാണ്. പൂര്‍ണമായ വിജയമുണ്ടാകുമെന്ന ആത്മവിശ്വാസമുണ്ട്. ഭവനരഹിതര്‍ അല്ലാത്ത പുതുപ്പള്ളി എന്ന പദ്ധതിയാണ് ഇപ്പോള്‍ ഫോക്കസ് ചെയ്യുന്നത്. ഇനി 25 വീട് കൂടി പൂര്‍ത്തിയാക്കാനുണ്ട്. ഉമ്മന്‍ ചാണ്ടി ഫൗണ്ടേഷനിലൂടെ നൂറുവീടുകളാണ് നിര്‍മിക്കുന്നത്. അതിനാലാണ് ഫ്‌ലക്‌സും പോസ്റ്ററുകളും ഒഴിവാക്കാന്‍ തീരുമാനിച്ചത്. കൈപ്പത്തി ചിഹ്നം ഉണ്ടാകും. പാര്‍ട്ടിയാണ് വലുത് വ്യക്തിയല്ല എന്നതാണ് സന്ദേശമെന്നും ചാണ്ടി ഉമ്മന്‍ പറഞ്ഞു.

മുന്‍ മുഖ്യമന്ത്രി ഉമ്മന്‍ ചാണ്ടിയുടെ മകള്‍ മറിയ ഉമ്മനെ ചെങ്ങന്നൂരില്‍ യുഡിഎഫ് സ്ഥാനാര്‍ത്ഥിയായി പരിഗണിക്കുന്നതായി റിപ്പോര്‍ട്ടുകളുണ്ടായിരുന്നു. എന്നാല്‍, ഇതില്‍ സഹോദരന്‍ ചാണ്ടി ഉമ്മന്‍ കടുത്ത അതൃപ്തി അറിയിച്ചെന്നും ഒരു കുടുംബത്തില്‍ രണ്ട് സ്ഥാനാര്‍ത്ഥികള്‍ വേണ്ട മറിയ ഉമ്മന്‍ സ്ഥാനാര്‍ത്ഥിയായാല്‍ രാജി വയ്ക്കുമെന്നും മറിയയ്ക്ക് മത്സരിക്കണമെങ്കില്‍ പുതുപ്പള്ളി ഒഴിഞ്ഞുതരാമെന്ന് ചാണ്ടി ഉമ്മന്‍ നേതാക്കളോട് പറഞ്ഞതായും റിപ്പോര്‍ട്ടുണ്ടായിരുന്നു. ഇതെല്ലാം മാദ്ധ്യമസൃഷ്ടിയാണെന്നാണ് ചാണ്ടി ഉമ്മന്‍ ഇപ്പോള്‍ പ്രതികരിച്ചിരിക്കുന്നത്.