100 കോടി ദിര്‍ഹം മുതല്‍മുടക്കിലാണ് ദുബായില്‍ ലുലു മെഗാമാള്‍ വരുന്നത്. 2020 ദുബായ് എക്‌സ്‌പോയ്ക്കു മുന്‍പായി 30 മാസംകൊണ്ട് മെഗാമാള്‍ പൂര്‍ത്തിയാക്കുമെന്ന് എം.എ.യൂസഫലി പറഞ്ഞു. വേറിട്ട ഷോപ്പിങ് അനുഭവമൊരുക്കാന്‍ വിപുലമായ ക്രമീകരണങ്ങള്‍ ഏര്‍പ്പെടുത്തും. ഹരിതമന്ദിര മാനദണ്ഡങ്ങള്‍ പാലിച്ച് രാജ്യാന്തര നിലവാരത്തോടെയാണ് മാള്‍ നിര്‍മിക്കുക. രണ്ടു നിലകളിലായി 3000 കാറുകള്‍ പാര്‍ക്ക് ചെയ്യാന്‍ കഴിയും. ദുബായ് എക്‌സ്‌പോ വേദിക്കും അല്‍ മക്തൂം രാജ്യാന്തര വിമാനത്താവളത്തിനും അടുത്താണ് പുതിയ മാള്‍ എന്നതും പ്രത്യേകതയാണെന്നു ചൂണ്ടിക്കാട്ടിനൂതന സൗകര്യങ്ങളോടെയും ദൃശ്യചാരുതയോടെയും ലുലുഗ്രൂപ്പ് സിലിക്കണ്‍ ഒയാസിസില്‍ ഷോപ്പിങ് മാള്‍ നിര്‍മിക്കുന്നു. 

ദുബായ് സിലിക്കണ്‍ ഒയാസിസ് അതോറിറ്റി (ഡിഎസ്ഒഎ) ചെയര്‍മാനും ദുബായ് സിവില്‍ ഏവിയേഷന്‍ അതോറിറ്റി പ്രസിഡന്റും എമിറേറ്റ്‌സ് ഗ്രൂപ്പ് ചെയര്‍മാനും സിഇഒയുമായ ഷെയ്ഖ് അഹമ്മദ് ബിന്‍ സഈദ് അല്‍ മക്തൂം ശിലാസ്ഥാപനം നടത്തി. 23 ലക്ഷം ചതുരശ്ര അടിയില്‍ 100 കോടി ദിര്‍ഹം മുതല്‍മുടക്കിയാണ് മാള്‍ നിര്‍മിക്കുക. ഡിഎസ്ഒഎ വൈസ് ചെയര്‍മാനും സിഇഒയുമായ ഡോ.മുഹമ്മദ് അല്‍ സറൂനി, ലുലു ഗ്രൂപ്പ് ചെയര്‍മാനും എംഡിയുമായ എം.എ.യൂസഫലി, മുതിര്‍ന്ന സര്‍ക്കാര്‍ ഉദ്യോഗസ്ഥര്‍ തുടങ്ങിയവര്‍ പങ്കെടുത്തു.

രാജ്യാന്തര ബ്രാന്‍ഡുകളുടെ ഉള്‍പ്പെടെ 300 ലേറെ ഷോറൂമുകള്‍ ഉണ്ടാകും. ലുലു ഹൈപ്പര്‍മാര്‍ക്കറ്റ്, ഡിപാര്‍ട്‌മെന്റ് സ്‌റ്റോറുകള്‍ക്കു പുറമെയാണിത്. കുടുംബമായി എത്തുന്നവരുടെ ഉല്ലാസത്തിനായി 70,000 ചതുരശ്ര അടിയില്‍ പ്രത്യേക മേഖലയൊരുക്കും. 50ലേറെ ഭക്ഷണശാലകളും ഉല്ലാസകേന്ദ്രങ്ങളും സജ്ജമാക്കും. നൂതന സംരംഭങ്ങള്‍ക്കു തുടക്കമിട്ട് വികസനം ത്വരിതപ്പെടുത്തുകയാണു ലക്ഷ്യമെന്ന് ഷെയ്ഖ് അഹമ്മദ് പറഞ്ഞു. താമസക്കാര്‍ക്കും വിനോദസഞ്ചാരികള്‍ക്കും വേറിട്ട ഷോപ്പിങ് അനുഭവം നല്‍കാന്‍ പുതിയ മാളിനു കഴിയുമെന്ന് ഡോ.മുഹമ്മദ് അല്‍ സറൂനി പറഞ്ഞു.