നിയമലംഘനങ്ങള്ക്കുളള കടുത്ത ശിക്ഷ ഇന്നുമുതല് നിലവില് വരുമെന്ന് നഗരസഭ
മാലിന്യങ്ങളും ചപ്പുചവറുകളും പൊതുസ്ഥലങ്ങളില് വലിച്ചെറിയുന്നതും പൊതുനിരത്തില് തുപ്പുന്നതുമടക്കം നിയമലംഘനങ്ങള്ക്കുള്ള വര്ധിപ്പിച്ച ശിക്ഷ ഇന്നുമുതല് നിലവില് വരുമെന്ന് മസ്കത്ത് നഗരസഭ അറിയിച്ചു. കുറ്റകൃത്യം ആവര്ത്തിക്കുന്നപക്ഷം ശിക്ഷ വീണ്ടും കടുക്കും. മുനിസിപ്പല്, വാണിജ്യ പ്രവര്ത്തനങ്ങളുടെ ക്രമീകരണവും പൊതുജനാരോഗ്യവും ശുചിത്വവും സംരക്ഷിക്കാനും ലക്ഷ്യമിട്ടുള്ള 55/2017 നിയമ ഭേദഗതി പ്രകാരമാണ് ശിക്ഷ ഭേദഗതി. ലൈസന്സും പെര്മിറ്റുമില്ലാതെ വാണിജ്യ സ്ഥാപനങ്ങള് നടത്തുന്നവരില്നിന്നും മറ്റ് പ്രവര്ത്തനങ്ങളില് ഏര്പ്പെടുന്നവരില്നിന്നും ഒപ്പം ആരോഗ്യ, പരിസ്ഥിതി ശുചിത്വം സംബന്ധിച്ച നിയമങ്ങള്ക്ക് വിരുദ്ധമായി പ്രവര്ത്തിക്കുന്ന സ്ഥാപനങ്ങളില്നിന്നും കനത്ത തുക പിഴ ഈടാക്കാന് ഭേദഗതി വ്യവസ്ഥ ചെയ്യുന്നു.
മാലിന്യങ്ങളും ചപ്പുചവറുകളും പൊതുസ്ഥലങ്ങളിലോ ഒഴിഞ്ഞിടത്തോ തള്ളിയാല് ആയിരം റിയാല് ആയിരിക്കും പിഴ. വാദികളില് മാലിന്യം തള്ളുന്നവര്ക്കും ഇത് ബാധകമാണ്. കുറ്റകൃതം ആവര്ത്തിക്കുന്നപക്ഷം പിഴ ഇരട്ടിയാകും. ഭക്ഷ്യസുരക്ഷ നിയമലംഘനം, ബഹുനില കെട്ടിടങ്ങളിലെ മാലിന്യ നിര്മാര്ജനത്തിലെ പോരായ്മ, പൊതുസ്ഥലങ്ങളിലേക്കും പൊതു റോഡുകളിലേക്കും അഴുക്കുവെള്ളം ഒഴുക്കല്, സംസ്കരിക്കാത്ത മലിനജലം ജലസേചനത്തിന് ഉപയോഗിക്കല്, 18 വയസ്സില് താഴെ പ്രായമുള്ളവര്ക്ക് ശീഷ ഉപയോഗിക്കാന് നല്കല്, നഗരസഭയുടെ അനുമതിയില്ലാതെ താമസയിടങ്ങളില് ആടുമാടുകളെയും കോഴികളെയും വളര്ത്തല് തുടങ്ങി വിവിധ നിയമലംഘനങ്ങളിലും പിഴസംഖ്യ വര്ധിപ്പിച്ചിട്ടുണ്ട്.
24 മണിക്കൂറിനുള്ളില് നിക്ഷേപിച്ച മാലിന്യം നഗരസഭയുടെ മാലിന്യപ്പെട്ടിയിലേക്കോ അംഗീകൃത മാലിന്യശേഖരണ സ്ഥലത്തേക്കോ മാറ്റണം. അല്ലാത്തപക്ഷം പിഴസംഖ്യയില് ലെവിയും ചുമത്തും. അവശിഷ്ടങ്ങള്, കടപുഴകിയ മരങ്ങള്, പഴകിയ ഫര്ണിച്ചറുകള്, ഇലക്ട്രോണിക് മാലിന്യങ്ങള് തുടങ്ങിയ മാലിന്യപ്പെട്ടിക്ക് പുറത്ത് കൊണ്ടുവന്ന് ഇട്ടാല് അമ്പത് റിയാലാകും പിഴ. കുറ്റകൃത്യം ആവര്ത്തിച്ചാല് പിഴ ഇരട്ടിയാകും. പൊതുനിരത്തില് തുപ്പിയാല് 20 റിയാല് ഈടാക്കും. മൃഗങ്ങളുടെ അവശിഷ്ടങ്ങള് പൊതുനിരത്തിലോ മാലിന്യപ്പെട്ടികള്ക്ക് സമീപമോ ഇട്ടാല് നൂറ് റിയാല് നല്കേണ്ടി വരും.
https://www.facebook.com/Malayalivartha
