അബുദാബി: കേരളത്തില്‍ നിപ വൈറസ്​ ബാധിച്ച്‌​ 14 പേര്‍ മരിച്ച സാഹചര്യത്തില്‍ യു.എ.ഇയിലെത്തുന്ന യാത്രക്കാരെ നിരീക്ഷിക്കാനും രോഗികളെ കണ്ടെത്താനും വിമാനത്താവള അധികൃതര്‍ക്ക്​ ആരോഗ്യ-രോഗപ്രതിരോധ മന്ത്രാലയം നിര്‍ദ്ദേശം നല്‍കി.

രോഗലക്ഷണങ്ങള്‍ പ്രകടിപ്പിക്കുന്നവരെ കണ്ടെത്തി നിപ രോഗം ആണോയെന്ന്​ പരിശോധിക്കാനാണ്​ നിര്‍ദേശം. നിപ വൈറസ്​ ബാധ സംശയിച്ചാലുടനെ രോഗിയെ മറ്റുള്ളവരില്‍നിന്ന്​ മാറ്റണമെന്നും ആരോഗ്യ ഉദ്യോഗസ്​ഥരെ വിവരമറിയിക്കണമെന്നും മന്ത്രാലയം പ്രസ്​താവനയില്‍ പറഞ്ഞു.

രോഗം പിടിപെട്ട പ്രദേശത്തുനിന്ന്​ വരുന്ന യാത്രക്കാര്‍ക്ക്​ നിപ വൈറസ്​ ബാധയുമായി ബന്ധപ്പെട്ട ലക്ഷണങ്ങള്‍ അനുഭവപ്പെട്ടാല്‍ ആരോഗ്യ അധികൃതരെ സമീപിക്കേണ്ടതി​ന്റെ പ്രാധാന്യത്തെ കുറിച്ച്‌​ അവരെ ബോധവാന്മാരാക്കേണ്ടതി​​ന്റെ ആവശ്യകത മന്ത്രാലയം വിശദീകരിച്ചു.

തലച്ചോറി​​​ന്റെ പ്രവര്‍ത്തനങ്ങളെ താറുമാറാക്കുന്ന ഇൗ രോഗത്തി​ന്റെ ലക്ഷണങ്ങള്‍ പനി, ചുമ, തലവേദന, ശ്വാസതടസ്സം, പെരുമാറ്റത്തിലെ അസ്വാഭാവികത തുടങ്ങിയവയാണ്​.

കേരളത്തിലേക്ക്​ അത്യാവശ്യ ഘട്ടത്തിലല്ലാതെ യാത്ര പോകരുതെന്ന്​ മന്ത്രാലയം നേരത്തെ മുന്നറിയിപ്പ്​ നല്‍കിയിരുന്നു. നിപ വൈറസ്​ ബാധ വലിയ തോതില്‍ പടര്‍ന്നിട്ടില്ലെന്നും രോഗം വന്ന്​ മരിച്ച കേസുകള്‍ വിശദമായി അവലോകനം ചെയ്​ത്​ വരുന്നതായും ഇന്ത്യന്‍ ആരോഗ്യ-കുടുംബക്ഷേമ മന്ത്രാലയം അറിയിച്ചതായി യു.എ.ഇ ആരോഗ്യ മന്ത്രാലയം വ്യക്​തമാക്കി.