മസ്​കത്ത്​: മസ്​കത്ത്​ ഗവര്‍ണറേറ്റി​ലെ വിവിധ ഭാഗങ്ങളില്‍ കാലാവധി കഴിഞ്ഞ സിലിണ്ടറുകൾ മാറ്റി നൽകുമ്പോൾ വിതരണക്കാര്‍ അമിതമായി പണം ഇൗടാക്കുന്നുവെന്ന് പരാതികൾ ഉയർന്നതിന്റെ പശ്ചാത്തലത്തിൽ വാണിജ്യ-വ്യവസായ മന്ത്രാലയം ഇതിനെതിരെ കർശന നടപടികളുമായി രംഗത്തെത്തിയിരിക്കുകയാണ്.

ഗ്യാസ്​ സിലിണ്ടറുകള്‍ മാറ്റി നൽകുമ്പോൾ വിതരണക്കാര്‍ വില ഇൗടാക്കുന്നത്​ നിയമവിരുദ്ധമാണെന്നും സിലിണ്ടര്‍ മാറ്റി നല്‍കേണ്ടത്​ ഗ്യാസ്​ നിറക്കുന്ന കമ്പനിയുടെ ബാധ്യതയാണെന്നും മന്ത്രാലയം വക്​താവ്​ അറിയിച്ചു.

ഗവര്‍ണറേറ്റിലെ വിവിധ ഭാഗങ്ങളില്‍ സിലിണ്ടറുകള്‍ മാറ്റി നൽകുമ്പോൾ വിതരണക്കാര്‍ 25 റിയാല്‍വരെ ഇൗടാക്കുന്നുണ്ട്. 15 വര്‍ഷത്തിലധികം പഴക്കമുള്ള സിലിണ്ടറുകള്‍ മാറ്റണമെന്നും 25 റിയാല്‍ വരുമെന്നുമാണ്​ വിതരണക്കാര്‍ പറയുന്നത്.

2.8 റിയാല്‍ മാത്രം വില വരുന്ന കാലി ഗ്യാസ്​ സിലിണ്ടറുകള്‍ക്കാണ്​ ഇത്രയും വില ഈടാക്കുന്നത്. റൂവിയുടെ വിവിധ ഭാഗങ്ങളില്‍ വിതരണക്കാര്‍ പഴയ സിലിണ്ടറുകള്‍ മാറ്റണമെന്ന്​ പറഞ്ഞ്​ അമിത നിരക്കുകള്‍ ഇൗടാക്കുന്നതായി പരാതികൾ ഉയർന്നിരുന്നു. അതേസമയം ചില വിതരണക്കാര്‍ 27 റിയാല്‍ വരെ ഇൗടാക്കിയതായും പരാതികൾ ലഭിച്ചു.

സിലിണ്ടര്‍ മാറ്റി നല്‍കേണ്ടത്​ വിതരണക്കാരുടെ കടമയാണെന്ന്​ ഒമാന്‍ അളവുതൂക്ക വിഭാഗം ഡയറക്ടറേറ്റും അറിയിച്ചു. പണം ആവശ്യപ്പെടുന്നവരുടെ പേരും ഫോണ്‍ നമ്പറും പ്രധാന വിതരണക്കാരെ അറിയിക്കണം. ഇത്തരക്കാരുമായുള്ള ഇടപാട്​ കമ്പനി നിര്‍ത്തിവെക്കുമെന്നും അറിയിപ്പിലുണ്ട്​. ഗ്യാസ്​ പകുതിയുള്ള സിലിണ്ടറുകള്‍ നല്‍കുന്നതടക്കമുള്ള നിരവധി പരാതികളും മസ്​കത്ത്​ മേഖലയില്‍ ഉയര്‍ന്നു​വരുന്നുണ്ട്​.