ഗൾഫ് രാജ്യങ്ങൾ അസഹ്യമായ ചൂടില്‍ വെന്തുരുകുകയാണ്. റിയാദില്‍ കഴിഞ്ഞ ആഴ്ച്ചയാണ് ചൂട്​ കനത്തത്. 45 ഡി​ഗ്രിയാണ്​ ബുധനാഴ്​ച ഏറ്റവും കൂടിയ ചൂട് അനുഭവപ്പെട്ടത്. ഇത്​ വരും ദിവസങ്ങളില്‍ 50 വരെ ആയേക്കുമെന്ന് കാലാവസ്ഥാ നിരീക്ഷണ കേന്ദ്രം അറിയിക്കുന്നു.

സൗദിയുടെ കിഴക്കന്‍ മധ്യമേഖലയില്‍ ശക്​തമായ ചൂട്​കാറ്റ്​ വീശുന്നുണ്ട്. കിഴക്കന്‍ പ്രവിശ്യയിലെ ഹഫറുല്‍ ബാതിന്‍, ഹൂഫൂഫ്​ എന്നിവിടങ്ങളില്‍ ബുധനാഴ്​ച ചൂട്​ 47 ഡിഗ്രിയാണ്​. സമുദ്ര നിരപ്പില്‍ നിന്ന്​ ഏറ്റവും ഉയര്‍ന്നു നില്‍ക്കുന്ന ഖമീസ്​ മുശൈത്തില്‍ പോലും 32 ഡിഗ്രി ചൂടാണ്​ ബുധനാഴ്​ച്ച രേഖപ്പെടുത്തിയത്​​.

മക്കയില്‍ 43, മദീനയിൽ 42 ഡിഗ്രി എന്നിങ്ങനെ ചൂട്​ അനുഭവപ്പെട്ടു. റമദാനോടനുബന്ധിച്ച്‌​ ലോകത്തി​ന്റെ നാനാഭാഗത്തുനിന്നും ലക്ഷക്കണക്കിന്​ വിശ്വാസികളാണ്​ മക്കയും മദീനയും കേന്ദ്രീകരിച്ചു കഴിയുന്നത്​. ഇവര്‍ക്ക്​ ചൂടിൽ നിന്ന്​ ആശ്വാസം പകരാന്‍ അധികൃതര്‍ പല നടപടികളും സ്വീകരിച്ചിട്ടുണ്ട്​.

റമദാന്‍ അവസാന ദിനങ്ങളില്‍ മക്കയും മദീനയും ജനസാഗരമാവും. അതേസമയം ഇൗ സമയത്ത്​ ചൂട് ഇനിയും കൂടാനാണ്​ സാധ്യത. പുറത്തിറങ്ങി നടക്കാന്‍ വയ്യാത്ത വിധം ഉഷ്​ണം കൂടിയതോടെ റിയാദിലുള്‍പ്പടെ തെരുവുകള്‍ കാലിയാണ്​. ഉഷ്​ണക്കാറ്റ്​ തുടരുമെന്ന്​ കാലാവസ്ഥാവിഭാഗം അറിയിച്ചിട്ടുണ്ട്​.