മനാമ: ബഹ്‌റൈനിലെ ടുബ്ലിയിലെ ഒരു സ്വകാര്യ ലേബര്‍ ക്യാമ്പിൽ മാസങ്ങളോളം ശമ്പളം പോലുമില്ലാതെ ദുരിതമനുഭവിക്കുന്ന തൊഴിലാളികള്‍ ഒരുമിച്ച് റോഡിലിറങ്ങി. തങ്ങളുടെ അവസ്ഥ ലേബർ കോടതിയെ അറിയിക്കാൻ ഇറങ്ങിയ തൊഴിലാളികള്‍ വഴി തെറ്റി ചെന്നുപെട്ടത്​ അമേരിക്കന്‍ മിഷന്‍ ആശുപത്രിക്ക്​ അടുത്തുള്ള റോഡില്‍.

ഇന്ത്യന്‍, പാകിസ്ഥാന്‍, ബംഗ്ലാദേശ്​ രാജ്യങ്ങളില്‍ നിന്നുള്ള തൊഴിലാളികളാണ്​ തങ്ങളുടെ കഷ്​ടപ്പാടുകള്‍ അറിയിക്കാന്‍ ഇറങ്ങിത്തിരിച്ചത്​. ഒടുവില്‍ പോലീസ്​ എത്തി തൊഴിലാളികളുടെ മാര്‍ച്ച്‌​ തടയുകയും കാര്യങ്ങള്‍ അറിഞ്ഞശേഷം, വാഹനങ്ങളില്‍ ലേബര്‍ ഉദ്യോഗസ്ഥരുടെ അടുത്തും തുടര്‍ന്ന്​ ക്യാമ്പിൽ എത്തിക്കുകയും ചെയ്​തു. ക്യാമ്പിൽ വെള്ളം പോലും ഇല്ലാത്ത അവസ്ഥയായിരുന്നു. തുടര്‍ന്ന്​ ലേബര്‍ അധികൃതരും വിവിധ എംബസി ഉദ്യോഗസ്ഥരും ക്യാമ്പ്​ സന്ദര്‍ശിച്ചു.