കുരങ്ങനെ ലൈംഗികമായി അധിക്ഷേപിച്ചുവെന്ന കുറ്റത്തിന് ഈജിപ്തില്‍ ഒരു യുവതിയ്ക്ക് തടവുശിക്ഷ. ബസ്മ അഹമ്മദ് എന്ന 25-കാരി യുവതിക്ക് ഇനി മൂന്ന് വര്‍ഷം അഴിയെണ്ണാം.

നൈല്‍ ഡെല്‍റ്റ സിറ്റിയിലുള്ള ഒരു പെറ്റ്ഷോപ്പില്‍ വച്ച് കഴിഞ്ഞ ഒക്ടോബറില്‍ ബസ്മ അഹമ്മദ് കുരങ്ങന്റെ ലൈംഗികാവയവത്തില്‍ സ്പര്‍ശിച്ച് കൊണ്ട് വ്യംഗ്യോക്തിയില്‍ സംസാരിക്കുന്നതും ഉച്ചത്തില്‍ ചിരിക്കുന്നതും വീഡിയോയില്‍ പകര്‍ത്തുകയും പിന്നീട് അത് ഫേസ്ബുക്കിലിടുകയും ചെയ്തിരുന്നു.

യാഥാസ്ഥിതിക മുസ്ലീം രാജ്യമായ ഈജിപ്തില്‍ 90 സെക്കന്‍ഡ് ദൈര്‍ഘ്യമുള്ള ആ വീഡിയോ യുവാക്കളുടേയും വിദ്യാര്‍ത്ഥികളുടേയും ഇടയില്‍ വൈറലായതിനെ തുടര്‍ന്ന് അന്ന് ബസ്മയെ 4 ദിവസത്തേയ്ക്ക് കസ്റ്റഡിയിലെടുത്തിരുന്നു. പിന്നീട് കൂടുതല്‍ അന്വേഷണങ്ങള്‍ക്കായി 15 ദിവസമായി കസ്റ്റഡി കാലാവധി നീട്ടുകയും ചെയ്തു. ബസ്മ ഇതിന് മുമ്പും ഇത്തരം കുറ്റങ്ങള്‍ ചെയ്തിരുന്നുവെന്നാണ് ഒഫീഷ്യലുകള്‍ വെളിപ്പെടുത്തുന്നത്.

എന്നാല്‍ കുരങ്ങനെ അപമാനിക്കാന്‍ വേണ്ടി മനഃപൂര്‍വം ചെയ്ത പ്രവൃത്തിയല്ല ഇതെന്നും അതിനെ ഇക്കിളിപ്പെടുത്താന്‍ മാത്രമേ ഉദ്ദേശിച്ചുള്ളൂ എന്നുമാണ് യുവതി കോടതിയില്‍ പറഞ്ഞത്. ഈജിപ്തില്‍ ഈ വീഡിയോ വന്‍ വിവാദമായിരുന്നു ഉണ്ടാക്കിയത്.

യുവതി കുരങ്ങിനെ അപമാനിച്ചില്ലെന്നും മറിച്ച് അതിന്റെ പ്രതികരണങ്ങള്‍ നിരീക്ഷിക്കുകയായിരുന്നുവെന്നുമാണ് പ്രതിഭാഗം അഭിഭാഷകന്‍ വാദിച്ചിരുന്നത്. തന്റെ സുഹൃത്ത് വീഡിയോ പകര്‍ത്തിയത് തന്റെ അറിവോടെ ആയിരുന്നെങ്കിലും അത് ഫേസ്ബുക്കിലിടുമ്പോള്‍ തന്റെ അനുമതി തേടിയിരുന്നില്ലെന്നും ബസ്മ വാദിച്ചെങ്കിലും ശിക്ഷയില്‍ നിന്നൊഴിവാകാന്‍ സാധിച്ചില്ല.

അമിതവിഷയാസക്തിയ്ക്ക് പ്രേരണ ചെലുത്തി, അശ്ലീലപ്രവൃത്തി പരസ്യമായി ചെയ്തു എന്നീ വകുപ്പുകള്‍ ചുമത്തിയാണ് ഇക്കഴിഞ്ഞ വെള്ളിയാഴ്ച ശിക്ഷ വിധിച്ചിരിക്കുന്നത്.