വെനസ്വേലന്‍ പ്രസിഡന്റായി നിക്കോളാസ് മഡുറോ സത്യപ്രതിജ്ഞ ചെയ്ത് അധികാരമേറ്റു. തുടര്‍ച്ചയായ രണ്ടാംതവണയാണ് മഡുറോ പ്രസിഡന്റാകുന്നത്. കാരക്കാസില്‍ സുപ്രീംകോടതിയുടെ മുമ്പാകെയായിരുന്നു സത്യപ്രതിജ്ഞ. രാജ്യത്തിന്റെ സമാധാനത്തിലേക്കുള്ള ചുവടുവയ്പ്പാണിതെന്ന് മഡുറോ പറഞ്ഞു.

നിക്കാരഗ്വന്‍ പ്രസിഡന്റ് ഡാനിയേല്‍ ഒര്‍ട്ടേഗ, ബൊളീവിയന്‍ പ്രസിഡന്റ് ഇവോ മൊറാലെസ് തുടങ്ങിയവര്‍ സത്യപ്രതിജ്ഞാ ചടങ്ങില്‍ പങ്കെടുത്തു. പ്രതിപക്ഷ നിയന്ത്രണത്തിലുള്ള നാഷണല്‍ അസംബ്ലിയെ ഒഴിവാക്കിയാണ് മഡുറോ സുപ്രീംകോടതിയുടെ മുമ്പാകെ സത്യപ്രതിജ്ഞ ചെയ്തത്. വെനസ്വേലയുമായുള്ള നയതന്ത്രബന്ധം വിച്ഛേദിക്കുകയാണെന്നും കാരക്കാസില്‍ നിന്ന് നയതന്ത്രജ്ഞരെ പിന്‍വലിക്കുകയാണെന്നും മഡുറോ അധികാരമേറ്റയുടന്‍ പരാഗ്വേന്‍ പ്രസിഡന്റ് മരിയോ അബ്‌ഡോ ട്വീറ്റ് ചെയ്തു.

മഡുറോയെ പ്രസിഡന്റായി അംഗീകരിക്കാന്‍ യുഎസ് അടക്കം 14 രാജ്യങ്ങള്‍ ഇതുവരെ തയ്യാറായിട്ടില്ല. മേയ് 20നു നടന്ന വോട്ടെടുപ്പിലാണു മഡുറോ രണ്ടാം വട്ടവും പ്രസിഡന്റായി തെരഞ്ഞെടുക്കപ്പെട്ടത്. 2016 ജനുവരി മുതല്‍ നാഷണല്‍ അസംബ്ലിയില്‍ പ്രതിപക്ഷത്തിനാണു ഭൂരിപക്ഷം.

എന്നാല്‍ 2017ല്‍ മഡുറോയുടെ അനുയായികള്‍ ചേര്‍ന്ന് ഭരണഘടനാ അസംബ്ലി രൂപീകരിച്ചു. വെനസ്വേലന്‍ ഭരണഘടന തിരുത്തിയെഴുതുകയാണു ലക്ഷ്യം.