യുഎന്‍ ജനറല്‍ അസംബ്ലിയിലും മറ്റ് വിവിധ പരിപാടികളിലും പങ്കെടുത്ത ശേഷം പ്രധാനമന്ത്രി നരേന്ദ്രമോദി ഇന്ത്യയിലേക്ക് പുറപ്പെട്ടു. അതിനിടെ മോദി സഞ്ചരിച്ച വിമാനത്തിന് സാങ്കേതിക തകരാര്‍ നേരിട്ടു.ഡല്‍ഹിയിലേക്കുള്ള യാത്രാമധ്യേ ജര്‍മനിയിലെ ഫ്രാങ്ക്ഫര്‍ട്ട് വിമാനത്താവളത്തില്‍ വച്ചായിരുന്നു സംഭവം. ഉടന്‍ തകരാര്‍ പരിഹരിച്ചു.

അതേസമയം അന്താരാഷ്ട്ര സമൂഹം ഭീകരതയ്‌ക്കെതിരെ ഒന്നിക്കുകയും പ്രവര്‍ത്തിക്കുകയും ഭീകരവാദം ഒരു രാജ്യം മാത്രമല്ല ലോകം മുഴുവന്‍ നേരിടുന്ന ഏറ്റവും വലിയ വെല്ലുവിളിയാണെന്നും 74ാമത് യു എന്‍ ജനറല്‍ അസംബ്ലിയില്‍ സംസാരിക്കവേ മോദി പറഞ്ഞു. ഭീകരവാദം ഏതെങ്കിലും രാജ്യത്തിനുമാത്രല്ല എല്ലാ രാജ്യങ്ങള്‍ക്കും മാനവികതയ്ക്കും വെല്ലുവിളിയാണ്. ഐക്യരാഷ്ട്ര സഭയുടെ സമാധാന ദൗത്യം സംരക്ഷിക്കുന്നതില്‍ ലോകത്തെ മറ്റ് രാജ്യങ്ങളെക്കാളും വലിയ വിട്ടുവീഴ്ചകള്‍ ഇന്ത്യ നടത്തിയിട്ടുണ്ട്.
മനുഷ്യരാശിക്കുവേണ്ടി, ഭീകരതയ്‌ക്കെതിരെ ലോകം ഒന്നിക്കണം. ഭീകരവാദം മനുഷ്യരാശിയോട് ചെയ്യുന്ന കാര്യങ്ങളെക്കുറിച്ച് ആഗോളതലത്തില്‍ കൂടുതല്‍ പ്രതിഷേധങ്ങളും പ്രതികരണങ്ങളും ഉണ്ടാകണം അദ്ദേഹം പറഞ്ഞു. സ്വാമി വിവേകാനന്ദന്‍ നല്‍കിയത് ഐക്യത്തിന്റെയും സമാധാനത്തിന്റേയും സന്ദേശമായിരുന്നു, കലഹത്തിന്റേതായിരുന്നില്ല. ലോകത്തിലെ ഏറ്റവും വലിയ ജനാധിപത്യ രാഷ്ട്രം ലോകത്തിന് സമാനമായ സന്ദേശമാണ് നല്‍കാനുള്ളത്, ഐക്യവും സമാധാനവും .