മാള്‍ സന്ദര്‍ശനത്തിനെത്തിയ സ്ത്രീയെ സ്പര്‍ശിച്ച ഇന്ത്യക്കാരന് തടവ് ശിക്ഷ. മുപ്പത്തിരണ്ടുകാരനായ പ്രവാസി ഇന്ത്യക്കാരന്‍ സ്ത്രീയെ സ്പര്‍ശിച്ചത് ദുഷ്ടലാക്കോടെയായിരുന്നുവെന്ന് കോടതി കണ്ടെത്തുകയും ചെയ്തു . മൂന്നുമാസത്തെ തടവ് ശിക്ഷ പൂര്‍ത്തിയാല്‍ ഉടനെ ഇയാളെ ഇന്ത്യയിലേക്ക് നാടുകടത്താനും ദുബായ് കോടതി ഉത്തരവിട്ടു. കഴിഞ്ഞ വര്‍ഷം ആഗസ്റ്റ് 2നായിരുന്നു ഈ സംഭവം നടന്നത്. അല്‍ റഷീദിയ പൊലീസ് സ്റ്റേഷനിലായിരുന്നു കേസ് രജിസ്റ്റര്‍ ചെയ്തത്.

സിറിയ സ്വദേശിയായ മുപ്പത്തിയഞ്ചുകാരിയാണ് യുവാവിനെതിരെ പൊലീസിനെ സമീപിച്ചത്. രണ്ട് കുട്ടികളുടെ അമ്മയായ ഇവര്‍ ആഗസ്റ്റ് രണ്ട് രാവിലെ കുട്ടികളുമായി ഷോപ്പിങിന് എത്തുകയായിരുന്നു. കുട്ടികള്‍ക്ക് കളിപ്പാട്ടങ്ങള്‍ വാങ്ങുന്നതിനിടയിൽ യുവാവ് തന്നെ ശ്രദ്ധിക്കുന്നത് കണ്ടിരുന്നുവെന്നും യുവതി കോടതിയില്‍ പറയുകയുണ്ടായി . കടയില്‍ നിന്നുമിറങ്ങിയ തന്നോട് വളരെ ചേര്‍ന്ന് ഇയാൾ നടന്നുവെന്നും അവർ പറഞ്ഞു. മാറി നടക്കാന്‍ നോക്കുന്നതിനിടെ യുവാവ് പിന്നില്‍ നിന്നും സ്പര്‍ശിക്കുകയായിരുന്നുവെന്നും യുവതി പരാതിയില്‍ പറഞ്ഞിരിക്കുന്നു. മാന്യമായി വസ്ത്രം ധരിച്ച യുവാവ് ഇത്തരം നീചമായ രീതിയില്‍ പെരുമാറുമെന്ന് പ്രതീക്ഷിച്ചിരുന്നില്ലെന്നും അവര്‍ പറയുകയുണ്ടായി.