കാട്ടുതീ ചുട്ടെരിച്ച ഓസ്ട്രേലിയയില്‍ നിന്നും പുറത്തുവരുന്ന മനോഹരമായ ദൃശ്യം എന്ന പേരില്‍ ഇപ്പോള്‍ സമൂഹമാധ്യമങ്ങളില്‍ തരംഗമാകുന്ന ഒരു ചിത്രമുണ്ട്. അനാഥരാക്കപ്പെട്ട ക്വാലക്കുഞ്ഞുങ്ങളെ പാലൂട്ടുന്ന അമ്മക്കുറുക്കന്റെ ദൃശ്യങ്ങളാണത്.

കരിഞ്ഞുണങ്ങി നില്‍ക്കുന്ന കാടിനു നടുവില്‍ കോലക്കുഞ്ഞുങ്ങളെ പാലൂട്ടുന്ന അമ്മക്കുറുക്കന്റെ ദൃശ്യങ്ങളാണ് 30 സെക്കന്‍ഡ് ദൈര്‍ഘ്യമുള്ള ഈ വിഡിയോയിലുള്ളത്. ക്ഷമയോടെ നിന്ന് മൂന്ന് കോലക്കുഞ്ഞുങ്ങളെയാണ് അമ്മക്കുറുക്കന്‍ പാലൂട്ടുന്നതായി സമൂഹമാധ്യമങ്ങളില്‍ പടരുന്നത്.

എന്നാല്‍ ഇന്ത്യാ ടുഡേയുടെ ആന്റി ഫേക്ക്‌ന്യൂസ് വാര്‍ റൂം എന്ന AFWA, കണ്ടെത്തിയിരിക്കുന്നത് പ്രസ്തുത വീഡിയോയ്ക്ക് 6 വര്‍ഷം പഴക്കമുണ്ടെന്നാണ്. ഓസ്‌ട്രേലിയയില്‍ അടുത്തിടെ ഉണ്ടായ കാട്ടുതീയുമായി അതിന് യാതൊരു ബന്ധവുമില്ലെന്നും കുറുക്കന്‍കുഞ്ഞുങ്ങളെ തന്നെയാണ് ആ അമ്മക്കുറുക്കന്‍ പാലൂട്ടുന്നത് എന്നുമാണ് AFWA, കണ്ടെത്തിയിരിക്കുന്നത്.

InVID reverse image, ഗൂഗിള്‍ സെര്‍ച്ച് മുതലായ സങ്കേതങ്ങള്‍ ഉപയോഗിച്ചാണ് ഈ വീഡിയോ വളരെക്കാലമായി ഇന്റര്‍നെറ്റിലുണ്ടെന്നും പല പല കാപ്ഷനുകളില്‍ ഇത് പ്രത്യക്ഷപ്പെട്ടിട്ടുണ്ടെന്നും തങ്ങള്‍ കണ്ടെത്തിയതെന്നാണ് AFWA പറയുന്നത്.

2018-ല്‍ ഈ വീഡിയോ അപ്‌ലോഡ് ചെയ്തുകൊണ്ട് 'എറൗണ്ട് ദ വേള്‍ഡ് ' എന്ന യൂ-ട്യൂബ് ചാനല്‍ പറഞ്ഞിരുന്നത്, കുരങ്ങന്‍ കുഞ്ഞുങ്ങളെ അമ്മക്കുറുക്കന്‍ പാലൂട്ടുന്ന അപൂര്‍വ്വ കാഴ്ച എന്നായിരുന്നുവത്രേ. 'ബാല്‍കന്‍ മ്യൂസിക്' എന്ന യു-ട്യൂബ് ചാനല്‍ 2016-ല്‍ ഈ വീഡിയോ അപ്‌ലോഡ് ചെയ്തു കൊണ്ട് പറഞ്ഞത്, അമ്മക്കുറുക്കന്‍ തന്റെ കുഞ്ഞുങ്ങളെ പാലൂട്ടുന്നതിന്റെ ദൃശ്യങ്ങള്‍ എന്നായിരുന്നുവെന്നും  ആന്റി ഫേക്ക്‌ന്യൂസ് വാര്‍ റൂം വെളിപ്പെടുത്തുന്നു.