കുറ്റകൃത്യങ്ങള്‍ ചെയ്യാന്‍ ഒത്തുചേരുകയും ഗൂഢാലോചന നടത്തുകയും ചെയ്തു എന്ന് ആരോപിച്ച് നൊബേല്‍ പുരസ്‌കാര ജേതാവ് നര്‍ഗീസ് മുഹമ്മദിക്ക് ഇറാന്‍ കോടതി ആറ് വര്‍ഷത്തെ തടവുശിക്ഷ വിധിച്ചു.രണ്ട് വര്‍ഷത്തേക്ക് രാജ്യം വിടുന്നതിനും വിലക്കുണ്ട്.

ഭരണകൂട വിരുദ്ധ പ്രചാരണം നടത്തിയതിന് ഒന്നര വര്‍ഷത്തെ തടവും, കിഴക്കന്‍ പ്രവിശ്യയായ സൗത്ത് ഖൊറാസാനിലെ ഖോസ്ഫ് നഗരത്തിലേക്ക് രണ്ട് വര്‍ഷത്തെ നാടുകടത്തലും വിധിച്ചിട്ടുണ്ടെന്ന് അഭിഭാഷകന്‍ പറഞ്ഞു. ഇറാനിയന്‍ നിയമപ്രകാരം, ഒരേസമയം അനുഭവിക്കേണ്ട ശിക്ഷകളില്‍ ഏറ്റവും ദൈര്‍ഘ്യമുള്ളത് മാത്രം നടപ്പിലാക്കിയാല്‍ മതിയാകും. നര്‍ഗീസിന്റെ ആരോഗ്യപ്രശ്‌നങ്ങള്‍ കണക്കിലെടുത്ത് ചികിത്സയ്ക്കായി അവര്‍ക്ക് താല്‍ക്കാലികമായി ജാമ്യം ലഭിക്കുമെന്ന് പ്രതീക്ഷിക്കുന്നതായും അഭിഭാഷകന്‍ കൂട്ടിച്ചേര്‍ത്തു. ഈ വിധി അന്തിമമല്ലെന്നും ഇതിനെതിരെ അപ്പീല്‍ നല്‍കാന്‍ സാധിക്കുമെന്നും അദ്ദേഹം പറഞ്ഞു.

കഴിഞ്ഞ 25 വര്‍ഷമായി, ഇറാനിലെ വധശിക്ഷയ്ക്കും സ്ത്രീകള്‍ക്കുള്ള കര്‍ശനമായ വസ്ത്രധാരണ രീതിക്കുമെതിരെ പോരാടിയതിന് 53കാരിയായ നര്‍ഗീസ് മുഹമ്മദി പലതവണ ജയിലിലായിട്ടുണ്ട്. കഴിഞ്ഞ പത്ത് വര്‍ഷത്തിനിടയില്‍ ഭൂരിഭാഗം സമയവും അവര്‍ അഴിക്കുള്ളിലായിരുന്നു. 2015ന് ശേഷം പാരീസില്‍ കഴിയുന്ന തന്റെ ഇരട്ടക്കുട്ടികളെ അവര്‍ കണ്ടിട്ടില്ല. ആരോഗ്യപരമായ കാരണങ്ങളാല്‍ 2024 ഡിസംബറില്‍ മൂന്നാഴ്ചത്തേക്ക് അവര്‍ക്ക് ജാമ്യം ലഭിച്ചിരുന്നു.

ജയിലിനുള്ളിലായിരിക്കുമ്പോഴും പ്രതിഷേധങ്ങള്‍ സംഘടിപ്പിച്ചും നിരാഹാര സമരം നടത്തിയും നര്‍ഗീസ് മുഹമ്മദി തന്റെ പോരാട്ടം തുടര്‍ന്നു. ഇറാനിലെ വധശിക്ഷയ്‌ക്കെതിരെയുള്ള പോരാട്ടത്തിനാണ് 2023ല്‍ അവര്‍ക്ക് നൊബേല്‍ സമാധാന പുരസ്‌കാരം ലഭിച്ചത്. അന്ന് അവര്‍ ജയിലിലായിരുന്നതിനാല്‍ മക്കളാണ് അവര്‍ക്ക് വേണ്ടി പുരസ്‌കാരം ഏറ്റുവാങ്ങിയത്.