സാമ്പത്തിക തകര്‍ച്ചയും തൊഴിലില്ലായ്മയും പിടിച്ചു നിര്‍ത്താന്‍ മറ്റു മാര്‍ഗങ്ങളില്ലാതെ കോവിഡ് കേസുകളുടെ എണ്ണത്തിലും വര്‍ധനയുടെ നിരക്കിലും കുറവുണ്ടായെന്ന വിലയിരുത്തലില്‍ കടുത്ത നിയന്ത്രണങ്ങള്‍ നീക്കം ചെയ്ത്, സാധാരണ ജീവിതത്തിലേക്കു മടങ്ങാന്‍ വിവിധ രാജ്യങ്ങള്‍ ശ്രമം തുടങ്ങി.

പ്രവേശനനിയന്ത്രങ്ങളോടെതിയറ്ററുകള്‍, മ്യൂസിയങ്ങള്‍ ഉള്‍പ്പെടെയുള്ള വിനോദകേന്ദ്രങ്ങള്‍ ഘട്ടംഘട്ടമായി തുറക്കാന്‍ ചൈന തയ്യാറെടുക്കുന്നു. 514 കോവിഡ് മരണം റിപ്പോര്‍ട്ട് ചെയ്ത ഡെന്മാര്‍ക്കില്‍ ജൂണ്‍ 8 മുതല്‍ തിയറ്ററുകളും പാര്‍ക്കുകളും മ്യൂസിയങ്ങളും തുറക്കും. ഷോപ്പിങ് മാളുകളും മുതിര്‍ന്ന ക്ലാസ് സ്‌കൂളുകളും വരും ആഴ്ചകളില്‍ തുറക്കും. 10,083 കേസുകളാണ് ഡെന്മാര്‍ക്കില്‍ ഇതുവരെയുള്ളത്.

26,070 പേര്‍ ഇതുവരെ ഫ്രാന്‍സില്‍ മരിച്ചെങ്കിലും കഴിഞ്ഞ ദിവസങ്ങളില്‍ കേസുകളുടെ എണ്ണം കുറവാണ്. തിങ്കളാഴ്ച മുതല്‍ ലോക്ഡൗണ്‍ നീക്കം ചെയ്യാന്‍ ഫ്രാന്‍സ്. എന്നാല്‍, റെഡ് സോണായി തുടരുന്ന പാരിസില്‍ ചില നിയന്ത്രണങ്ങള്‍ തുടരും.

യുഎസിലെ മിഷിഗന്‍, കലിഫോര്‍ണിയ, ഒഹായോ സംസ്ഥാനങ്ങള്‍ ഫാക്ടറികള്‍ തുറക്കുന്നു. മിഷിഗനില്‍ തിങ്കളാഴ്ച മുതല്‍ ഫാക്ടറികള്‍ തുറക്കും. ഓട്ടൊമൊബീല്‍ കമ്പനികളുടെ കേന്ദ്രമാണ് മിഷിഗന്‍. കലിഫോര്‍ണിയയില്‍ കര്‍ശന നിയന്ത്രണങ്ങളോടെ കമ്പനികള്‍ തുറക്കാന്‍ അനുമതി നല്‍കി. ഒഹായോയിലും തിങ്കളാഴ്ച മുതല്‍ ഫാക്ടറികള്‍ക്കു പ്രവര്‍ത്തിക്കാം.

ജൂലൈയോടെ മിക്കവാറും നിയന്ത്രണങ്ങള്‍ ഒഴിവാക്കാനാണ് ഓസ്‌ട്രേലിയയുടെ പദ്ധതി. 3 ഘട്ടമായി നിയന്ത്രണങ്ങള്‍ നീക്കാനാണ് നീക്കം. ആദ്യഘട്ടത്തില്‍ ഹോട്ടലുകളിലും കഫെകളിലും പാഴ്‌സല്‍ നല്‍കും. കൂടുതല്‍ കോവിഡ് കേസുകള്‍ ഉണ്ടായില്ലെങ്കില്‍ ജിം, തിയറ്റര്‍, ആര്‍ട് ഗാലറികള്‍ എന്നിവയ്ക്ക് അനുമതി നല്‍കും. എന്നാല്‍, 20 പേര്‍ക്കേ തുടക്കത്തില്‍ ഒരു സമയത്തു പ്രവേശനമുണ്ടാകൂ.

തെക്കു കിഴക്കന്‍ ഏഷ്യയിലെ ഏറ്റവും വലിയ സമ്പദ്‌വ്യവസ്ഥയായ ഇന്തൊനീഷ്യ നിയന്ത്രണങ്ങള്‍ നീക്കാനുള്ള ശ്രമം തുടങ്ങി. കിഴക്കന്‍ ഏഷ്യയില്‍ ചൈന കഴിഞ്ഞാല്‍ ഏറ്റവും കൂടുതല്‍ കോവിഡ് മരണം ഇന്തൊനീഷ്യയിലാണ് - 930. രോഗവ്യാപനം കൈകാര്യം ചെയ്ത രീതിയും ഏറെ വിമര്‍ശിക്കപ്പെട്ടിരുന്നു. എന്നാല്‍, സാമ്പത്തിക പ്രവര്‍ത്തനങ്ങള്‍ പുനരാരംഭിക്കാതെ പിടിച്ചുനില്‍ക്കാനാകാത്ത സാഹചര്യമായതിനാലാണ് നിയന്ത്രണങ്ങള്‍ നീക്കുന്നത്. 20 ലക്ഷം പേര്‍ക്കാണ് ഒന്നരമാസത്തിനിടെ ജോലി നഷ്ടപ്പെട്ടത്.