സാമ്പത്തികശക്തിയില് ലോകത്ത് ഒന്നാം സ്ഥാനക്കാരായ അമേരിക്ക അക്ഷരാര്ഥത്തില് കൊവിഡ് മഹാമാരിയില് തകര്ന്നടിയുകയാണ്
09 MAY 2020 10:23 AM IST
മലയാളി വാര്ത്ത
യുഎസ് സമ്പദ് വ്യവസ്ഥ കടുത്ത സാമ്പത്തിക പ്രതിസന്ധിയിലേക്ക് എടുത്തെറിയപ്പെട്ടു എന്നാണ് രേഖകള് വ്യക്തമാക്കുന്നത്. എന്നാല് ഇതിനേക്കാള് എത്രയോ മുകളിലാണ് യഥാര്ത്ഥ കണക്കുകള്. ഇതുവരെ തൊഴിലില്ലായ്മ ആനുകൂല്യങ്ങള്ക്ക് അപേക്ഷിച്ചവരല്ലാത്തവരുടെ കണക്കുകള് സര്ക്കാര് ശേഖരിച്ചിട്ടില്ല. അതേസമയം ഏപ്രിലിലെ കണക്ക് കുറവാണെന്നും സാമ്പത്തിക വിദഗ്ധര് ചൂണ്ടിക്കാണിക്കുന്നു. കഴിഞ്ഞ മാസം 20 ശതമാനത്തോളം തൊഴിലില്ലായ്മ നിരക്ക് കുതിച്ചിട്ടുണ്ടെന്ന് പ്രമുഖ സാമ്പത്തിക ശാസ്ത്രജ്ഞനായ പോള് ആഷ്വര്ത്ത് പറയുന്നു. പുരുഷന്മാരില് 13 ശതമാനവും സ്ത്രീകളില് 15.5 ശതമാനവുമാണ് തൊഴിലില്ലായ്മ ബാധിച്ചിരിക്കുന്നത്.
അതേസമയം വെളുത്ത വര്ഗക്കാരില് 14.2 ശതമാനവും കറുത്ത വര്ഗക്കാരില് 16.7 ശതമാനവും ഏഷ്യന് വംശജരില് 14.5 ശതമാനവും ഹിസ്പാനിയന്സില് 18.9 ശതമാനവുമാണ് തൊഴിലില്ലായ്മ നിരക്ക്. രാജ്യത്തെ എല്ലാ തൊഴില് മേഖലയും കഴിഞ്ഞ മാസം വന് തകര്ച്ചയെ നേരിട്ടു. ഹോട്ടല് മേഖലയിലാണ് വന് തകര്ച്ച കൂടുതലായും ഉണ്ടായത്. 47 ശതമാനമാണ് ഇടിവ്. ഭക്ഷണ, മദ്യ, പാനീയ മേഖലകളില് 5.5 മില്യണ് പേര്ക്കാണ് തൊഴില് നഷ്ടപ്പെട്ടത്. വിദ്യാഭ്യാസ-ആരോഗ്യ മേഖലകളില് 2.5 മില്യണ് പേര്ക്ക് തൊഴിലില്ലാതായി. ആരോഗ്യ മേഖലയില് അധികവും ദന്തരോഗ വിദഗ്ധരെയാണ് തൊഴിലില്ലായ്മ ബാധിച്ചത്. 1.4 മില്യണ് പേര്ക്കാണ് ആരോഗ്യ മേഖലയില് മാത്രം തൊഴിലില്ലാതായത്.ഓരോ ദിവസവും ആയിരക്കണക്കിനാളുകള് രോഗബാധിതരാകുമ്പോള് മെഡിക്കല് ഉപകരണങ്ങള്ക്കായും മരുന്ന് ഗവേഷണത്തിനായും വന് തുകയാണ് അമേരിക്കന് ഭരണകൂടം ചെലവാക്കുന്നത്. കൊറോണ വൈറസിനെ തുരത്താനുള്ള മരുന്നും വാക്സിനും വികസിപ്പിക്കാനുള്ള ഗവേഷണങ്ങള് ഊര്ജിതമായി നടക്കുന്നുണ്ട്. എന്നാല് മറുവശത്ത് രോഗം ബാധിക്കുന്നവരുടെ എണ്ണം കുതിക്കുകയാണ്. വിവിധ മരുന്നുകള് ചികിത്സയ്ക്കായി പരീക്ഷിക്കുന്നതും തുടരുകയാണ്. രോഗവ്യാപനത്തെ തുടര്ന്ന് വിപണി അടച്ചിട്ടതും അമേരിക്കയെ തളര്ത്തുന്നുണ്ട്
തൊഴിലില്ലായ്മയും സാമ്പത്തിക തകര്ച്ചയും രൂക്ഷമാകുമ്പോള് അമേരിക്കയിലെ പകുതിയോളം സംസ്ഥാനങ്ങള് നിയന്ത്രണങ്ങള് നീക്കാന് ഒരുങ്ങുകയാണ്. രണ്ടാഴ്ച മുമ്പാണ് മൂന്ന് ഘട്ടങ്ങളിലായി വിപണി തുറക്കാനുള്ള മാര്ഗനിര്ദേശം യുഎസ് പ്രസിഡന്റ് ഡോണള്ഡ് ട്രംപ് മുന്നോട്ടുവെച്ചത്. എന്നാല് രോഗവ്യാപനം രൂക്ഷമായ ന്യൂയോര്ക്ക്, കാലിഫോര്ണിയ ഉള്പ്പെടെയുള്ള സംസ്ഥാനങ്ങള് പ്രസിഡന്റിന്റെ നിയന്ത്രണങ്ങള് നീക്കുന്നതിനെ എതിര്ത്തു. വൈറ്റ് ഹൗസ് മാര്ഗനിര്ദേശങ്ങള് നല്കിയെങ്കിലും നിയന്ത്രണങ്ങള് നീക്കാനുള്ള അധികാരം സംസ്ഥാന ഗവര്ണര്മാര്ക്ക് നല്കുകയായിരുന്നു. തുടര്ന്ന ചില സംസ്ഥാനങ്ങള് ചെറിയ ഇളവുകള് പ്രഖ്യാപിച്ചിരുന്നു.
നിര്മാണ മേഖലയില് 1.3 മില്യണ് പേര്ക്ക് തൊഴില് നഷ്ടമായി. അതേസമയം യുഎസ് വിപണി എപ്പോള് കരകയറുമെന്ന കാര്യത്തില് ഒരാള്ക്കും കൃത്യമായ ഉത്തരമില്ല. നിക്ഷേപകരുടെ വിശ്വാസം വീണ്ടെടുക്കലാണ് പ്രധാന ലക്ഷ്യം. പലരുടെയും വരുമാനം ജോലി ലഭിച്ചാലും കുറയുമെന്നാണ് സൂചന. നേരത്തെ 2009ലെ ആഗോള സാമ്പത്തിക മാന്ദ്യത്തിലും ഇതേ പ്രതിസന്ധിയുണ്ടായിരുന്നു. അതേസമയം ഇതൊന്നും പ്രശ്നമില്ലെന്ന തരത്തിലാണ് ട്രംപ് പ്രതികരിച്ചത്. ഈ പ്രതിസന്ധി ഞാന് പ്രതീക്ഷിച്ചതാണ്. അതില് അദ്ഭുതമില്ല. ഈ പ്രതിസന്ധി പരിഹരിക്കും. ഞാന് വിപണിയെ തിരിച്ച് കൊണ്ടുവരുമെന്നും ട്രംപ് പറഞ്ഞു. എന്നാല് ഇത് വിചാരിച്ച പോലെ എളുപ്പമാകില്ലെന്നാണ് സൂചന.
അപ്പപ്പോഴുള്ള വാര്ത്തയറിയാന് ഞങ്ങളുടെ ഫേസ്ബുക്ക് പേജ് LIKE ചെയ്യുക
https://www.facebook.com/Malayalivartha
https://www.facebook.com/Malayalivartha
