പ്രതിവര്‍ഷം കോടിക്കണക്കിന് കുട്ടികള്‍ക്കാണ് ക്ഷയരോഗം വരാതിരിക്കാനുള്ള ബിസിജി വാക്സിന്‍ നല്‍കുന്നത്. മനുഷ്യരാശിയെ കൊന്നൊടുക്കുന്ന കോവിഡ് മഹാമാരിയുടെ വര്‍ത്തമാനത്തിലും ഔദ്യോഗികമായി സ്ഥിരീകരിക്കപ്പെട്ടിട്ടില്ലെങ്കിലും ബിസിജി കൊവിഡിന് ഫലപ്രദമാണ് എന്ന തരത്തില്‍ റിപ്പോര്‍ട്ടു പുറത്തുവരുന്നു. ഇപ്പോഴാകട്ടെ ലോകം നേരിടുന്ന വലിയൊരു പൊതു ജനാരോഗ്യ പ്രശ്നത്തില്‍ ബിസിജിയുടെ സഹായഹസ്തങ്ങള്‍ എത്തുന്നു എന്നുള്ളത് നിസാരകാര്യമല്ല എന്നാണ് വിദഗ്ദരുടെ വിലയിരുത്തല്‍

ഇന്ത്യയടക്കമുള്ള വികസ്വര രാജ്യങ്ങളില്‍ ഇന്നും വലിയ പൊതുജനാരോഗ്യ പ്രശ്നമായി തുടരുന്ന ക്ഷയരോഗത്തിനെതിരായുള്ള പ്രതിരോധവാക്സിനായ ബിസിജി ആദ്യം പരീക്ഷിക്കപ്പെട്ടത് 1921-ല്‍ ആയിരുന്നു. വാക്സിന്‍ വികസിപ്പിച്ചെടുത്ത മൂന്നു ഗവേഷകരുടെ പേരുകളുടെ ആദ്യത്തെ അക്ഷരങ്ങള്‍ ചേര്‍ത്താണ് ബിസിജി എന്ന പേര് വാക്സിന് നല്‍കിയത്.

ഭൂഗോളത്തില്‍ ഓരോ വര്‍ഷവും ഏകദേശം 80 ലക്ഷം പേര്‍ക്കെങ്കിലും ടിബി അഥവാ ക്ഷയരോഗം പിടിപെടുന്നുണ്ടെന്നും അവരില്‍ നാലിലൊന്ന് പേര്‍ മരണപ്പെടുന്നുണ്ടെന്നുമാണ് കണക്ക്. ഇരുപതാം നൂറ്റാണ്ടില്‍ മാത്രം ക്ഷയരോഗം കൊന്നൊടുക്കിയത് പത്തുകോടി ജനങ്ങളെയാണ്. ബിസിജി എന്ന വാക്സിന്‍ രക്ഷിച്ചു കൊണ്ടിരിക്കുന്നത് കോടിക്കണക്കിന് മനുഷ്യജീവനകളാണെന്ന് ചുരുക്കം. ഇതിനിടെ കൊറോണവൈറസ് കാലത്ത് ബിസിജി വാക്സിന്‍ വീണ്ടും വാര്‍ത്തകളില്‍ നിറഞ്ഞിരുന്നു. ബിസിജി കുത്തിവെയ്പ് തങ്ങളുടെ സാര്‍വത്രികരോഗ പ്രതിരോധ പ്രവര്‍ത്തനങ്ങളുടെ ഭാഗമാക്കി. കുഞ്ഞുങ്ങള്‍ക്ക് നല്‍കി വരുന്ന രാജ്യങ്ങളില്‍ കോവിഡ് മരണനിരക്ക് കുറവാണെന്ന ഒരു പഠനമാണ് ശ്രദ്ധ പിടിച്ചുപറ്റിയത്. ബിസിജി വാക്സിന്റെ പെരുമ അതുകൊണ്ടും തീരുമെന്ന് തോന്നുന്നില്ല. ഇപ്പോഴിതാ, സയന്‍സ് ട്രാന്‍സലേഷണല്‍ മെഡിസിന്‍ ജേണലില്‍ വന്ന ഏറ്റവും പുതിയ പഠനമനസരിച്ച് നവജാത ശിശുക്കളില്‍ രക്തത്തിലെ അണുബാധ മൂലമുണ്ടാകുന്ന മരണത്തില്‍ നിന്ന് സംരക്ഷണം നല്‍കാനും ബിസിജി പ്രതിരോധ കുത്തിവയ്പ് സഹായിക്കുന്നതായി കണ്ടെത്തിയിരിക്കുന്നു.

രക്തത്തിലെ അണുബാധ (ടലുശെ)െ മൂലമുണ്ടാകുന്ന മരണസാധ്യത ദശലക്ഷകണക്കിന് നവജാത ശിശുക്കള്‍ നേരിടുന്ന ഭീഷണിയാണ്. ബിസിജി കുത്തിവെയ്പ് കഴിഞ്ഞ് മൂന്നു ദിവസത്തിനുള്ളില്‍ സെപ്സിസ് മൂലമുണ്ടാകുന്ന മരണ നിരക്കില്‍ കുറവുണ്ടാകുന്നതായി അമേരിക്കയിലെ ബ്രിട്ടിഷ് കൊളംബിയ സര്‍വകലാശാലയിലെ ബ്രയോണ്‍ ബ്രൂക്കിന്റെ നേതൃത്വത്തില്‍ നടന്ന പഠനം പറയുന്നു. എങ്ങനെയാണ് ഇത്തരത്തിലൊരു സംരക്ഷണം ബിസിജി നല്‍കുന്നതെന്ന് കൃത്യമായി മനസ്സിലാക്കാന്‍ കഴിഞ്ഞിട്ടില്ലെങ്കിലും എലികളെ മാതൃകകളാക്കി നടത്തിയ പഠനത്തില്‍ ചില പുതിയ കാര്യങ്ങള്‍ വ്യക്തമായിരുന്നു.