ദക്ഷിണ കടലിടുക്കില് ചൈനയെ വളഞ്ഞ് യുഎസ് യുദ്ധക്കപ്പലുകള്; തീര്ത്തുകളയുമെന്ന് യുഎസ് സ്റ്റേറ്റ് സെക്രട്ടറി; ഇന്ത്യയും ചൈനയും സേനാവിന്യാസം കൂട്ടി
ഇന്ത്യയ്ക്കും തെക്കുകിഴക്കന് ഏഷ്യന് രാജ്യങ്ങള്ക്കും നേരെയുളള ചൈനയുടെ ഭീഷണി കണക്കിലെടുത്ത് ദക്ഷിണ ചൈന കടലില് അമേരിക്കയുടെ സേനാ വിന്യാസം. ഇന്ത്യയ്ക്കും തെക്ക് കിഴക്കന് ഏഷ്യന് രാജ്യങ്ങള്ക്കും ദക്ഷിണ ചൈന കടല് മേഖലയിലും ചൈനീസ് സൈന്യം ഭീഷണി ഉയര്ത്തുന്ന സാഹചര്യത്തില് അത് നേരിടാന് സേനയെ വിന്യസിച്ചിരിക്കുകയാണെന്ന് യുഎസ് സ്റ്റേറ്റ് സെക്രട്ടറി മൈക്ക് പോംപെയോ പറഞ്ഞു.
കഴിഞ്ഞമാസം ആദ്യംമുതല് യഥാര്ഥ നിയന്ത്രണരേഖയില് ചൈന വന്തോതില് സൈനികവിന്യാസവും ആയുധസജ്ജീകരണവും നടത്തുന്നുണ്ടെന്ന് ഇന്ത്യ. ഇത് ഇരുരാജ്യവും തമ്മില് നിലവിലുള്ള വിവിധ ഉഭയകക്ഷി കരാറുകള്ക്കു യോജിച്ചതല്ല. അതിര്ത്തിയില് സമാധാനവും സ്ഥിരതയും ഉറപ്പാക്കാന് യഥാര്ഥ നിയന്ത്രണരേഖയെ (എല്.എ.സി.) അംഗീകരിക്കണം. ഉഭയകക്ഷി കരാര് വ്യവസ്ഥകള് പാലിക്കണം. നിലവിലെ സ്ഥിതി തുടരുന്നത് പരസ്പരബന്ധത്തിന്റെ അന്തരീക്ഷം വഷളാക്കുമെന്ന് വിദേശകാര്യമന്ത്രാലയം പറഞ്ഞു. ചൈനീസ് പ്രതിരോധ-വിദേശകാര്യ മന്ത്രാലയങ്ങളുടെ പ്രതികരണങ്ങള്ക്കു മറുപടിയെന്ന നിലയിലാണ് മന്ത്രാലയത്തിന്റെ വിശദീകരണം.
ഗാല്വന് താഴ്വരയില് ഈ മാസം 15-നുണ്ടായ ഏറ്റുമുട്ടല് ചൈനയുടെ ഏകപക്ഷീയമായ നടപടികള് മൂലമാണെന്ന് ഇന്ത്യ ആവര്ത്തിച്ചു. ഏറ്റുമുട്ടലിനുശേഷം ഇരുവിഭാഗവും സൈനികവിന്യാസം വര്ധിപ്പിച്ചിട്ടുണ്ടെന്നും ആയുധം സംഭരിക്കുന്നുണ്ടെന്നും വിദേശകാര്യമന്ത്രാലയ വക്താവ് അനുരാഗ് ശ്രീവാസ്തവ പറഞ്ഞു.
1993-ലെ പ്രധാന കരാറുള്പ്പെടെ നിലവിലുള്ള വിവിധ ധാരണകള്ക്ക് യോജിച്ചതല്ല ഇത്. ഇരുരാജ്യവും തമ്മില് സൗഹൃദവും നല്ല അയല്പക്കബന്ധവും സൂക്ഷിക്കാനുതകുന്ന രീതിയില് യഥാര്ഥ നിയന്ത്രണരേഖയില് കുറഞ്ഞതോതില് സൈനികവിന്യാസം നടത്തണമെന്നാണ് 1993-ലെ കരാര് വ്യവസ്ഥചെയ്യുന്നത്.
ഗാല്വന് താഴ്വരയില് ഇന്ത്യയുടെ പരമ്പരാഗത പട്രോളിങ് രീതി തടസ്സപ്പെടുത്താന് കഴിഞ്ഞമാസം ആദ്യം ചൈന ശ്രമിച്ചിരുന്നു. എന്നാല്, ഈ പ്രശ്നം ഉഭയകക്ഷി ധാരണയെ അടിസ്ഥാനമാക്കി ഗ്രൗണ്ട് കമാന്ഡര്മാര് നടത്തിയ ചര്ച്ചയിലൂടെ പരിഹരിച്ചു. വീണ്ടും പ്രശ്നമുണ്ടായപ്പോള് ഈ മാസം ആറിന് ഇരുരാജ്യങ്ങളുടെയും ഉന്നത കമാന്ഡര്മാര് യോഗംചേര്ന്ന് എല്.എ.സി.യില്നിന്ന് സൈന്യത്തെ പിന്വലിക്കാന് ധാരണയുണ്ടാക്കി. ചൈന ഈ ധാരണയില്നിന്നു പിന്മാറി എല്.എ.സി.യില് നിര്മാണ പ്രവര്ത്തനങ്ങള് നടത്തി. ഈ ശ്രമം പരാജയപ്പെട്ടപ്പോള്, 15-ന് ഗാല്വനില് ഏറ്റുമുട്ടലിനു വഴിയൊരുക്കി. അതിനുശേഷം ഇരുവിഭാഗവും നയതന്ത്ര-സൈനിക തല ചര്ച്ചകള് തുടരുകയാണ്. അതിനിടയില്ത്തന്നെ ഇരുരാജ്യവും വന്തോതില് അതിര്ത്തി മേഖലയില് സൈന്യത്തെ വിന്യസിച്ചിട്ടുണ്ട്.
ഇന്ത്യന് സൈന്യം എല്.എ.സി.യെ മാനിക്കുന്നുണ്ട്, അതു പാലിക്കുന്നുമുണ്ട്. ഇന്ത്യ നടത്തുന്ന എല്ലാ നിര്മാണപ്രവര്ത്തനങ്ങളും എല്.എ.സി.യില് ഇന്ത്യയുടെ ഭാഗത്താണ്. തത്സ്ഥിതി മാറ്റാന് ഒരു നടപടിയും ഏകപക്ഷീയമായി സ്വീകരിച്ചിട്ടില്ല. എന്നാല്, ഇത് ചൈന പാലിച്ചിട്ടില്ല. അതിനാല് വീണ്ടും വീണ്ടും ഏറ്റുമുട്ടലിന് ഇത് ഇടയാക്കുകയാണ് -മന്ത്രാലയം പറഞ്ഞു.
https://www.facebook.com/Malayalivartha
