കോവിഡ് നിയന്ത്രണം പാലിച്ചുകൊണ്ട് കുര്‍ബാന നടത്തുകയായിരുന്ന ലെബനനിലെ ഒരു പള്ളിയുടെ മേല്‍ക്കൂര ഇരട്ട സ്ഫോടനത്തില്‍ തകര്‍ന്ന് പുരോഹിതനുമേല്‍ പതിക്കുന്ന വിഡിയോ പുറത്ത്.

വിശ്വാസികള്‍ ഓണ്‍ലൈനിലൂടെ കുര്‍ബാനയില്‍ പങ്കെടുത്തുകൊണ്ടിരുന്നതിനാല്‍ ദുരന്തവ്യാപ്തി കുറഞ്ഞു. കുര്‍ബാനയുടെ ലൈവ് സ്ട്രീമിങ്ങിലൂടെയാണു വിശ്വാസികള്‍ ഞട്ടിക്കുന്ന കാഴ്ച കണ്ടത്. ആദ്യം സ്ഫോടന ശബ്ദമാണു കേട്ടത്. കെട്ടിടം വിറയ്ക്കുകയും വൈദ്യുതിബന്ധം വിചേ്ഛദിക്കപ്പെടുകയും ചെയ്തു. എങ്കിലും വൈദികന്‍ കുര്‍ബാന തുടര്‍ന്നു.

പെട്ടെന്ന് മദ്ബഹായുടെ മുകളിലെ സീലിങ് ഇടിഞ്ഞുവീഴാന്‍ തുടങ്ങി. രക്ഷപെടാന്‍ ശ്രമിക്കുന്ന അദ്ദേഹത്തിനു മുകളിലേക്കു മേല്‍ക്കൂരയുടെ ഭാഗങ്ങള്‍ വീഴുന്നതായി ദൃശ്യങ്ങളിലുണ്ട്. അദ്ദേഹത്തിന്റെ ഇപ്പോഴത്തെ അവസ്ഥ വ്യക്തമല്ല. സ്ഫോടനത്തില്‍ 137 പേര്‍ മരിച്ചെന്നാണ് ഔദ്യോഗിക കണക്ക്. 5,000 പേരാണു ചികിത്സയില്‍ കഴിയുന്നത്.