ജപ്പാനിലെ പുതിയ ടോയ്‌ലറ്റാണ് ഇപ്പോൾ സമൂഹ മാധ്യമങ്ങളിൽ ചർച്ചയാകുന്നത് ... #TokyoToilet എന്ന ഹാഷ്ടാഗിൽ സമൂഹ മാധ്യമങ്ങളിൽ ധാരാളം ഫോട്ടോകൾ ആണ് പോസ്റ്റ് ചെയ്യുന്നത്...

തലസ്ഥാന നഗരമായ ടോക്യോയിലെ പാർക്കിൽ നിപ്പോൺ ഫൌണ്ടേഷൻ പുതുതായി നിർമ്മിച്ച ഈ പൊതു ശൗച്യാലയം ഒരു പക്ഷെ നിങ്ങൾ ലോകത്തെവിടെയും കണ്ടിരിക്കാൻ സാധ്യതയില്ല. ജപ്പാൻകാരുടെ സ്വതസിദ്ധമായ 'ടെക്നോളോജിക്കൽ ബ്രില്ലിയൻസ്' അതിന്റെ തന്മയത്വത്തോടെ കാണിക്കുന്നതാണ് പുത്തൻ 'ഫുൾ ഓപ്പൺ' ടോയ്ലറ്റ്

ടോക്കിയോ നഗരത്തിലെ യോയോഗി ഫുകമാക്കി മിനി പാർക്കിലും, ഹാരു-നോ-ഒഗാവ കമ്മ്യൂണിറ്റി പാർക്കിലും സ്ഥാപിച്ചിരിക്കുന്ന ടോയ്‌ലെറ്റുകളുടെ ചുവരുകൾ നല്ല ഒന്നാംതരം ഗ്ലാസ് ആണ് . അകത്ത് നടക്കുന്നത് പുറത്താർക്കും കാണാൻ പറ്റാത്ത വിധമുള്ള ഗ്ലാസ് അല്ല. സുതാര്യമായ ഗ്ലാസ്. ഇതിനകത്ത് ഇരുന്നു എങ്ങനെ കാര്യം സാധിക്കും എന്നോർത്ത് വിഷമിക്കണ്ട. അവിടെയാണ് ജാപ്പനീസ് ബ്രില്ലിയൻസ്.

പല നിറങ്ങളിലാണ് ഈ ടോയ്ലറ്റുകളുടെ സുതാര്യമായ ഗ്ലാസ്സുകൾ തയ്യാറക്കിയിരിക്കുന്നത്. അകത്ത് നടക്കുന്നതൊക്കെ പുറമെയുള്ളവർക്ക് കൃത്യമായി കാണാം. പക്ഷെ ഒരാൾ ഈ ബാത്റൂമിലെ അകത്തുകയറി വാതിലടച്ചാൽ ഈ ഗ്ലാസ് പതിയെ അകത്തെ കാഴ്ചകൾ അവ്യക്തമാക്കും. ഗ്ലാസിൽ സ്റ്റിക്കർ പതിച്ചതുപോലെയുള്ള എഫക്റ്റ് വരുന്നതോടെ അകത്തുനടക്കുന്ന കാര്യങ്ങൾ മാലോകർ അറിയും എന്ന പേടിയില്ലാതെ ചെയ്യാം

ബാത്റൂമിലെ അകത്ത് കയറാതെ തന്നെ അകം വീക്ഷിക്കാനും വൃത്തിയുള്ളത് എന്ന് തോന്നിയാൽ മാത്രം ഉപയോഗിക്കാനുമുള്ള സൗകര്യം ആണ് ഈ ടോയ്‌ലെറ്റ് ബാത്റൂമുകൾ ഒരുക്കുന്നത്. മാത്രമല്ല രാത്രികാലങ്ങളിൽ ഗ്ലാസിന്റെ നിറത്തിനനുസരിച്ച് പ്രകാശിക്കുന്നത് ഏറെ ഭംഗിയും പാർക്കിന് നൽകുന്നുണ്ട്.

വെറൈറ്റി ആയ ശൗച്യാലയം കാണാൻ ധാരാളം പേരാണ് ടോക്യോയിലെ ഈ പാർക്കുകളിൽ എത്തുന്നത്.