1970 -80 കാലഘട്ടത്തിൽ അമേരിക്കയെ പിടിച്ചു കുലുക്കിയ ഗോള്‍ഡൻ സ്റ്റേറ്റ് കില്ലര്‍ക്ക് അവസാനം ജീവപര്യന്തം ശിക്ഷ വിധിച്ചു... മുൻ കാലിഫോര്‍ണിയൻ പോലീസ് ഉദ്യോഗസ്ഥനായിരുന്ന ജോസഫ് ജെയിംസ് ഡിആഞ്ജെലോയ്ക്കാണ് ശിക്ഷ ലഭിച്ചത്.

74 കാരനായ ഇയാള്‍ 13 കൊലപാതകങ്ങളും ഡസണ്‍ കണക്കിന് ബലാസംഗങ്ങളും നിരവധി മറ്റ് കുറ്റകൃത്യങ്ങളുമാണ് ചെയ്തിട്ടുള്ളത് എന്നാണു കുറ്റപത്രത്തിൽ പറയുന്നത് . പതിറ്റാണ്ടുകള്‍ക്ക് ശേഷം 2018ലാണ് ഈ കുപ്രസിദ്ധ കുറ്റവാളിയെ പോലീസ് അറസ്റ്റ് ചെയ്യുന്നത്.

2018 ഏപ്രിൽ 24നാണ് ഡിഅ‌ഞ്ജലോയെ അറസ്റ്റ് ചെയ്യുന്നത്. ഡിഎൻഎ സാമ്പിളുകളുടെ സഹായത്തോടെ നടത്തിയ അന്വേഷങ്ങള്‍ക്ക് ഒടുവിലായിരുന്നു അറസ്റ്റ്. അറസ്റ്റ് ചെയ്യുമ്പോള്‍ ഇയാള്‍ തീര്‍ത്തും അവശനായിരുന്നുവെന്നാണ് റിപ്പോര്‍ട്ടുകള്‍. വീൽചെയറിലാണ് ഇയാള്‍ കോടതിയിലെത്തിയത്.

തുറന്ന കോടതിയിൽ മൂന്ന് ദിവസമായി പീഡനത്തിന് ഇരയായവരുടേയും അവരുടെ ബന്ധുക്കളുടേയും മൊഴിയെടുത്ത ശേഷമാണ് ഇയാള്‍ക്കെതിരെ കോടതി വിധി പുറപ്പെടുവിച്ചത്. ഒരു പരോളിന് പോലും അര്‍ഹനല്ല എന്നും കോടതി പരാമര്‍ശിച്ചു. വൈകാരിക നിമിഷങ്ങളായിരുന്നു കോടതി മുറിയിൽ അരങ്ങേറിയത് എന്നാണ് മാധ്യമങ്ങള്‍ റിപ്പോര്‍ട്ട് ചെയ്യുന്നതത്.

ഒരു പോലീസ് ഉദ്യോഗസ്ഥൻ തന്നെ ക്രൂരമായി ബലാത്സംഗം ചെയ്തുവെന്നത് എന്തൊരു വിഷമകരമായ കാര്യമാണ്. ഇയാളുടെ പീഡനത്തിന് ഇരയായ സ്ത്രീ കോടതിയിൽ പറഞ്ഞു. 1978ല്‍ സാന്‍ സ്റ്റോക്ടോണിൽ ഒരു വീട്ടിൽ വച്ചായിരുന്നു ഇവര്‍ക്ക് നേരെ ഇയാളുടെ ആക്രമണമുണ്ടായത്. തന്റെയൊപ്പമുണ്ടായിരുന്ന പുരുഷ സുഹൃത്തിനെ കെട്ടിയിട്ട ശേഷം തന്നെ ആക്രമിക്കുകയായിരുന്നുവെന്നാണ് ഇവര്‍ വ്യക്തമാക്കിയത്.

സേവനങ്ങള്‍ക്കും സംരക്ഷണത്തിനുമായി സത്യപ്രതിജ്ഞ ചെയ്ത ഒരാള്‍ അതിന്റെ വൈദഗ്ദ്ധ്യം ഉപയോഗിച്ച് ബലാത്സംഗത്തിനും അക്രമങ്ങള്‍ക്കും ഉപയോഗിക്കുന്നത് അമ്പരപ്പിക്കുന്നതായിരുന്നുവെന്നും വനിത പറഞ്ഞു.

ഡിഅ‌ഞ്ജലോ 1975നും 1986നും ഇടയിലായി 13 കൊലപാതകങ്ങളും അതിനോട് അനുബന്ധിച്ചുള്ള ബലാത്സംഗവും ചെയ്തുവെന്ന് കുറ്റം സമ്മതിക്കുകയും ചെയ്തു. അതിന് പുറമെ 50ലധികം ബലാത്സംഗങ്ങളും 120 കൊള്ളകളും ഇയാള്‍ നടത്തിയിട്ടുണ്ട്

രാത്രിയുടെ മറവിൽ കറുത്ത മുഖംമൂടിയും ധരിച്ചെത്തിയായിരുന്നു ഇയാളുടെ ആക്രമണം. വിയറ്റ്നാം യുദ്ധത്തിൽ പങ്കെടുത്ത ശേഷമാണ് ഇയാള്‍ കാലിഫോര്‍ണിയ പോലീസിൽ ജോലി ചെയ്യുവാന്‍ എത്തിയത് അതിനു ശേഷം 1973ലായിരുന്നു ഇയാളുടെ ആദ്യ കൊലപാതകം

അക്കാലത്ത് ആ പ്രദേശത്ത് നടന്ന വിവിധ സീരിയൽ കൊലപാതകത്തിന്റെ അന്വേഷണ ചുമതലകളിലും ഇയാള്‍ ഭാഗമായിരുന്നു. പിന്നീട് ഒരു മോഷണത്തിനിടെ ഇയാളെ പിടികൂടുകയും ജോലിയിൽ നിന്നും പിരിച്ചുവിടുകയും ചെയ്തു. തുടര്‍ന്നാണ് തന്റെ കുറ്റകൃത്യങ്ങള്‍ ചെയ്യുവാന്‍ തുടങ്ങിയത്. 1986 ഓടെ ഇയാളെല്ലാം അവസാനിപ്പിക്കുകയും വിശ്രമ ജീവിതത്തിലേക്ക് മാറുകയും ചെയ്തു.

ഈസ്റ്റ് ഏരിയ റേപ്പിസ്റ്റ്, ഒർജിനൽ നൈറ്റ് സ്റ്റാള്‍ക്ക‍ർ എന്നീ പേരുകളിലും ഇയാള്‍ അറിയപ്പെട്ടിരുന്നു.