സൗദി കിരീടാവകാശി മുഖ്‌റിന്‍ രാജകുമാരനെ സല്‍മാന്‍ രാജാവ് പുറത്താക്കി ആഭ്യന്തരമന്ത്രി മുഹമ്മദ് ബിന്‍ നായിഫ് രാജകുമാരനെ തല്‍സ്ഥാനത്തു നിയമിച്ചു. രാജാവിന്റെ മകനും പ്രതിരോധമന്ത്രിയുമായ മുഹമ്മദ് ബിന്‍ സല്‍മാനെ ഉപകിരീടാവകാശിയാക്കി. 1975 മുതല്‍ വിദേശകാര്യമന്ത്രിയായ സൗദ് അല്‍ ഫൈസലിനെ നീക്കി യുഎസിലെ ഇപ്പോഴത്തെ സ്ഥാനപതി ആദില്‍ അല്‍ ജുബൈറിനെ തല്‍സ്ഥാനത്തു നിയമിക്കുകയും ചെയ്തു. രാജകുടുംബാംഗമല്ലാത്തയാള്‍ വിദേശകാര്യമന്ത്രിയാകുന്നത് ആദ്യമായാണ്.
മുഖ്‌റിന്‍ രാജകുമാരന്റെ സ്ഥാനചലനത്തിനും മകന്‍ മുഹമ്മദ് ബിന്‍ സല്‍മാന്റെ ഉപകിരീടാവകാശിയായുള്ള സ്ഥാനാരോഹണത്തിനും രാജ്യത്തെ പിന്തുടര്‍ച്ചാവകാശസമിതിയുടെ അംഗീകാരമുണ്ടെന്നു രാജാവിന്റെ ഉത്തരവില്‍ വ്യക്തമാക്കുന്നു. ജനുവരി 23ന് അബ്ദുല്ല രാജാവിന്റെ വിയോഗത്തെത്തുടര്‍ന്ന് അധികാരമേറ്റെടുത്ത സല്‍മാന്‍ രാജാവ് ഭരണതലത്തില്‍ നടത്തുന്ന ഏറ്റവും സുപ്രധാന അഴിച്ചുപണിയാണിത്.
ആധുനിക സൗദിയുടെ സ്ഥാപകന്‍ അബ്ദുല്‍ അസീസ് രാജാവിന്റെ (ഇബ്‌നു സൗദ്) മക്കളാണ് ഇതുവരെ കിരീടാവകാശി പദവി വഹിച്ചിട്ടുള്ള എല്ലാവരും. അബ്ദുല്‍ അസീസിന്റെ ചെറുമക്കളില്‍ ഏറ്റവും മുതിര്‍ന്നയാളായ മുഹമ്മദ് ബിന്‍ നായിഫിനെ (55) കിരീടാവകാശിയാക്കുക വഴി അടുത്ത തലമുറയിലേക്കുള്ള അധികാര മാറ്റത്തിനാണു തുടക്കം കുറിക്കുന്നത്. അബ്ദുല്‍ അസീസ് രാജാവിന്റെ ചെറുമക്കളില്‍ ഏറ്റവും മുതിര്‍ന്നയാളാണു മുഹമ്മദ് ബിന്‍ നായിഫ്. സല്‍മാന്‍ രാജാവിന്റെ സഹോദരനും മുന്‍ കിരീടാവകാശിയുമായ നായിഫ് ബിന്‍ അബ്ദുല്‍ അസീസിന്റെ മകനാണ്. 2012 മുതല്‍ ആഭ്യന്തരമന്ത്രിയായ അദ്ദേഹം അബ്ദുല്ല രാജാവിന്റെ വിയോഗത്തിനു ശേഷം ഉപകിരീടാവകാശിയുമായി. അല്‍ ഖായിദയെ അടിച്ചമര്‍ത്താന്‍ സ്വീകരിച്ച നടപടികളിലൂടെ ശ്രദ്ധേയനായ അദ്ദേഹം 2009ല്‍ അവരുടെ വധശ്രമത്തെ അതിജീവിക്കുകയും ചെയ്തു.
യെമന്‍ വിമതര്‍ക്കെതിരെയും ഇസ്‌ലാമിക് സ്‌റ്റേറ്റ് ഭീകരര്‍ക്കെതിരെയും സൗദി ശക്തമായ നടപടികള്‍ സ്വീകരിക്കുന്ന സമയത്തു മുഹമ്മദ് ബിന്‍ നായിഫ് ഭരണത്തിലെ രണ്ടാമനാകുന്നത് എന്നതും ശ്രദ്ധേയം. അധികാരശ്രേണിയിലെ മൂന്നാമനായാണ് ഉപകിരീടാവകാശി മുഹമ്മദ് ബിന്‍ സല്‍മാന്‍ (34) ഉയരുന്നത്; സൗദി ഉന്നത നേതൃനിരയിലെ ഏറ്റവും ചെറുപ്പമുള്ള മുഖം. യെമന്‍ വിമതര്‍ക്കെതിരെ സൗദിയുടെ ആക്രമണപദ്ധതിയില്‍ നിര്‍ണായക പങ്ക് വഹിച്ചു. ഉപകിരീടാവകാശിയായതോടെ കൊട്ടാരകാര്യ മേധാവിയുടെ ചുമതല മുഹമ്മദ് ബിന്‍ സല്‍മാന്‍ ഒഴിഞ്ഞു. അതേസമയം, സൗദിയുടെ ധനകാര്യ, വികസന പ്രവര്‍ത്തനങ്ങള്‍ക്കു മേല്‍നോട്ടം വഹിക്കുന്ന പ്രത്യേക സമിതിയുടെ അധ്യക്ഷപദവിയില്‍ തുടരും.
നിതാഖാത് പദ്ധതിയിലൂടെ സൗദിയില്‍ സ്വദേശിവല്‍കരണത്തിന് ആക്കം കൂട്ടിയ തൊഴില്‍മന്ത്രി ആദില്‍ ഫക്കീഹിനെ ധന, ആസൂത്രണമന്ത്രിയാക്കി. മുഫ്‌റജ് അല്‍ ഹഖ്ബാനിയാണു പുതിയ തൊഴില്‍മന്ത്രി. പൊതുമേഖലാ എണ്ണക്കമ്പനിയായ സൗദി ആരാംകോ ചീഫ് എക്‌സിക്യൂട്ടീവ് ഖാലിദ് അല്‍ ഫലീഹ് ആണു പുതിയ ആരോഗ്യമന്ത്രി. ഹാമിദ് അല്‍ സുവൈലം ആണു പുതിയ കൊട്ടാരകാര്യ മേധാവി.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha