ബ്രിട്ടനില്‍ കോവിഡ് വ്യാപനത്തെ തുടര്‍ന്ന് കര്‍ശന നിയന്ത്രണങ്ങളുമായി ബോറിസ് ജോണ്‍സണ്‍ സര്‍ക്കാര്‍. ക്വാറന്റീന്‍ ലംഘിക്കുന്നവര്‍ക്ക് 10,000 പൗണ്ട് (ഏകദേശം 9.5 ലക്ഷം രൂപ) പിഴ ശിക്ഷിക്കും. ക്വാറന്റീനിലിരിക്കുന്നവരെ നിര്‍ബന്ധിച്ച് ജോലിക്ക് വരുത്തുന്ന തൊഴിലുടമകള്‍ക്കെതിരെയും കര്‍ശന നടപടിയുണ്ടാകും. 14 ദിവസത്തെ ക്വാറന്റീന്‍ തുടര്‍ച്ചയായി ലംഘിക്കുന്നവര്‍ക്കാണ് വന്‍ പിഴ ശിക്ഷ ലഭിക്കുക. ആയിരം പൗണ്ട് (95000 രൂപ) മുതലാണ് പിഴ ആരംഭിക്കുക. അതേസമയം, ക്വാറന്റീനിലാകുകയും വീട്ടിലിരുന്ന് ജോലി ചെയ്യാന്‍ കഴിയാതിരിക്കുകയും ചെയ്യുന്നവര്‍ക്ക് സര്‍ക്കാര്‍ 500 പൗണ്ട് (47,500 രൂപയോളം) നല്‍കും. നിര്‍മാണ തൊഴിലാളികളെ പോലെ വരുമാനമില്ലാത്തവര്‍ക്കാണ് ഈ സഹായം ലഭിക്കുക. പുതിയ തീരുമാനങ്ങള്‍ സെപ്റ്റംബര്‍ 28 മുതല്‍ പ്രാബല്യത്തിലാകും.