സംഘര്‍ഷം അയവില്ലാതെ തുടരുന്നതിനിടെ ഇന്ത്യ - ചൈന അതിര്‍ത്തിയിലെ മലനിരകളില്‍ തന്ത്രപ്രധാനമായ 6 ഇടങ്ങളില്‍ ഇന്ത്യന്‍ സേന ആധിപത്യമുറപ്പിച്ചു. ഓഗസ്റ്റ് 29 മുതല്‍ സെപ്റ്റംബര്‍ രണ്ടാമത്തെ ആഴ്ച വരെ നടന്ന ദൗത്യത്തിലാണിത്.മഗര്‍ ഹില്‍, ഗുരുംഗ് ഹില്‍, റീസെന്‍ ലാ, റെസാംഗ് ലാ, മുഖ്പാരി, ചൈനീസ് സേന നിലയുറപ്പിച്ചിരിക്കുന്ന ഫിംഗര്‍ പോയിന്റ് നാലിനു സമീപമുള്ള പ്രദേശം എന്നിവയാണ് ഇന്ത്യന്‍ സൈന്യം പിടിച്ചെടുത്തത്.ദുര്‍ഘട പ്രദേശങ്ങളായതിനാല്‍ ഇരു സേനകളും മുന്‍പ് സാന്നിധ്യമറിയിക്കാതിരുന്ന മലനിരകളാണിത്.

സംഘര്‍ഷം രൂക്ഷമായ സാഹചര്യത്തില്‍, ചൈനീസ് സേന അവിടേക്കെത്തുന്നതു തടയാന്‍ ലക്ഷ്യമിട്ടാണ് ഇന്ത്യന്‍ സേനയുടെ നീക്കം. മലനിരകളില്‍ മൊത്തം ഇരുപതിലേറെ തന്ത്രപ്രധാന ഭാഗങ്ങളില്‍ ഇന്ത്യ മേല്‍ക്കൈ നേടിയിട്ടുണ്ട്.മലനിരകള്‍ പിടിച്ചെടുക്കാനുള്ള ചൈനീസ് ശ്രമത്തെ പ്രതിരോധിച്ച ഇന്ത്യന്‍ സേനയുടെ നടപടിക്കു പിന്നാലെ മേഖലയില്‍ വെടിവയ്പ് നടന്നിരുന്നു.

ബ്ലാക്ക് ടോപ്പ്, ഹെല്‍മെറ്റ് ടോപ്പ് തുടങ്ങി ചൈന നിലയുറപ്പിച്ചിരിക്കുന്ന പ്രദേശങ്ങള്‍ നിരീക്ഷിക്കാന്‍ പറ്റുന്ന ഉയരത്തിലുള്ളതാണ് ഇന്ത്യ ഇപ്പോള്‍ എത്തിച്ചേര്‍ന്നിരിക്കുന്ന പ്രദേശങ്ങള്‍ എന്നു സൈനിക വൃത്തങ്ങള്‍ പറയുന്നു.ഇന്ത്യന്‍ സൈന്യം പുതിയ മേഖലകളില്‍ താവളമുറപ്പിച്ചതോടെ, ചൈന മൂവായിരം പുതിയ സൈനികരെക്കൂടി വിന്യസിച്ചിട്ടുണ്ടെന്നാണു വിവരം.