ആദ്യമായി വനിതയെ ചന്ദ്രനിലെത്തിക്കാൻ പദ്ധതിയിട്ട് നാസ. 2024 ല്‍ ഒരു വനിതയുള്‍പ്പടെയുള്ള ബഹിരാകാശ യാത്രികരുടെ സംഘത്തെ ചന്ദ്രനിലേക്ക് അയക്കാന്‍ പദ്ധതിയിടുന്നതായി നാസ വെളിപ്പെടുത്തിയിരിക്കുകയാണ്. ഇത് ചരിതനേട്ടമാകുമെന്നതിൽ സംശയമില്ല. ഇതിനായി 28 ബില്യണ്‍ ഡോളറാണ് ചന്ദ്രനിലേക്കുളള യാത്രയ്‌ക്ക് നാസ കണക്കാക്കുന്നത്. ഇതില്‍ 16 ബില്യണ്‍ ഡോളര്‍ ലൂണാര്‍ ലാന്‍ഡിംഗ് മൊഡ്യൂളിന് വേണ്ടിയാകും ചെലവാക്കുന്നത്.

അതേസമയം ഡൊണാള്‍ഡ് ട്രംപ് മുന്‍‌ഗണന നല്‍കി നിശ്ചയിച്ച പദ്ധതിയാണിത് എന്നാണ് അറിയുന്നത്. തിരഞ്ഞെടുപ്പ് വര്‍ഷമായതിനാല്‍ അമേരിക്കന്‍ ഭരണകൂടം ധനസഹായം നല്‍കേണ്ടി വരുമെന്നും 2021-25 ബജറ്റ് വര്‍ഷങ്ങളില്‍ ഇതിനായുളള പണം ഉള്‍പ്പെടുത്തുമെന്നുമാണ് ലഭ്യമാകുന്ന വിവരം. ആര്‍ട്ടിമിസ് എന്നാണ് ദൗത്യത്തിന്റെ പേര്.

തിങ്കളാഴ്ച മാദ്ധ്യമപ്രവര്‍ത്തകരുമായി നടത്തിയ ഫോണ്‍ സംഭാഷണത്തിലാണ് നാസയുടെ രക്ഷാധികാരി ജിം ബ്രിഡെന്‍സ്റ്റൈന്‍ ദൗത്യത്തെക്കുറിച്ച്‌ വ്യക്തമാക്കിയത്. ക്രിസ്‌മസിന് ആദ്യത്തെ 3.2 ബില്യണ്‍ ഡോളര്‍ കോണ്‍ഗ്രസ് അംഗീകരിച്ചാല്‍, 2024ല്‍ ചന്ദ്രനിലിറങ്ങാന്‍ സജ്ജരാണെന്ന് ബ്രിഡെന്‍സ്റ്റൈന്‍ വെളിപ്പെടുത്തുകയുണ്ടായി.