കഴിഞ്ഞ ദിവസമാണ് നാട്ടുകാരെപോലും ഞെട്ടിച്ച സംഭവം ഉണ്ടായത്. ഒറ്റ രാത്രി കൊണ്ട് വയോധികയെ ലക്ഷാധിപതിയാക്കിയ സംഭവം ഉണ്ടാക്കിയ ഓളം ചെറുതൊന്നുമല്ല. ഭാഗ്യം പല രൂപത്തിലും തേടിയെത്തും.

ഒരു വമ്പന്‍ മീനിന്റെ രൂപത്തിലാണ് പശ്ചിമ ബംഗാളിലെ തെക്കേ അറ്റത്തുള്ള സാഗര്‍ ദ്വീപിലെ ഛക്ഫുല്‍ദുബി ഗ്രാമത്തിലെ വയോധികയെ തേടിയെത്തിയത്. മത്സ്യം കിട്ടിയതോടെ ഒരു രാത്രി വെളുത്തപ്പോള്‍ ലക്ഷാധിപതിയാകുകയായിരുന്നു പുഷ്പ കാര്‍ എന്ന വയോധിക. നദീതീരത്താണ് പുഷ്പ കാറിന്റെ വീട്. ശനിയാഴ്ചയാണ് നദിയില്‍ പൊങ്ങിക്കിടക്കുന്ന മത്സ്യത്തെ ഇവര്‍ കണ്ടത്. വലയിട്ട് പിടിക്കാന്‍ നോക്കിയപ്പോള്‍ തന്നെ ഭാരം മൂലം മത്സ്യം കരയിലേക്ക് എത്തുന്നില്ലായിരുന്നു.

തുടര്‍ന്ന് കഷ്ടപ്പെട്ട് മത്സ്യത്തെ വലിച്ച് കരയിലിട്ടു. നാട്ടുകാരുടെ സഹായത്തോടെ മത്സ്യത്തെ ചന്തയില്‍ എത്തിച്ചു. അവിടെ എത്തിയപ്പോഴാണ് ഇത് അപൂര്‍വ്വ മത്സ്യമായ 'ഭോള'യാണെന്ന് മനസിലായത്. 52 കിലോഗ്രാം തൂക്കമായിരുന്നു ഈ മത്സ്യത്തിന്. ചീയാത്തതിനാല്‍ ചന്തയില്‍ വിറ്റ മത്സ്യത്തിന് മൂന്ന് ലക്ഷം രൂപയാണ് വയോധികയ്ക്ക് കിട്ടിയത്. കപ്പലില്‍ ഇടിച്ചായിരിക്കാം ഇത് ചത്തതെന്നാണ് ഗ്രാമീണര്‍ പറയുന്നത്.

ഈ മത്സ്യം കഴിക്കാന്‍ ഉപയോഗിച്ചില്ലെങ്കിലും ഇതിന്റെ ആന്തരിക അവയവങ്ങള്‍ക്ക് വലിയ മൂല്യമുണ്ടെന്നാണ് വ്യാപാരികള്‍ പറയുന്നത്. തെക്കുകിഴക്കന്‍ ഏഷ്യയിലെ ചില രാജ്യങ്ങളിലേക്കാണ് ഇത്തരം മീനുകളുടെ മാംസത്തിന്റെ അകത്തിരിക്കുന്ന നെയ്യ് കയറ്റി അയക്കുന്നത്.

പല ഔഷധ കൂട്ടുകള്‍ക്കായി ഇത്തരം നെയ്യുകള്‍ ഉപയോഗിക്കുന്നു എന്നാണ് വ്യാപാരികള്‍ പറയുന്നത്. കിലോയ്ക്ക് 80,000 രൂപയോ അതിലും ഉയര്‍ന്ന വിലയോയാണ് ഈ മത്സ്യത്തിന് ലഭിക്കുന്നത്.