മാലിദ്വീപ് മുന്‍ വൈസ്  പ്രസിഡന്റ് അഹമ്മദ് അദീബിന് കള്ളപ്പണം വെളുപ്പിക്കലുമായി ബന്ധപ്പെട്ട കേസില്‍ 20 വര്‍ഷം തടവ്. എന്നാല്‍, ഈ കേസില്‍ ഒരു വര്‍ഷം മാത്രം തടവുശിക്ഷ അനുഭവിച്ചാല്‍ മതിയാകും. സമാനമായ മറ്റൊരു കേസില്‍ ശിക്ഷ ഇപ്പോള്‍ അനുഭവിക്കുന്നതിനാലാണ്. ഇതിനു പുറമേ 1,29,800 ഡോളര്‍ പിഴയടയ്ക്കണമെന്നും മാലിദ്വീപ് ക്രിമിനല്‍ കോടതി വിധിച്ചു.

201ഃ-19 കാലയളവില്‍ അധികാരത്തിലിരുന്നപ്പോള്‍, മുന്‍പ്രസിഡന്റ് യമീന്‍ അബ്ദുള്‍ ഗയൂമിന്റെ അടുത്ത അനുയായിയായിരുന്ന അഹമ്മദ് അദീബ് അധികാരദുര്‍വിനിയോഗം നടത്തി സാമ്പത്തികനേട്ടമുണ്ടാക്കിയെന്നാണ് ആരോപണം. പുതിയ പ്രസിഡന്റായി ഇബ്രാഹിം മുഹമ്മദ് സോലിഹ് ചുമതലയേറ്റതിനു ശേഷമാണ് ഇവര്‍ക്കെതിരേ നിയമനടപടി തുടങ്ങിയത്.

രാഷ്ട്രീയ വിരോധത്തിന്റെ പേരിലാണ് കേസുകള്‍ ചുമത്തിയതെന്ന് ആരോപണമുയര്‍ന്നെങ്കിലൂം നടപടിയുമായി സര്‍ക്കാര്‍ മുന്നോട്ടുപോവുകയായിരുന്നു. കള്ളപ്പണം വെളുപ്പിക്കലിനു പുറമേ, പണാപഹരണം, സാമ്പത്തികനേട്ടത്തിനായി ഔദ്യോഗിക പദവി ദുരുപയോഗം ചെയ്യല്‍ ഉള്‍പ്പെടെയുള്ള കുറ്റങ്ങളും അദീബിനുമേല്‍ ചുമത്തിയിരുന്നു. ഇവയെല്ലാം തെളിയിക്കപ്പെട്ടതായി ക്രിമിനല്‍ കോടതി ചൂണ്ടിക്കാട്ടി.